Read kumam 1 Crónicas 5 Bible Online

1 Crónicas 5 - kumam bible

1 Crónicas 5

¹Qe tky'ajal Rubén aju nej tky'ajal Israel, atzun qe jlu: Hanoc, Falú, Hezrón ex Carmi. Axix tok ate Rubén nej k'wa'lb'aj, ex naj toklen te nej k'wa'lb'aj tu'nju kub' tan tuk'il t-xu'jil tman, ex aju oklenj te nej k'wa'lb'aj xi q'o'n kye qe tky'ajal José, aju juntl tky'ajal Israel. Maske ikju, te tib'ajxi, ate Judá ok masxix tipun kywitz qe terman, ex ti'j tiyjil Judá etz jun nejenel; ex aju oklenj te nej k'wa'lb'aj te José xi q'o'n.

⁴Qe tiyjil Joel, atzun qe jlu: Ate Joel tman Semaías, atzunte Semaías tman Gog, atzunte Gog tman Simei,

⁵atzunte Simei tman Micaía, atzunte Micaía tman Reaía, atzunte Reaía tman Baal,

⁶ex atzunte Baal tman Beera. Ate Beera aju nejenel kye aj Rubén xi q'i'n pres tu'n Tiglat-pileser aju rey kye aj Asiria.

⁷Qe terman Beera e ok te nejenel kye junjun k'loj kyiyjil ex ku'x tz'ib'an kyb'i tuj libro, ex atzun qe jlu: Jeiel, Zacarías,

⁸tuk'ix Bela aju tky'ajal Azaz ex tal tchman Sema aju tky'ajal Joel. Ate Bela o najan tuj tnam Aroer ex aju ttx'otx' pon b'aj max tuj tnam Nebo ex tuj tnam Baal-meón.

⁹Ex o najan tuj tumlal tjawitz q'ij ex pon b'aj ttx'otx' max ttxa'npun tzqij tx'otx', aju tzqij tx'otx' in tzaj qe' max ttzi nima Éufrates, tu'nju otoq chmet nimxix twakẍ tuj tx'otx' Galaad.

¹⁰Tuj tq'ijlalil tej tkawin Saúl ok q'oj kyu'n qe tiyjil Rubén kyuk'il aj Agarenos, kub' kyi'j aj Agarenos kyu'n, ex atzun e kub' ten qe tiyjil Rubén tuj tumlal tjawitz q'ij tuj tx'otx' Galaad.

¹¹Qe tiyjil Gad, atzun e najan tuj tx'otx' Basán, tib'aj kytx'otx' qe aj Rubén, ex pon b'aj kytx'otx' max tuj tnam Salca.

¹²At kyaje nejenel kyxol ex atzun qe jlu: Aju tnejel Joel tb'i, ex atzunju mas ma' toklen, atzunju tkab'in Safán tb'i, atzunju toxin Jaanai tb'i, ex atzunju tkyajin Safat tb'i.

¹³Ex atzun qe kyerman jlu: Micael, Mesulam, Seba, Jorai, Jacán, Zía ex Heber. Wuq kyb'aj tu'n tkyaqilx ex nejenel qe kye junjun k'loj kyiyjil.

¹⁴Atzun qe jlu tky'ajal Abihail, ate Abihail tky'ajal Huri, atzunte Huri tky'ajal Jaroa, atzunte Jaroa tky'ajal Galaad, atzunte Galaad tky'ajal Micael, atzunte Micael tky'ajal Jesisai, atzunte Jesisai tky'ajal Jahdo, ex atzunte Jahdo tky'ajal Buz.

¹⁵Ate Ahí aju tky'ajal Abdiel ex tal tchman Guni ok te nejenel kye qe tiyjil.

¹⁶Kykyaqil qe jlu atzun e najan tuj tx'otx' Galaad, ex tuj tx'otx' Basán, ex kyuj qe aldey ate' tuj, ex kyuj qe kywab'l alumaj tuj lugar Sarón tb'i, max jatum ponin b'aj.

¹⁷Kykyaqil qe jlu ku'x tz'ib'an kyb'i tuj libro jatum ku'x tz'ib'et kyb'i kykyaqil k'loj kyiyjil tuj tq'ijlalil tej tten Jotam te rey tuj Judá, ex tej tten Jeroboam te rey kyxol aj Israel.

¹⁸Qe xinaq tiyjil Rubén ex tiyjil Gad kyuk'ix mij tiyjil Manasés kyuw kyk'u'j tuj q'oj, q'i'mlex qe makb'il in che ajb'en tuj q'oj kyu'n tuk'ix spad ex xob'l plech, ex xnaq'tzamnixix qe wen tu'n kyq'ojin. Attoq 44 mil tuk'il wuq syent tuk'il 60 xinaq otoq b'ant tu'n kyxi' tuj q'oj.

¹⁹Ex e q'ojin kyi'j aj Agarenos, kyi'j tiyjil Jetur, kyi'j tiyjil Nafis ex kyi'j tiyjil Nodab,

²⁰ex o tz'onin Dios kyi'j; kub' kyi'j aj Agarenos kyu'n, kyuk'ix qeju mojl kyyol kyuk'il e kub' tz'aq qe tuj kyq'ab', ex tej ate'toq tuj q'oj xi kyqanin te Dios tu'n kytzaj onin qe tu'n. O onin Dios kyi'j ex ok qe' kyk'u'j ti'j.

²¹Ex tzaj kyi'n kywakẍ qe aj q'oj kyi'j, tzaj kyi'n 50 mil chej camey tuk'ix kab' syent 50 mil ẍne'l ex kab' mil chej bur, ex jun syent mil xjal tzaj kyi'n pres.

²²Nimku aj q'oj e kyim, porke ate Dios o onin kyi'j tu'n tok q'oj. Ex axtzun e kyaj ten qe aj Rubén najal kyuj qe lugar lu tejxi tpon tq'ijlalil tej kyxi q'i'n tuj juntl tx'otx' najchaq.

²³Qe mij tiyjil Manasés e najan tuj tx'otx' tzajni tuj Basán ex ponin b'aj max tuj Baal-hermón, Senir, ex twi witz Hermón, ex nimku kyb'aj.

²⁴Aqeju nejenel kye junjun k'loj kyiyjil, atzun qe jlu: Efer, Isi, Eliel, Azriel, Jeremías, Hodavías ex Jahdiel. Kykyaqil qe xinaq lu kyuwxix kyk'u'j tuj q'oj, najchaq pon b'aj tqanil kyi'j, ex nejenel qe kye junjun k'loj kyiyjil.

²⁵Ex el kypa'n kyib' ti'j Tdios kyxe'chel, kyaj kykolin Qman, ex e ok ten k'ulul kywitz qe kydios tnam xjal otoq che naj tu'n Dios ex otoq che ex tlajo'n kywitz.

²⁶Tu'ntzun jlu ok ten Kydios aj Israel to'yil teju xjal Pul tb'i, aju rey te Asiria, ex ax juntl tb'i Tiglat-pileser, tu'n kyxi tpresin qe aj Rubén ex qe aj Gad, kyuk'ix mij tiyjil Manasés, ex tu'n kyxi ti'n tu'n kypon kyuj qe lugar Halah, Habor, Hara ex ttzi nima Gozán, ex axtzun ate'x ja'lo.