Read kumam 2 Crónicas 18 Bible Online

2 Crónicas 18 - kumam bible

2 Crónicas 18

¹Knet nimxix tq'inumab'l Josafat, ax ikx jaw nimsa'n kyu'n xjal ex ok te at t-xilen tuk'il Acab, ex moje' jun tky'ajal tuk'il jun tme'jel Acab.

²Tb'ajlenxi junjun ab'q'i, xi' Josafat tuj Samaria visitaril te Acab; atzunte Acab kub' tb'yo'n nim ẍne'l ex nim wakẍ te tchi' Josafat ex te kychi' qe tuk'il, ex xi tma'n Acab te Josafat qa jaku txi' tuk'il tu'n kyok tzoqpaj ti'j tnam Ramot aju at tuj tx'otx' Galaad.

³Xitzun tqanin Acab aju rey kye aj Israel te Josafat aju rey kye aj Judá kyja': —¿Jakupe txi'ya wuk'ile tu'n qok tzoqpaj ti'j tnam Ramot aju at tuj Galaad? Atzunte Josafat xi ttzaq'we'n: —Aqine ex qe nsoldadiye lu qo'ye lu te onil teya ex te onil kye qe t-xjalila, jaku qo'xe tuk'ila tuj q'oj.

⁴Ax ikx xi tma'n: Pero na'nxtoq tb'ant jlu qu'n, qaninxa te Qman qa b'a'n tu'n qxi'.

⁵Atzunte rey kye aj Israel e ok tchmo'n qe xjal otoq tz'ok tq'o'n kyoklen ik tza'n t-sanjel Dios, attoq kyaje syent kyb'aj, xitzun tqanin kye kyja': —¿B'a'npe tu'n qok tzoqpaje ti'j tnam Ramot aju at tuj Galaad, ex qa mya b'a'n? Atzun kye tzaj kytzaq'we'n: —Tok tzoqpaja ti'j porke kb'el ti'j tu'na tu'n tipumal Dios.

⁶Atzunte Josafat xi tqanintl te Acab: —¿Minti'pe juntl mer t-sanjel Dios at tzalu tu'n t-xi qqanin te?

⁷Atzunte rey kye aj Israel xi ttzaq'we'n te Josafat: —Atx juntl b'a'n tu'n t-xi qqanin te alkye tajb'il Qman. Atzun Micaías aju tky'ajal Imla, ex aju xjal lu ik'un wu'ne, porke minti' in tzaj tma'n jun yol b'a'n weye, noq o'kx yol mya b'a'n in tzaj tma'n weye tkyaqil maj. Atzunte Josafat xi tma'n te: —Mi'n tmaya ikju, tat Rey.

⁸Tzajtzun ttxko'n rey kye aj Israel jun xjal at toklen ttxlaj ex xi tma'n te kyja': —Txka'tza Micaías aju tky'ajal Imla tu'n tul naj tzalu.

⁹Tza'nx te rey kye aj Israel, ax ikx te Josafat aju rey kye aj Judá, toksa'n t-xb'alun rey kyi'j, ex q'uqlqe tuj kyq'uqb'il te kawb'il ttxa'n pe'n ttzi tlamel tnam Samaria, ex kykyaqil qeju otoq tz'ok q'o'n kyoklen mer ik tza'n t-sanjel Dios in kychik'b'a'n aju nnu'l tuj kynab'l kywitz qe kab'e rey lu.

¹⁰Atzunte Sedequías aju tky'ajal Quenaana otoq b'aj tb'incha'n jun k'uxb'il mer ik tza'n tkach wakẍ tten, ex in jawtoq tq'ajq'ajel twi' kyja': Chitzun Qman ma tma: Atzun qe kach lu che ajb'el tu'na tu'n tok tzoqpaja kyi'j aj Siria okxi kykub' b'aj tu'na.

¹¹Kykyaqil qeju otoq tz'ok q'o'n kyoklen mer ik tza'n t-sanjel Dios ax yol in kyma'n; che chi in kyma'n te rey kyja': Tok tzoqpaja ti'j tnam Ramot aju at tuj Galaad, ex kb'el ti'j tu'na, porke ate Qman ktzajel q'onte tnam lu tuj tq'ab'a tu'n tkub' ti'j tu'na.

¹²Atzunju sanjel otoq txi sama'n txkolte Micaías xi tma'n te: —Kykyaqil t-sanjel Dios ma txi kyma'n jun yol puro b'a'n te rey. Kyja'tzun in chin kub'sane twitza tu'n t-xi tma'na ax yol ik tza'nx ma kyma kykyaqil, tu'n t-xi tma'na jun yol puro b'a'n te.

¹³Atzunte Micaías xi ttzaq'we'n: —Kxel nma'ne jun yol axix tok twitz Qman; o'kx kxel nma'ne aju yol ktzajel tma'n Qman weye.

¹⁴Pontzun Micaías twitz rey ex xi tqanin rey te: —Micaías, ¿b'a'npe tu'n qok tzoqpaje ti'j tnam Ramot aju at tuj Galaad ex qa mi'n? Atzunte Micaías xi ttzaq'we'n: —Kyok tzoqpaje ti'j ex kb'el ti'j kyu'ne, tu'nju axte Qman k'onil kyeye tu'n tkub' ti'j kyu'ne.

¹⁵Atzunte rey xi tma'n: —¿Jte' maj kxel nma'ne teya tu'n ttzaj tma'na weye jun yol axix tok twitz Qman?

¹⁶Atzunte Micaías xi tma'n: Ma che wile kykyaqil aj Israel kysputun kyib' kyxol qe witz, mer ik tza'n qe ẍne'l minti' pastor kyi'j. Ex chi Qman, ma tma: Minti' kye jlu kyajwil; teyle junjun b'a'n tu'n taj tja tuj tzalajb'il.

