Read kumam 2 Crónicas 20 Bible Online

2 Crónicas 20 - kumam bible

2 Crónicas 20

¹Tb'ajlenxi jlu e ok tzoqpaj aj Moab ex qe aj Amón ti'j Josafat, kyuk'ix junjun aj Meunitas;

²e je'xtzun junjun q'ol tqanil tuk'il Josafat ex xi kyma'n te kyja': Lu che ul txqan soldad aj Edom ma che tzaj jlajxi mar at nim atz'an tuj, nimxix kyajlal wen. Lu qe ma che ul tuj Hazezón-tamar (aju ax juntl tb'i En-gadi).

³Tzajtzun t-xob'il Josafat, ok ten qanil onb'il te Qman ex xi tma'n kye kykyaqil xjal aj Judá tu'n tkub' kyyo'n we'yaj,

⁴atzun qe xjal najlqe kyuj kykyaqil tnam at tuj Judá e tzaj ex ok kychmon kyib' tu'n t-xi kyqanin onb'il te Qman.

⁵Kub'tzun we' Josafat kywitz kykyaqil tnam xjal aj Judá, aqeju otoq tz'ok kychmon kyib' tuj Jerusalén tuj ak'aj ttxa'n pe'n twitz tja Qman,

⁶ex tmatzun Josafat kyja': Aya Qman aju Kydios qtzan qxe'chele, aya Dios tuj kya'j, aya in kawin kyib'aj kykyaqil nasyon; ma' toklena ex nim tipumala, mi a'l jun xjal jaku xkye' ti'ja.

⁷Qman Dios, aya ex lajonte kye xjal aqeju najlqetoq tuj tx'otx' lu kywitz aj Israel aqeju etzan tu'na, ex xi tq'o'na tx'otx' te jumajx kye tiyjil Abraham aju tamiwoya.

⁸Tejtzun kynajan tuj tx'otx' lu jaw kyb'incha'n jun ja te nab'l tb'iya ex kyma:

⁹Qa ma tzaj mya b'a'n qib'aje te qcastiwoye, qa q'oj, qa tx'u'j yab'il ex qa we'yaj, qo ule twitz ja lu, ex atzun ta'ya tuj, ex tuj ju yajb'il qeye kxel qqanine onb'il teya, atzun teya qo tzajel tb'i'na ex qo kletele tu'na.

¹⁰Tej kyetz aj Israel tuj Egipto minti' taq'a amb'il kye tu'n kyik'tz tuj kytx'otx' aj Amón, tuj kytx'otx' aj Moab ex tuj kytx'otx' qeju najlqe tuj tiwitz tx'otx' Seir, noq o'kx el kypa'n kyib' aj Israel kyi'j ex minti' e naj kyu'n.

¹¹Atzun ja'lo te t-xel ju b'a'n o kyb'incha aj Israel kyi'j, ma che ul tu'n kyok tzoqpaj qi'je, tu'n qex lajo'ne kyu'n tuj ju tx'otx' tzaj tq'o'na te qetzb'ile.

¹²Qman Dios, ¿maj mi'n kub' tq'o'na kycastiw? Ex qeye minti' qipune tu'n qq'ojine kyuk'il qe soldad lu nimxix kyb'aj wen, aqeju ma che ul q'ojlel qi'je. Minti' b'a'n qu'ne alkye kb'antel qu'ne, ex ma tz'ok qe' qk'u'je ti'ja, chi Josafat.

¹³Kykyaqil aj Judá wa'l kykub'toq twitz Qman, kyuk'ix qe kyxu'jil, qe kyk'wa'l, ex kyuk'ix qe tal k'wa'l mas tal ch'in qe.

