Read kumam 2 Crónicas 21 Bible Online

2 Crónicas 21 - kumam bible

2 Crónicas 21

¹Kyimtzun Josafat ex ku'x maqu'n tuj tnam tok tb'i Ttanmi David aju qtzan t-xe'chel, ex aju kyaj ten te rey te t-xel, atzun Joram aju tky'ajal.

²Qe terman Joram, aqeju ax tky'ajal Josafat qe, atzun qe jlu: Azarías, Jehiel, Zacarías, Azarías, Micael ex Sefatías. Kykyaqil qe jlu tky'ajal Josafat qe, aju rey kye aj Judá.

³Otoq txi tq'o'n kyman nimku oyaj kye; xi tq'o'n q'an pwaq, saq pwaq ex txqantl ti'xti wi'yilxix, ax ikx xi tq'o'n junjun tnam kye, aqeju tok muro kyi'j ate' tuj Judá, ex aju kawb'il xi tq'o'n te Joram ex atzun nej tky'ajal.

⁴Tejtzun tkyuwset Joram tuj tkawb'il e kub' tb'yo'n kykyaqil qe terman tu'n spad, kyuk'ix junjun nejenel kye aj Israel.

⁵Toktoq twi' 32 ab'q'i tej ttzyet tkawin ex o kawin wajxaq ab'q'i tuj Jerusalén.

⁶Ok lpe' ti'j kyb'inchb'en qe rey kye aj Israel ex ti'j tb'inchb'en rey Acab ex qe tiyjil, porke o moje' tuk'il jun tme'jel Acab, kyja'tzun mya b'a'n e ela qe tb'inchb'en Joram tuj twitz Qman.

⁷Ex minti' o tajb'e Qman tu'n kynaj qe tiyjil David, tu'n tlaj ju yol otoq tzaj ttziyan te David tu'n kukx tu'n kyjaw sk'et qe tiyjil tu'n kyok te rey.

⁸Tuj tq'ijlalil tej tkawin Joram jaw kyi'n kyib' aj Edom kyi'j aj Judá, el kypa'n kyib' ex ok kyq'o'n jun kyex kyrey.

⁹Atzunte Joram xi' kyuk'il tcapitán ex kyuk'ix kykyaqil qe tcarwaj in che ajb'en tuj q'oj, ex b'aj kytxolb'an kyib' aj Edom kyi'jele ex tujxtzunju qonik'an lu jaw we' Joram kyuk'ix qe capitán kye tcarwaj, e oktzun tzoqpaj kyi'j aj Edom ex kub' kyi'j kyu'n.

¹⁰Maske ikju, pero e etz aj Edom tjaq' tkawb'il Judá, ex kytenx ja'lo. Ex tujx tq'ijlalil lu etz tnam Libna tjaq' tkawb'il Judá, tu'nju otoq kyaj tkolin Joram Qman aju Kydios qtzan t-xe'chel.

¹¹Ax ikx e jaw tb'incha'n Joram qe lugar kywi' qe witz tuj Judá jatum tu'n kyk'ulun qe xjal kywitz qe tilb'ilal, ex tu'ntzun jlu el kypa'n kyib' aj Jerusalén ex aj Judá ti'j Qman.

¹²Tk'amtzun Joram jun u'j tu'n Elías aju t-sanjel Dios, ex chi u'j in tma'n: Ate Qman aju Tdios David aju qtzan t-xe'chela in tma'n teya kyja': Minti' ma tz'ok lpe'ya ti'j tb'inchb'en Josafat aju qtzan tmana ex ti'j tb'inchb'en rey Asa aju qtzan tchmana,

¹³noq o'kx ma tz'el tkano'na ti'j kyb'inchb'en qe rey kye aj Israel, ex tu'n tlaja ma tz'el kypa'n kyib' qe xjal aj Judá ex aj Jerusalén ti'j Qman, ik tza'n o tb'incha Acab ex qe tiyjil. Ax ikx o che kub' tb'yo'na qe termaniya, aqeju mas b'a'n kymod twitza.

¹⁴Kyja'tzun kb'el tq'o'n Qman jun nintz k'ixb'isab'l kyib'aj qe t-xjalila, kyib'aj qe tk'wa'la, kyib'aj qe t-xu'jila ex tib'aj tkyaqilju at teya.

¹⁵Ex atzun teya ktzajel jun yab'il ti'ja minti' q'anb'il ti'j. K-yab'tela tu'n tk'u'ja ex ok che b'ajel q'ay qe t-xq'iltxa'ya, chi Elías tuj tu'j.

¹⁶Tu'n Qman tzaj kyq'oj aj Filisteo ex aj Arabia ti'j Joram, aqe jlu kyvesin kyib' kyuk'il aj Etiopía;

¹⁷kub'tzun b'e kyu'n ex e ok tzoqpaj kyi'j aj Judá, xi kyi'n tkyaqil q'inumab'l knet kyu'n tuj tja rey, xi kyi'n qe tk'wa'l ex qe t-xu'jil. O'kxku jun tk'wa'l kyaj klet, Ocozías tb'i, aju ch'i'p.

¹⁸Te tib'ajxi tkyaqil jlu kub' tq'o'n Qman tcastiw Joram, o yab't tu'n tk'u'j, minti' q'anb'il ti'j.

¹⁹Eltzun q'ij ex tej tb'ant kab' ab'q'i ttzyetlen tu'n yab'il, e b'aj q'ay qe t-xq'iltxa' tu'n yab'il ex kyimtzun tuk'il nimxix ta'w. Qe t-xjalil minti' kub' kyq'o'n jun nintz q'aq' te nimb'ilte ik tza'n otoq kyb'incha kyi'j qtzan t-xe'chel.

²⁰Toktoq twi' 32 ab'q'i tej ttzyet tkawin ex o kawin wajxaq ab'q'i tuj Jerusalén. Tej tkyim mi jun o b'isun ti'j. Ku'xtzun maqu'n tuj tnam tok tb'i Ttanmi David, ex minti' okx q'o'n tuj kypantyón qe rey.