Read kumam 2 Crónicas 1 Bible Online

2 Crónicas 1 - kumam bible

2 Crónicas 1

¹O kyuwsanjtz Salomón aju tky'ajal David tuj tkawb'il, porke ate Qman aju Tdios o ten tuk'il, kyja'tzun o ch'iyxix toklen.

²E tzajtzun ttxko'n Salomón kykyaqil aj Israel: Qe nejenel kye soldad, aqeju at jun milchaq soldad tuj kykwent ex qeju at jun syentchaq soldad tuj kykwent, qe jwes, ex kykyaqil qe nejenel te junjun k'loj aj Israel at kyxilen kyxolx.

³Kykyaqil xjal otoq che chmet tuk'il Salomón e je'x tuj lugar te k'ulb'il tuj Gabaón, ex atzun ta'toq ja xb'alun te mojb'ab'l tib'il tuk'il Dios, aju otoq b'ant tu'n tmajen Dios Moisés tuj lugar tzqij tx'otx'.

⁴Ex otoq tzaj ti'n David ju kax k'ub'l tley Dios tuj tnam Quiriat-jearim, ex ul ti'n tuj Jerusalén tuj lugar jatum otoq b'ant tten tu'n, tu'nju otoq jaw tb'incha'n jun ja xb'alun tu'n tokx ten kax tuj.

⁵Aju altar q'an k'uxb'il, aju otoq b'aj tb'incha'n Bezaleel aju tky'ajal Uri ex tal tchman Hur, ax ikx axtoq ta' tuj Gabaón, tkub' twitz ja xb'alun te Qman. Tujtzun lugar lu xi' Salomón ex kykyaqil xjal k'ulul te Qman.

⁶Jaxtzun Salomón jatum ta' altar q'an k'uxb'il, aju tkub' twitz Qman twitz ja xb'alun te mojb'ab'l tib'il tuk'il Dios; tib'ajtzun altar lu kub' tpatun Salomón jun mil alumaj te jun oyaj te Qman.

⁷Tujx ju qonik'an lu, kub' tyek'un tib' Dios twitz Salomón ex tma: Qanintza weye alkye tajb'ila ex jaku txi nq'o'ne.

⁸Atzunte Salomón xi ttzaq'we'n te Dios kyja': Nimxix o tk'ujlaya David aju qtzan nmane, ex a qine ma chin ok tq'o'na kawil te t-xel.

⁹Atzun ja'lo Nman Dios, japunx tu'na aju tzaj tma'na te David aju qtzan nmane, tu'nju ma chin ok tq'o'na te rey kyib'aj tnam xjal nimxix kyajlal ex mlay b'ant kyajlanjtz.

¹⁰Kyja'tzun q'ontza nnab'le ex wojtzqib'le tu'ntzun kyxi nẍaqlune qe tnam xjal lu; ex ¿alkye jun jaku b'ant tkawin kyib'aj qe xjal etzan tu'na nim kyajlal? Chi Salomón.

¹¹Tzajtzun tzaq'we'n Salomón tu'n Dios kyja': Tu'nju ma tzaj tqanina jlu weye, ex minti' ma tzaj tqanina tu'n tten tq'inumab'la, mi tu'n tjaw nimsa'na, mi tu'n kykyim qe aj q'oj ti'ja, ex mi tu'n t-xi laq'e' tuj tanq'ib'la, noq o'kx ma tzaj tqanina tnab'la ex tojtzqib'la tu'n tb'ant tkawina kyib'aj qe xjal etzan wu'ne, ex wu'ne ma tz'ok nq'o'na te rey tu'n tkawina kyib'aj,

¹²kyja'tzun kxel nq'o'ne tnab'la ex tojtzqib'la, ax ikx kxel nq'o'ne tq'inumab'la, ex kjawil nimsa'na; ktel mas tnab'la ex tq'inumab'la kywitz qe rey aqeju e ten nej na'nxtoq tok teya te rey, ex kywitz qeju che okel te rey te tib'ajxiya.

¹³Te tib'ajxi ajtztzun Salomón tuj lugar te k'ulb'il tuj Gabaón, aju tkub' twitz ja xb'alun te mojb'ab'l tib'il tuk'il Dios, pon tuj Jerusalén ex o kawin kyib'aj aj Israel.

¹⁴B'ajtzun tchmo'n Salomón qe carwaj ex qe chej cabay. Attoq jun mil tuk'il kyaje syent tcarwaj ex kab'laj mil tchej cabay. Aqe jlu e okx tq'o'n Salomón kyuj qe tnam jatum ate' qe cuartel kye carwaj te q'ojb'il, ex at carwaj ex cabay ax e okx tq'o'n tuj lugar niqayin ttxlaj tuj Jerusalén.

¹⁵O chmet nimxix saq pwaq ex q'an pwaq tuk'il rey Salomón tuj Jerusalén, mer ik tza'n ab'j; ex nim tze' wi'ten o chmet, mer ik tza'n tqan higo in tzaj ch'iy tuj k'ul tuj chq'ajlaj t-xe witz.

¹⁶Qe chej cabay te Salomón atzun in che tzaj q'i'n tuj Egipto ex tuj Cilicia, porke qe comersyant te Salomón in tzaj kylaq'o'n ma chixin.

¹⁷Ok in tzaj kylaq'o'n jun carwaj tuj Egipto, qaq syent saq pwaq twi', ex atzun twi' jun chej, jun syent tuk'il 50. Ex kykyaqil qe rey kye aj Heteo ex kye aj Siria in xi kylaq'o'n qe jlu kyuk'il qe tmajen Salomón.