¹⁴Tujtzun ju b'uyj tib'il lu, ul T-xew Qman tuk'il jun xjal aj Leví, Jahaziel tb'i, aju tky'ajal Zacarías; ate Zacarías tky'ajal Benaía, atzunte Benaía tky'ajal Jeiel, ex atzunte Jeiel tky'ajal Matanías aju tiyjil Asaf,

¹⁵ex tma Jahaziel: Kyb'intze, aqeye xjal aj Judá ex aj Jerusalén, ex tuk'ixa aya rey Josafat; chi Qman in tma'n kyeye kyja': Mi'n che xob'e ex mi'n che jaw sek'paje kywitz qe soldad lu nimxix kyajlal, porke tuj q'oj lu mya aqeye che q'ojel, ate Dios kq'ojel.

¹⁶Nchi'j b'ix che ku'xe tu'n kyok tzoqpaje kyi'j. Ok kyjatz twitz jawl tuj lugar Sis, atzun k'okel kyk'ulb'an kyib'e kyuk'il tuj tq'ab' xaq aju tkub' twitz lugar tzqij tx'otx' Jeruel.

¹⁷Mya aqeye che q'ojel tuj q'oj lu, noq o'kx b'ix txi kytxolb'an kyib'e, ex b'ix che kub' txule'ye, ex ok kyila'ye tza'n tten che kletele tu'n Qman. Aqeye aj Jerusalén ex aj Judá, mi'n tzaj kyxob'ile ex mi'n che jaw sek'paje. Kyq'onkuye b'e nchi'j tu'n kyok tzoqpaje kyi'j, porke ate Qman ktel kyuk'ile, chi Jahaziel.

¹⁸Atzunte Josafat kub' ẍmeje' ex kub' mok'e' tejxi tpon takl tib'aj twitz max twitz tx'otx', ax ikx o kyb'incha kykyaqil xjal aj Judá ex aj Jerusalén, e kub' ẍmeje' twitz Qman tu'n kyk'ulun te.

¹⁹Ex qe aj Leví, aqeju tiyjil Coat, kyuk'ix qe tiyjil Coré, e kub' we' ex jaw tq'ajq'ajel kywi' kyuwxix wen in kynimsa'n tb'i Qman aju Kydios aj Israel.

²⁰Tujtzun juntl q'ij e jaw we' primxix wen tu'n tkub' b'e kyu'n tu'n kypon tuj lugar tzqij tx'otx' Tecoa. Ex na'nxtoq kyex, kub' we' Josafat kywitz ex xi tma'n qe yol lu kye: Chin kyb'intze aqeye xjal aj Jerusalén ex aj Judá: Qe'k kyk'u'je ti'j Qman aju Kydiose, oktzun che tele tuj segur; qe'k kyk'u'je kyi'j qe t-sanjel Dios, ex tkyaqil k'elel b'a'n kyeye.

²¹Tb'ajlenxitzun yolin Josafat kyuk'il xjal, e jaw t-sk'o'n junjun xjal tu'n kyb'itzan, tok kyxb'alun xjansa'maj, ex tu'n kykub' nej kywitz qe soldad in kynimsa'n tb'i Qman tuk'il b'itz kyja': Kyq'onxe chjonte te Qman porke aju tk'ujlalil kukx in ten te jumajx.

²²Ex tejtzun ttzyet kyb'itzan qe b'itz te nimb'il tb'i Qman, b'aj ttzpet-sa'n Qman kynab'l aj Amón ex aj Moab, ex qeju najlqe tuj tiwitz tx'otx' Seir, aqeju kyja' kytzaj tu'n kyok tzoqpaj kyi'j aj Judá, ax b'aj kyb'yon kyib' kyxolx.

²³Porke qe aj Amón ex qe aj Moab e ok tzoqpaj kyi'j qe xjal najlqe tuj tiwitz tx'otx' Seir ex e kub' b'aj kyb'yo'n kykyaqil, ex tb'ajlenxi kyb'yo'n qe, ax ikx kye kub' kyb'yon kyib' kyxolx.

²⁴Tejtzun kypon aj Judá twi witz, ku'x kyke'yin tuj tzqij tx'otx' ex o kyil nimxix kyximlal aj q'oj kyi'j tx'ilch qe twitz tx'otx', kyimni qe, ex mi jun otoq tzoqpaj.

