Read kumam 1 Crónicas 27 Bible Online

1 Crónicas 27 - kumam bible

1 Crónicas 27

¹Lu jun tajlal kyi'j qe aj Israel ajla'maj qe ik tza'nx qe nejenel kye junjun k'loj kyiyjil, kyuk'ix qe nejenel kye soldad, aqeju at jun milchaq soldad tuj kykwent, ax ikx qeju at jun syentchaq soldad tuj kykwent, ax ikx qe txqantl nejenel ma' kyoklen, aqeju in che ajb'en ttxlaj rey tuj tkyaqil aq'untl. In che kub' pa'n qe soldad tuj k'lojin; jun xjaw in che ajb'en jun k'loj tuj ab'q'i. Teyle junjun k'loj attoq 24 mil kyb'aj.

²Aju tnejel k'loj, atzun qe tu'n kyxq'uqin tuj tnejel xjaw kykyaqil ab'q'i. Aju nejenel kye, atzun Jasobeam aju tky'ajal Zabdiel,

³a jlu tiyjil Fares ex nejenel kye kykyaqil nejenel kye soldad aqeju in che ajb'en tuj tnejel xjaw.

⁴Juntl k'loj xq'uqil tu'n kyajb'en tuj tkab'in xjaw: Aju nejenel kye, atzun Dodai aju aj Ahohitas, ex aju tkab'in nejenel Miclot tb'i.

⁵Juntl k'loj xq'uqil tu'n kyajb'en tuj toxin xjaw: Aju nejenel kye, atzun Benaía aju tky'ajal tnejel pal Joiada.

⁶Ate Benaía ajun kyxol qe 30 soldad kyuw kyk'u'j tuj q'oj, ex ax tok te nejenel kye. Ex ate Amisabad aju tky'ajal tok te tkab'in nejenel kye qeju toxin k'loj soldad.

⁷Juntl k'loj xq'uqil tu'n kyajb'en tuj tkyajin xjaw: Aju nejenel kye, atzun Asael aju terman Joab. Ex aju t-xel kyaj ten te tib'ajxi, atzun Zebadías aju tky'ajalx.

⁸Juntl k'loj xq'uqil tu'n kyajb'en tuj tjwe'yin xjaw: Aju nejenel kye, atzun Samhut aju aj Izrai.

⁹Juntl k'loj xq'uqil tu'n kyajb'en tuj tqaqin xjaw: Aju nejenel kye, atzun Ira aju tky'ajal Iques, aju aj Tecoa.

¹⁰Juntl k'loj xq'uqil tu'n kyajb'en tuj twuqin xjaw: Aju nejenel kye, atzun Heles aju aj Pelonita ex tiyjil Efraín.

¹¹Juntl k'loj xq'uqil tu'n kyajb'en tuj twajxaqin xjaw: Aju nejenel kye, atzun Sibecai aju aj Husa ex tiyjil Zera.

¹²Juntl k'loj xq'uqil tu'n kyajb'en tuj tb'elajin xjaw: Aju nejenel kye, atzun Ebiézer aju aj Anatotita ex tiyjil Benjamín.

¹³Juntl k'loj xq'uqil tu'n kyajb'en tuj tlajin xjaw: Aju nejenel kye, atzun Maharai aju aj Netofa ex tiyjil Zera.

¹⁴Juntl k'loj xq'uqil tu'n kyajb'en tuj tjunlajin xjaw: Aju nejenel kye, atzun Benaía aju aj Piratón ex tiyjil Efraín.

¹⁵Juntl k'loj xq'uqil tu'n kyajb'en tuj tkab'lajin xjaw: Aju nejenel kye, atzun Heldai aju aj Netofa ex tiyjil Otoniel.

