Read kumam 2 Crónicas 14 Bible Online

2 Crónicas 14 - kumam bible

2 Crónicas 14

¹Tejtzun tkyim Abías, ku'x maqu'n tuj tnam tok tb'i Ttanmi David. Te tib'ajxi aju o kawin te t-xel, atzun Asa aju tky'ajal. Tuj tq'ijlalil tej tkawin Asa puro tuj txub'txaj e ten aj Judá tuj laj ab'q'i.

²Aqeju tb'inchb'en Asa puro b'a'n ex tz'aqlxix e ela tuj twitz Qman aju Tdios.

³E el ti'n qe altar kye qe tilb'ilal nno'k kydiosin xjal, aqeju in che tzaj q'i'n tuj junxitl nasyon, ax ikx qe lugar jatum in che k'ulun qe xjal kywi' qe witz; e b'aj tb'uchin qe ab'j xjansamaj ex e kub' t-xitun qe tilb'ilal xu'j dios Asera.

⁴Ax ikx xi tma'n kye aj Judá tu'n kyok lpe' ti'j Qman aju Kydios qtzan kyxe'chel, ex tu'n kyjapun qe tley ex qe tmandamyent kyu'n.

⁵Kyuj kykyaqil tnam ate' tuj Judá e b'aj t-xitun qe lugar ex qe altar jatum in che k'ulun qe xjal kywi' qe witz, ex puro tuj txub'txaj o che ten xjal tjaq' tkawb'il.

⁶Tuj tq'ijlalil lu e jaw tb'incha'n Asa qe tnam tok muro kyi'j ate' tuj Judá, porke tuj txub'txaj ta'toq tnam, ex minti' jun o q'ojl ti'j, ex tu'n Qman e ten tuj txub'txaj.

⁷Ex xi tma'n kye aj Judá: Qb'inchan jaw qe tnam lu, ex qb'inchan jaw muro kyi'jele, qb'inchan jaw qe ja ma' kywa'l jatum tu'n kyokx ten qe xq'uqil tnam, qq'o'n ok qe kylamel kyuk'ix qe tranc kyi'j akux at tx'otx' tuj qkwent, porke ma qo niman te Qman aju Qdios ex b'a'n qten kyuk'il txqantl nasyon, chi Asa kye aj Judá. Kyja'tzun jaw kyb'incha'n qe tnam ex b'a'n ela kyaq'un.

⁸Kyxol aj Judá attoq ox syent mil t-soldad Asa b'anin kyten tuk'il kymaqb'il ex kylans, ex attoq kab' syent tuk'il 80 mil aj Benjamín ax ikx b'anin kyten tuk'il kymaqb'il ex xob'l kyplech. Kykyaqil qe soldad lu kyuwxix kyk'u'j tuj q'oj.

⁹At jun xjal aj Etiopía Zera tb'i tzaj q'ojlel kyi'j, ul tuk'il txqan soldad nimxix kyajlal wen, kyuk'ix ox syent carwaj in che ajb'en tuj q'oj ex pon max tuj tnam Maresa.

¹⁰Etztzun Asa kyuk'ix qe t-soldad tu'n kyok tzoqpaj kyi'j, ex b'ant kyten tu'n ttzyet q'oj kyu'n tuj chq'ajlaj Sefata, aju tkub' ttxlaj tnam Maresa.

¹¹Oktzun ten Asa na'l Dios ex xi tma'n kyja': Aya Nman, junx ta' te teya tu'n tonina ti'j ju xjal minti' tipun ex qa ti'j ju xjal at nim tipun. Kyja'tzun qo tonintza, porke ti'ja ma tz'ok qe' qk'u'je, ex tu'n tipumala ma qo tzaje q'ojlel kyi'j qe soldad lu. Nman, aya Qdiose, mi'n taq'a amb'il tu'n tkub' ti'ja kyu'n xjal, chi Asa.

¹²Ex noq tu'n tipumal Dios kub' kyi'j aj Etiopía tu'n Asa ex kyu'n aj Judá, ex e je'l oq.

¹³Ex ate Asa kyuk'ix qe t-soldad e ok lpe' kyi'j tu'n kykub' kyu'n tejxi kypon tuj tnam Gerar, atzun e kub' b'yo'n qe aj Etiopía kyu'n qe soldad ex mi jun kyaj anq'in kyu'n; kykyaqil e b'aj kyim noq tu'n tipumal Qman, ex tzaj kyi'n nimku ti'xti otoq kyaj ten kyu'n aj q'oj.

¹⁴Te tib'ajxi e ok tzoqpaj kyi'j qe tnam ate' ti'jele Gerar, ex kykyaqil xjal otoq tzaj kyxob'il twitz Qman. Etz kyi'n aj Judá nimku q'inumab'l kyuj qe tnam lu.

¹⁵Ax ikx e ok tzoqpaj kyi'j kycampament qe kwentil alumaj ex tzaj kyi'n nimku ẍne'l ex camey. Te tib'ajxi e ajtz meltz'aj tu'n kyul tuj Jerusalén.