²⁵Xi'tzun Josafat kyuk'ix qe t-soldad q'ilte ju q'i'ntoq kyu'n aj q'oj ex knet nimku q'inumab'l kyu'n, ik tza'n qe chej, qe makb'il in che ajb'en tuj q'oj, qe xb'alun ex nimku txqantl ti'xti wi'yilxix, ex e ok te tajwil tkyaqil. Tu'nju nimku ti'xti at, minti' b'ant tq'injtz kyu'n. Ox q'ij e ten in che q'in kyi'j qe ti'xti, porke attoq nim.

²⁶Tujtzun tkyajin q'ij ok kychmon kyib' tuj chq'ajlaj Beraca, ex atzun jaw kynimsa'n tb'i Qman. Kyja'tzun ok kyq'o'n tb'i lugar lu chq'ajlaj Beraca,[1] ex axtzun tb'i tok ja'lo.

²⁷Te tib'ajxitzun jlu, kub' nej Josafat kywitz kykyaqil aj Judá ex aj Jerusalén, ex e ajtztzun meltz'aj tu'n kyul tuj Jerusalén in che tzalaj wen, porke ate Qman otoq tzaj q'onte tzalajb'il kye, tu'nju otoq che klet tu'n tuj kyq'ab' aj q'oj kyi'j.

²⁸Tejtzun kyul tuj Jerusalén e pon twitz tja Qman tuk'il tq'ajq'ajel twi chnab' arpa, kitar ex chun.

²⁹Ex kykyaqil qe nasyon ate' kyi'jele aj Israel tzaj nim kyxob'il twitz Qman Dios, tej kyb'inte qa otoq q'ojin kyuk'il aj q'oj kyi'j aj Israel.

³⁰Kyja'tzun tej tkawin rey Josafat, qe xjal o che ten tuj txub'txaj, porke ate Dios tzaj q'onte xtalb'il kyib'aj ex minti'tl e q'ojin qe txqantl nasyon kyi'j.

³¹Kyja'tzun tten o kawin Josafat kyib'aj tiyjil Judá. Toktoq twi' 35 ab'q'i tej ttzyet tkawin ex o kawin 25 ab'q'i tuj Jerusalén. Aju ttxu' Josafat Azuba tb'i ex tme'jel Silhi.

³²Tuj tumelxix o b'et Josafat ik tza'n te Asa aju qtzan tman, minti' el tpa'n tib' ti'j b'e xi ti'n qtzan tman. Aqeju tb'inchb'en puro b'a'n e ela tuj twitz Qman.

³³Maske ikju, pero minti' kyaj kykolin xjal qe lugar jatum in che k'ulun kywi' qe witz, tu'nju na'nxtoq tkub' kyximan xjal tu'n kyniman te Kydios qtzan kyxe'chel tu'n tkyaqil kyanmi.

³⁴Aju ch'intl tx'olb'ab'en ti'j tb'inchb'en Josafat, atxix tej tqe' tkawin ex tejxi tpon b'aj, atzun tz'ib'an tuj libro kub' ttz'ib'an Jehú aju tky'ajal Hanani, ex atzun tz'ib'an tuj libro kye qe rey kye aj Israel.

³⁵Tb'ajlenxi jlu, o moje' tyol Josafat aju rey kye aj Judá tuk'il Ocozías aju rey kye aj Israel, ex ate Ocozías mya b'a'n tb'inchb'en.

³⁶Ok tmojb'an tib' tuk'il tu'n tkub' kyb'incha'n qe barc tu'n kyxi' tuj tnam Tarsis, ex atzun kub' kyb'incha'n tuj tnam Ezión-geber.

³⁷Atzunte Eliezer aju aj Maresa, aju tky'ajal Dodava, xi tma'n te Josafat alkye tu'n tb'aj ti'j te tib'ajxi: Kb'ajel tpaẍu'n Qman aju ma b'aj tb'incha'na tu'n tlaj ma moje' tyola tuk'il Ocozías, chi Eliezer. Atzun qe barc e kub' q'uchj ex ya minti' e je'x tuj tnam Tarsis.