Read kumam 2 Crónicas 12 Bible Online

2 Crónicas 12 - kumam bible

2 Crónicas 12

¹Tej tkyuwset tkawb'il Roboam ex tej tna'nte attoq nim tipun tuj tkawb'il, kyaj tkolin tu'n tjapun tley Qman tu'n, ax ikx o kyb'incha kykyaqil aj Israel.

²Ex tu'nju el kypa'n kyib' ti'j Qman, kyja'tzun tuj tjwe'yin ab'q'i ttzyetlen tkawin rey Roboam ok tzoqpaj Sisac aju rey te Egipto ti'j Jerusalén,

³pon tuk'il jun mil tuk'il kab' syent carwaj in che ajb'en tuj q'oj, tuk'ix 60 mil soldad kyjax kyib'aj chej ex kyuk'ix txqantl soldad nimxix kyajlal tzaj kyuk'in kyib' tuj Egipto; aqe jlu aj Libia, aj Suquín ex aj Etiopía qe.

⁴Qe tnam tok muro kyi'j tuj Judá kub' kyi'j tu'n ex pon max niqayin ttxlaj Jerusalén.

⁵Pontzun Semaías aju t-sanjel Dios tuk'il Roboam ex kyuk'il qe nejenel kye aj Judá, aqeju otoq pon kychmon kyib' tuj tnam Jerusalén tu'nju in che xob'toq twitz Sisac, ex xi tma'n kye: —Chi Qman kyja': Tu'nju ma chin kyaj kykoline, kyja'tzun ma che kyaj nq'o'ne tu'n tkub' kyi'je tu'n Sisac.

⁶Atzun kye nejenel kye aj Israel tuk'ix rey el kynik' ti'j, kyja'tzun kub' kymansin kyib' ex kyma: —Tuj tumelxix ma tb'incha Qman jlu qi'j.

⁷Tejtzun tke'yinte Qman otoq kub' kymansin kyib', tzaj yolin juntl maj tuk'il Semaías ex tzaj tma'n kyja': Tu'nju ma kub' kymansin kyib' nwitze, mlay che naj wu'ne, che kletel naj wu'ne ex mlay txi nq'o'ne amb'il te Sisac tu'n tkub' tq'o'n kycastiw aj Jerusalén;

⁸ex che kyjel ten tjaq' tkawb'il Sisac, ex k'elel kynik' ti'j alkye mas b'a'n, qa tu'n kyajb'en weye, ex qa tu'n kyajb'en kye qe rey kye txqantl nasyon, chi Dios te Semaías.

⁹Sisac aju rey tuj Egipto ok tzoqpaj ti'j Jerusalén ex xi ti'n qe q'inumab'l ate' tuj tja Qman ex tuj tja rey. Tkyaqil xi ti'n, ax ikx e je'x ti'n tkyaqil maqb'il q'an pwaq kytx'otx'il, aqeju tu'n Salomón e kub' tb'incha'n.

¹⁰Te kyxel qe maqb'il lu e kub' tb'incha'n rey Roboam qe maqb'il q'an k'uxb'il, ex e kyaj tq'o'n tuj kykwent qe nejenel kye xq'uqil ttzi tja rey.

¹¹Teyle junjun maj ok t-xi' rey tuj tja Dios, qe xq'uqil in xi kyi'n qe maqb'il, ex nna'jtz kyi'n juntl maj tu'n kyten tuj ja jatum ate' qe xq'uqil.

¹²Kyja'tzun noq tu'nju kub' tmansin tib' Roboam o chewix tq'oj Qman ti'j, ex minti' e naj aj Judá tu'n te jumajx. Ax ikx b'a'n e ten xjal tuj Judá.

¹³Ok tipun tkawb'il rey Roboam tuj Jerusalén ex kukx o kawin. Toktoq twi' 41 ab'q'i tej ttzyet tkawin, ex o kawin wuqlaj ab'q'i tuj Jerusalén aju tnam jaw t-sk'o'n Qman kyxol kykyaqil k'loj kyiyjil aj Israel tu'n ttzaj na'n tb'i tuj. Aju ttxu' Roboam, Naama tb'i ex aj Amón.

¹⁴Qe tb'inchb'en Roboam mya b'a'n e ela tuj twitz Qman, porke minti' o tz'ajb'en te Dios tu'n tkyaqil tk'u'j.

¹⁵Aju tx'olb'ab'en ti'j tb'inchb'en Roboam atxix tej tqe' tkawin ex tejxi tpon b'aj, atzun tz'ib'an kyuj qe libro jatum tz'ib'an kyb'i qtzan t-xe'chel. A jlu tu'n Semaías kyaj kytz'ib'an, aju t-sanjel Dios, tuk'ix Iddo aju b'a'n nab'in tu'n Dios. Kukx o ten q'oj kyxol Roboam tuk'il Jeroboam.

¹⁶Ex tejtzun tkyim Roboam ku'x maqu'n kyxol qtzan t-xe'chel tuj tnam tok tb'i Ttanmi David. Te tib'ajxi, aju o kawin te t-xel, atzun Abías aju tky'ajal.