Read kumam 1 Crónicas 28 Bible Online

1 Crónicas 28 - kumam bible

1 Crónicas 28

¹Oktzun tchmo'n David tuj Jerusalén kykyaqil qe aj sanjelal kyxol aj Israel ex atzun qe jlu: Qe nejenel kye kykyaqil k'loj kyiyjil aj Israel, qe nejenel kye junjun k'loj soldad aqeju in che ajb'en te rey, qe nejenel at jun milchaq soldad tuj kykwent ex qe nejenel at jun syentchaq soldad tuj kykwent, qe mayordom kwentil tkyaqil ttx'otx' rey kyuk'ix qe twakẍ ex kytx'otx' qe tky'ajal, qe xjal mas ma' kyoklen ttxlaj rey ex kykyaqil qe soldad at nim kyipun ex kyuw kyk'u'j tuj q'oj.

²Atzunte David kub' we' ex tma kyja': Chin kyb'intze aqeye wermaniye ex nxjalile: Ximantoq wu'ne tu'n tjaw nb'incha'ne jun ja jatum tu'n tkub' ten aju kax k'ub'l tley Dios tu'ntzun mi'n tyukch, ex atzunju lugar lu jatum tu'n tkub' ten tq'uqb'il Qdios. Otoq b'ant tten tkyaqil wu'ne tu'n tjaw nb'incha'ne ja lu,

³ex tzaj tma'n Dios weye kyja': Mya aya kjawil b'inchante jun ja te weye, porke nim q'oj o tz'ok tu'na ex nim xjal o che kub' tb'yo'na tuj q'oj.

⁴Maske ikju, ate Qman aju Kydios aj Israel ma jaw sk'onte weye kyxol kykyaqil tk'wa'l nmane tu'n woke te kyrey aj Israel te jumajx. Ate Qman ma jaw sk'onte kye tiyjil Judá tu'n kykawin, ex kyxol tiyjil Judá ma jaw t-sk'o'n Qman qe tky'ajal nmane, ex kyxol tky'ajal nmane, ma chin jaw t-sk'o'n Qman tu'n woke te rey kyib'aj kykyaqil aj Israel.

⁵O tzaj tq'o'n Qman ela' nky'ajale, ex kyxol qe jlu ma jaw t-sk'o'n nky'ajale Salomón tu'n tkub' qe' tuj tq'uqb'il Qman tu'n tkawin kyib'aj aj Israel.

⁶Ax ikx o tma Qman weye: Aju tky'ajala Salomón, atzunju kjawil b'inchante jun njaye kyuk'ix qe ttxa'n tpe'n, porke ma jaw nsk'o'ne tu'n tok te nky'ajale ex atzun weye chin okele te tman,

⁷ex te jumajx kkyuwsetel tkawb'il wu'ne, qa kukx ma tz'ok tilil tu'n tu'n kyjapun qe nmandamyente ex qe nleye tu'n, ik tza'n in b'ant tu'n tuj tq'ijlalil ja'lo.

⁸Ja'lotzun twitz Qdios aju in b'inte qe, ex kywitze kykyaqile aqeye aj Israel aqeju etzan tu'n, kxel nkyuwsa'ne kyeye: Tz'ok tililx kyu'ne tu'n kyjapun kykyaqil tmandamyent Qman kyu'ne, aju Kydiose, tu'ntzun kukx tu'n tok te kyeye aju tb'anil tx'otx' lu, ex tu'ntzun tkyaj kyq'o'ne te kyetzb'il kyk'wa'le te jumajx.

⁹Ex atzun teya nky'ajal Salomón, tz'elx tnik'a ti'j Ndiose, aqine tmana, ex tz'ajb'ena te tu'n tkyaqil tanmiya ex tu'n tkyaqil tk'u'ja, porke ate Qman in b'aj tke'yin tuj kyanmi xjal ex nne'l tnik' ti'j noq alkyex kyximb'etz. Kyja'tzun, qa ma jyona ti'j, knetel tu'na, ex qa ma tz'el tpa'n tib'a ti'j, b'i'x k'elel ik'una tu'n te jumajx.

¹⁰Q'onk tkwenta ti'j, ate Qman ma jaw sk'onte teya tu'n tjaw tb'incha'na jun nintz ja tu'n tajb'en te tja. Kyja'tzun q'onk tipuna ex tzyuma aq'untl, chi David te Salomón.

