Read kumam 2 Crónicas 16 Bible Online

2 Crónicas 16 - kumam bible

2 Crónicas 16

¹Ex tej otoq b'ant 36 ab'q'i ttzyetlen tkawin rey Asa, xi' Baasa aju rey kye aj Israel ex ok tzoqpaj ti'j tnam Judá, ok tq'o'n muro ti'j tnam Ramá tu'ntzun mi jun tu'n tetz ex mi tu'n tokx tuj tx'otx' Judá jatum in kawin rey Asa.

²Etztzun ti'n Asa q'an pwaq ex saq pwaq, aju tokx tuj tja Dios ex tuj tex tja, xi t-sama'n tuk'il Ben-adad aju rey te Siria, aju najltoq tuj tnam Damasco. Ax ikx xi t-sama'n jun tqanil te kyja':

³E tb'ant ti'j jun qyol qkab'il ik tza'n kyb'incha qtzan qman ojtxi. Lu ma pon nsama'ne q'an pwaq ex saq pwaq te oyaj teya. Q'uchan kub'a aju yol o kyaj b'ant ti'j tu'na tuk'il Baasa aju rey kye aj Israel, tu'ntzun mi'n tq'ojin wi'je.

⁴Atzunte rey Ben-adad kub' tuj twitz aju tqanb'etz rey Asa, xitzun t-sama'n qe nejenel kye soldad tu'n kyok tzoqpaj kyi'j qe tnam kye aj Israel. Kyja'tzun e tzyet qe tnam lu tu'n: Ijón, Dan, Abel-maim ex kykyaqil qe tnam in che ajb'en te k'ub'l twitz awal tuj kytx'otx' aj Neftalí.

⁵Tejtzun tb'inte Baasa jlu xi tkolin tu'n tok tq'o'n muro ti'j tnam Ramá, ex b'i'x xi tkolin aq'untl.

⁶E tzajtzun ti'n rey Asa kykyaqil aj Judá ex xi kyi'n qe ab'j ex qe tze' ate' tuj tnam Ramá, aqeju otoq che ajb'en tu'n Baasa tu'n tok tq'o'n muro ti'j, ex kyu'ntzun qe ab'j ex qe tze' lu ok tq'o'n rey Asa muro ti'j tnam Geba ex Mizpa.

⁷Tuj tq'ijlalil lu pon Hanani, aju b'a'n nab'in tu'n Dios, tuk'il Asa aju rey tuj Judá ex xi tma'n te: Tu'nju ma tz'ok qe' tk'u'ja ti'j rey kye aj Siria ex mya ti'j Qman aju Tdiosa ma tzok qe' tk'u'ja, kyja'tzun ma che tzoqpaj qe t-soldad rey te Siria tuj tq'ab'a.

⁸Qe aj Etiopía ex qe aj Libia, ¿myapetzun nimxix kyajlal soldad lu tuk'ix nim kyajlal xjal kyjax kyib'aj chej kyuk'ix qe carwaj in che ajb'en tuj q'oj? Maske ikju axte Qman xi q'onte kye tuj tq'ab'a ex ok qe' tk'u'ja ti'j.

⁹Porke ate Qman in ke'yin ti'j tkyaqilju in b'aj twitz tx'otx' ex in xi tq'o'n kyipun qeju axix tok nno'k qe' kyk'u'j ti'j. Atzun teya minti' tnab'la tu'nju ma tb'inchaya jlu. Kyja'tzun texju ja'lo kukx k'okel mastl q'oj tuk'ila, chi Hanani.

¹⁰Atzunte Asa tzaj tq'oj ti'j Hanani, aju b'a'n nab'in tu'n Dios, ex okx tpresin. Ax ikx tuj tq'ijlalil lu e b'aj tyajla'n junjun xjal ate' tuj tnam.

¹¹Aju tx'olb'ab'en ti'j tb'inchb'en Asa atxix tej tqe' tkawb'il ex tejxi tpon b'aj, atzun tz'ib'an tuj libro jatum ta' tx'olb'ab'en kyi'j qe rey kye aj Judá ex kye aj Israel.

¹²Tej otoq b'ant 39 ab'q'i ttzyetlen tkawin Asa ok jun yab'il kyuwxix kyi'j qe tqan, ex tej tyab't minti' ok ten qanil onb'il te Qman, noq o'kx xi' kyuk'il qe q'anal.

¹³Kyimtzun Asa tej otoq b'ant 41 ab'q'i ttzyetlen tkawin,

¹⁴ex okx maqu'n tuj ju muqb'il aju otoq txi tma'n tu'n tb'aj b'incha'n tuj ju tnam tok tb'i Ttanmi David. Kub' q'o'n twitz jun tal watb'il nojni tu'n perjum ex tu'n tkyaqil txkaj tk'ok'jal tb'anilxix wen, ex kub' kyq'o'n jun nintz q'aq' te nimb'ilte.