¹⁷Xitzun tma'n rey kye aj Israel te Josafat: —¿Baqa minti' ma txi nma'ne teya ti'j xinaq lu minti' in tzaj tma'n jun yol b'a'n weye, o'kx ju yol mya b'a'n in tzaj tman?

¹⁸Ex tmatl Micaías: —Kyja'tzun kyb'intze aju tyol Qman: Ma wile Qman q'uql tuj tq'uqb'il kyuk'ix kykyaqil qeju ate' tuj kya'j nim kyajlal, wa'l qe junx tuk'il tuj tb'anq'ab' ex tuj tnayaj.

¹⁹Ex chi Qman xi tqanin kye: ¿Alkye kxel to'yil te Acab aju rey kye aj Israel tu'n tok tzoqpaj ti'j tnam Ramot aju at tuj Galaad, ex atzun tu'n tkyim ma chixin? Chi Qman. At junjun tzaj kyma'n junjun tumlal ex junjuntl tzaj kyma'n juntl tumlal.

²⁰Ex minab'en pon jun xewb'aj twitz Qman ex tma: Jaku chinxe to'yil te Acab. Atzunte Qman xi tqanin te tza'n tten tu'n ttenb'a tu'n.

²¹Atzunte xewb'aj xi ttzaq'we'n: Chin xe'le ex wu'ne che yolil nik'aj yol kykyaqil qe xjal o tz'ok tq'o'n Acab kyoklen mer ik tza'n t-sanjela. Xitzun tma'n Qman te: Kb'el ti'j tnab'l tu'na, txi'ya ex b'inchama ikju, chi Qman te xewb'aj.

²²Atzun ja'lo ma tzaj tq'o'n Qman jun xewb'aj nik'al yol tu'n tyolin tuj kytzi' qe xjal o tz'ok tq'o'na kyoklen ik tza'n t-sanjel Dios ex ma tma Qman tu'n tnaja, chi Micaías.

²³Atzunte Sedequías aju tky'ajal Quenaana pon ttxlaj Micaías, ok ttz'ajan jun twitz Micaías ex tma: —¿Baqa ma tz'el tpa'n tib' T-xew Qman wi'je tu'n tyolin tuk'ila?

²⁴Atzunte Micaías xi ttzaq'we'n: —K'elel tnik'a ti'j tuj q'ij ok t-xi'ya ewal tib'a tujile kyja xjal.

²⁵Xitzun tma'n rey Acab kye aj sanjelal: —Kytzyuntze Micaías ex kyi'nxe twitz Amón aju kawil tuj tnam, ex twitz Joás aju nky'ajale, tu'n tokx tuj pres.

²⁶Kymanxe kye qa aqine ma chin q'mante tu'n tokx tuj pres, ex kymanxe tu'n t-xi q'ot noq ch'in twa ex noq ch'in tk'a' a' okxi wul meltz'aje tuj txub'txaj otoq chin kamb'ane tuj q'oj.

²⁷Atzunte Micaías xi tma'ntl: Qatzun b'a'n ma tzul meltz'aja tuj q'oj, myatzun a Qman otoq yolin wuk'ile ti'j ju yol ma txi nma'ne teya. Ax ikx xi tma'ntl: Kyb'inxe aju yol ma txi nma'ne kyeye, aqeye tnam xjal, chi Micaías.

²⁸Kyja'tzun ate Acab aju rey kye aj Israel, tuk'ix Josafat aju rey kye aj Judá, e je'x q'ojlel ti'j tnam Ramot aju at tuj Galaad.

²⁹Aju rey kye aj Israel xi tma'n te Josafat kyja': —K'elel nch'expu'ne nxb'alune tu'ntzun mi'n tel nik'b'aj wi'je ok nq'ojine, atzun teya b'a'n tu'n tok tq'o'na t-xb'alun rey ti'ja. Eltzun tch'expu'n Acab t-xb'alun tu'n mi'n tel nik'b'aj ti'j, ex tzyettzun q'oj kyu'n.

³⁰Ex ate rey kye aj Siria otoq txi tma'n kye qe capitán kye qe tcarwaj in che ajb'en tuj q'oj, o'kx tu'n kyok tzoqpaj ti'j rey kye aj Israel, ex mya ti'j junxitl.

³¹Tejtzun tilwaj Josafat kyu'n qe capitán, aqeju ate'kx tuj carwaj in che ajb'en tuj q'oj, kub' kyximan qa atzun rey kye aj Israel jlu, ex b'aj kytxolb'an kyib' tu'n kyok tzoqpaj ti'j, atzunte Josafat jaw sch'in, ex ate Dios o onin te, e el tlaq'b'a'n Dios qe aj q'oj ti'j.

³²Tejtzun tel kynik' qe capitán ti'j qa mya a rey kye aj Israel jlu, ya minti'tl e ok lpe' ti'j tu'n tkub' kyu'n.

³³Ex at jun soldad aj Siria noq elaj xi t-xo'n jun plech, ex tk'ulb'aku a Acab aju rey kye aj Israel a'w tu'n, ex atzun xi' ju plech jatum okni moje' chikyet k'uxb'il tok ti'j. Xitzun tma'n rey Acab teju yukul tcarwaj: —Chux q'on welt carwaj tu'na, ex chin ti'n exa tzalu tuj q'oj, porke nim weye ma tza'w, chi Acab.

³⁴Kyuwxix q'oj ok tuj q'ij lu, atzunte rey kye aj Israel ax kub' wa'lb'a'n tuj tcarwaj kywitz aj Siria tejxi tok qax. Tej ch'ixtoq tex q'ij kyimtzun.