¹¹Xitzun tq'o'n David te Salomón aju tky'ajal qe yek'b'il tza'n tten tu'n ttenb'a twitz tja Dios, ex tza'n tu'n ttenb'a qe txqantl ja, ex qe ja te k'ub'l qe ti'xti, ex tza'n tu'n ttenb'a qe tal cuart te tkab'in kol, ex qe tal cuart te tujxi ex ju Lugar Mas Xjanxix jatum tu'n tnajset kyil xjal.

¹²Ax ikx xi tq'o'n David jun yek'b'il ti'j tkyaqilju otoq kub' t-ximan tu'n tb'ant kyi'j qe ttxa'n tpe'n tja Dios, ex kyi'j qe tal cuart ti'jele tja Dios, ex kyi'j qe tal cuart tu'n kyajb'en te k'ub'l oyaj ti'j tja Dios ex kyi'j qe tal cuart tu'n kyajb'en te k'ub'l tkyaqil oyaj xjansa'maj.

¹³Ax ikx xi tma'n David tza'n tten tu'n kyb'aj pa't qe pal ex qe aj Leví tuj k'lojin, tu'n kyaq'nan ti'j tkyaqil aq'untl in b'ant tuj tja Dios, ex kyi'j kykyaqil qe makb'il in che ajb'en tuj k'ulb'il tuj tja Qman.

¹⁴Ax ikx xi tq'o'n nimxix tajlal q'an pwaq ex saq pwaq tu'n kyb'ant kykyaqil qe makb'il q'an pwaq ex saq pwaq kytx'otx'il, aqeju at tu'n kyajb'en tuj k'ulb'il,

¹⁵ex tu'n tajb'en tu'n kyb'ant qe tkub'il kandil ex qe kandil, tza'nx qeju q'an pwaq kytx'otx'il ax ikx qeju saq pwaq kytx'otx'il, xi tq'o'n cabalxix ik tza'nx talil junjun kye tu'n tb'ant.

¹⁶Ax ikx xi tq'o'n q'an pwaq ex saq pwaq tu'n kyb'ant qe mes jatum tu'n kykub' txolb'et qe pan twitz Qman, at q'an pwaq kytx'otx'il ex at saq pwaq kytx'otx'il.

¹⁷Ax ikx xi tq'o'n q'an pwaq tu'n kyb'ant qe jakb'il twitz chib'j ti'j, kyuk'ix qe laq matij ex qe xar, ax ikx xi tq'o'n q'an pwaq ex saq pwaq tu'n kyb'ant qe vas ti'j; xi tq'o'n ik tza'nx kyalil teyle junjun tu'n tb'ant.

¹⁸Ax ikx xi tq'o'n q'an pwaq tb'anilxix tu'n tb'ant altar jatum tu'n tkub' patit storak, ax ikx xi tq'o'n q'an pwaq tu'n tb'aj b'inchet jun carwaj kye qe tilb'ilal querubín, aqeju lik'un tten kyxik' tib'aj kax jatum k'u'n tley Dios.

¹⁹Tkyaqil jlu tu'n Qman kub' ttz'ib'an ex ma tzaj tq'o'n nnab'le tu'n tel nnik'e ti'j tza'n tten tu'n tb'ant tkyaqil aq'untl, ik tza'nxju yek'b'il o tzaj q'o'n weye, chi David.

²⁰Ax ikx xi tma'n David te Salomón aju tky'ajal: Tenx tipuna ex kyuwx tk'u'ja, ex tzyuma aq'untl. Mi'n tzaj b'aj tk'u'ja ex mi'n xob'a, ex ktel Qman Dios tuk'ila. Mlay kyaj q'o'na ex mlay kyaj kolina tu'n, okxi tb'aj b'ant tkyaqil aq'untl ti'j tja Qman.

²¹Ex lutzun qe k'loj pal lu ex qe aj Leví kyq'on kyib' tu'n kyaq'nan ti'j tja Qman; tuj tkyaqil aq'untl ate' qe onil teya ex jaku che aq'nan tuk'ila noq tu'n kyex kygan, ex atlex kynab'l ti'j tkyaqil txkaj aq'untl; ex qe nejenel ex kykyaqil xjal kb'antel kyu'n aju kxel tma'na kye, chi David.