¹⁶Qe nejenel kye junjun k'loj kyiyjil aj Israel, atzun qe jlu: Aju nejenel kye tiyjil Rubén, atzun Eliezer aju tky'ajal Zicri; aju nejenel kye tiyjil Simeón, atzun Sefatías aju tky'ajal Maaca;

¹⁷aju nejenel kye tiyjil Leví, atzun Hasabías aju tky'ajal Kemuel; aju nejenel kye tiyjil Aarón, atzun Sadoc,

¹⁸aju nejenel kye tiyjil Judá, atzun Eliú, a jlu jun terman David; aju nejenel kye tiyjil Isacar, atzun Omri aju tky'ajal Micael;

¹⁹aju nejenel kye tiyjil Zabulón, atzun Ismaías aju tky'ajal Abdías; aju nejenel kye tiyjil Neftalí, atzun Jerimot aju tky'ajal Azriel;

²⁰aju nejenel kye tiyjil Efraín, atzun Oseas aju tky'ajal Azazías; aju nejenel kye mij k'loj tiyjil Manasés, atzun Joel aju tky'ajal Pedaías;

²¹aju nejenel kye juntl mij k'loj tiyjil Manasés aqeju ate' tuj Galaad, atzun Iddo aju tky'ajal Zacarías; aju nejenel kye tiyjil Benjamín, atzun Jaasiel aju tky'ajal Abner;

²²ex aju nejenel kye tiyjil Dan, atzun Azareel aju tky'ajal Jeroham. Atzun qe nejenel jlu kye junjun k'loj kyiyjil aj Israel.

²³Minti' jaw ti'n David kyajlal qeju na'nxtoq tjapun winqin ab'q'i kyu'n, tu'nju otoq tzaj ttziyan Qman tu'n tchmet nimxix kyb'aj aj Israel, ik tza'n kyajlal qe che'w ate' twitz kya'j.

²⁴Ate Joab aju tal Sarvia ok ten q'ilte kyajlal, ex minti' jaw b'aj tu'n, porke tu'n tlaj jlu tzaj jun k'ixb'isab'l kyib'aj aj Israel. Kyja'tzun kyuj qe u'j tz'ib'an tu'n rey David minti' jun tajlal jte' kyb'et aj Israel.

²⁵Aju k'u'l pwaq tuj tja rey atzun Azmavet aju tky'ajal Adiel, atzun qe tx'utx', aqeju ate' tuj kojb'il, ax ikx qeju ate' kyuj tnam ex kyuj qe aldey ex kyuj qe ja ma' kywa'l, tkyajsa'ntoq tuj tkwent Jonatán aju tky'ajal Uzías.

²⁶Ex aju nejenel kye xjal in che aq'nan tuj kojb'il, atoq Ezri aju tky'ajal Quelub.

²⁷Ex aju nejenel kye aq'nal ti'j tqan uva, atoq Simei aju aj Ramat. Aju nejenel tkyajsa'ntoq ti'j tu'n tok chmet ta'l twitz uva tuj k'ub'l te, atoq Zabdi aju aj Sefam.

²⁸Ex aju nejenel ti'j tqan olivo ex ti'j tqan higo te tjaq' k'ul aju at tuj chq'ajlaj t-xe witz, atoq Baal-hanán aju aj Gedera; aju nejenel kye qeju in che aq'nan jatum in b'aj chmo'n aseyt, atzun Joás.

²⁹Aju nejenel kye pastoril wakẍ in che wa'n tuj chq'ajlaj Sarón, atzun Sitrai, ex ax aj Sarón te xjal lu. Aju nejenel kye pastoril wakẍ in che wa'n kyuj qe chq'ajlaj ttzi'yile a', atzun Safat aju tky'ajal Adlai.

³⁰Aju nejenel kye pastoril chej camey, atzun Obil aju tiyjil Ismael. Aju nejenel kye pastoril bur, atzun Jehedías aju aj Meronot.

³¹Ex aju nejenel kye pastoril ẍne'l, atzun Jaziz aju tiyjil Agar. Kykyaqil qe jlu mayordom qe ti'j tq'inumab'l rey David.

³²Atzunte Jonatán aju terman tman David at tnab'l ex xnaq'tzamaj, atzun q'ol consej te rey; atzunte Jehiel aju tky'ajal Hacmoni, atzun kwentil kye qe tky'ajal rey.

³³Ax ikx te Ahitofel q'ol consej te rey. Atzunte Husai aju aj Arquita, atzunju mas q'uql tk'u'j rey David ti'j.

³⁴Tkyimlenxi Ahitofel, kyaj ten Benaía aju tky'ajal Joiada te t-xel, tuk'ix Abiatar. Ex aju nejenel mas ma' toklen kyxol kykyaqil t-soldad rey, atzun Joab.