Read kumam 2 Crónicas 19 Bible Online

2 Crónicas 19 - kumam bible

2 Crónicas 19

¹Tuj txub'txaj ajtz meltz'aj Josafat aju rey kye aj Judá, ex ul tja tuj Jerusalén.

²Ex ate Jehú aju b'a'n nab'in tu'n Dios, aju tky'ajal Hanani, xi' kanul ti'j rey Josafat ex xi tqanin te kyja': ¿Tiqu'n ma onina ti'j ju xjal mya b'a'n ex ma tz'ok tmojb'an tib'a kyuk'il qe xjal in che ik'un ti'j Qman? Kyja'tzun tu'n tlaj jlu, ma tzaj tq'oj Qman ti'ja.

³Maske ikju, pero at junjun b'a'n ma tb'inchaya, porke ma che kub' t-xituna qe tilb'ilal xu'j dios Asera, aqeju ate'toq tuj tx'otx' Judá, ex ma tz'ok tilil tu'na tu'n tb'ant tajb'il Dios, chi Jehú.

⁴Atzun najltoq Josafat tuj Jerusalén, ex in xi ajtoq visitaril kye t-xjalil, xi'ynix tuj Beerseba ex ponin b'aj max tuj tiwitz tx'otx' kye aj Efraín, tu'n tajtz ti'j kyanmi xjal tu'n tuk'il Qman aju Kydios qtzan kyxe'chel.

⁵Ax ikx e ok tq'o'n qe jwes kyuj kykyaqil tnam tok muro kyi'j at tuj Judá.

⁶Ex xi tma'n kye qe jwes kyja': Kyq'o'nke kwent ti'j ju kb'antel kyu'ne, porke mya kyu'n xjal ma tz'ok q'o'n kyoklene, noq o'kx tu'n Qman aju ktel kyuk'ile ok tb'ant ti'j xtis kyu'ne.

⁷Kyja'tzun, tenx tchiylal Qman kyeye ex ten kykwente ti'j ju kb'antel kyu'ne, porke minti' in tzalaj aju Qdios qa mya tuj tumel kxel kyb'incha'ne kyi'j xjal, qa ma tz'ok kyq'o'ne kywitze ti'j t-xilen xjal ex qa in xi kyk'mo'ne pwaq tu'n mi'n tkub' kysentens xjal kyu'ne.

⁸Ex e ok tq'o'n Josafat junjun aj Leví, junjun pal ex junjun nejenel kyxol aj Israel tuj Jerusalén, tu'n kyajb'en tuj taq'un Qman ex tu'n t-xi kyb'incha'n ti'j q'oj kyxol xjal tuj Jerusalén. Kykyaqil qe jlu ax najlqe tuj Jerusalén.

⁹Ex xi tma'n kye alkye tu'n tb'ant kyu'n, chi kyja': Che nimane te Qman tuj tkyaqilju ok kyb'incha'ye, japunx tyol kyu'ne ex che oke tz'aqlxix.

¹⁰Qa ma che tzaj qe kyxjalile kyuj noq alkyex kytanmi tu'n kyul xtisil kywitze tu'n tlaj otoq kub' kyb'yo'n jun xjal, ex qa ma che ul xjelil ti'j tley Dios, ex qa ti'j xnaq'tzb'il, ex qa kyi'j mandamyent, ex qa ti'j kawb'il, kychik'b'anxe kye alkye tu'n tb'ant kyu'n, tu'n mi'n kyb'inchan il twitz Qman Dios, tu'ntzun mi'n ttzaj tq'oj kyi'je ex kyi'j xjal. Kyb'inchame jlu tu'ntzun minti' kyile twitz Qman.

¹¹Aju tnejel pal Amarías, atzunju mas ma' toklen ktel kyxole tu'n tb'aj nuk'et ti'j tu'n tjapun tajb'il Dios kyu'n xjal, atzunte Sebadías aju tky'ajal Ismael, aju nejenel kyxol qe tiyjil Judá, atzunju mas ma' toklen ktel kyxole tu'n t-xi b'inchet tu'n tjapun tley rey kyu'n xjal, ex atzun qe aj Leví che onil kyi'je. Tenx kyipune ex kytzyume aq'untl lu ex awt Qman ten kyuk'ile qa ma che aq'nane tuj tumel.