Read kumam 2 Crónicas 22 Bible Online

2 Crónicas 22 - kumam bible

2 Crónicas 22

¹Ok kyq'o'n aj Jerusalén Ocozías aju tch'i'p Joram te rey te t-xel, tu'nju at jun k'loj eleq' otoq che ul aj junx kyuk'il aj Arabia, e okx tuj kycampament soldad, ex e kub' kyb'yo'n kykyaqil qe tky'ajal Joram aju rey kye aj Judá. Kyja'tzun ok Ocozías te rey te t-xel Joram aju qtzan tman.

²Otoq japun Ocozías twi' 22 ab'q'i tej ttzyet tkawin ex o kawin jun ab'q'i tuj Jerusalén. Aju ttxu' Ocozías Atalía tb'i, aju tal tchman Omri.

³Ok lpe' Ocozías ti'j tb'inchb'en Acab ex ti'j kyb'inchb'en qe tiyjil, ex xi tq'o'n ttxu' consej mya b'a'n te.

⁴Tb'incha Ocozías aju mya b'a'n tuj twitz Qman ik tza'n otoq tb'incha Acab ex qe tiyjil, ex tkyimlenxi qtzan tman, ax qe tiyjil Acab e ok ten consejaril te, ex tu'n jlu tzaj mya b'a'n tib'aj.

⁵Ex tu'ntzun kye kyconsej, moje' tyol Ocozías tuk'il Joram aju tky'ajal Acab aju rey kye aj Israel, tu'n kyok tzoqpaj ti'j Hazael aju rey kye aj Siria, tuj Ramot aju at tuj Galaad. Ex ok k'ixb'isa'n Joram kyu'n aj Siria.

⁶Ajtzun meltz'aj Joram tuj Jezreel tu'n tq'anit aju ẍil otoq tiqa tuj Ramot tej tok q'oj kyu'n tuk'il Hazael aju rey kye aj Siria. Tu'nju otoq k'ixb'i Joram, kyja'tzun xi' Ocozías visitaril tuj Jezreel.

⁷B'animaj ti'j tu'n Dios tu'n tkyim Ocozías ok t-xi' visitaril Joram. Tejtzun tpon, e je'tz tuk'ix Joram kanul ti'j Jehú aju tky'ajal Nimsi, ex axte Dios otoq jaw sk'onte Jehú tu'n kykub' b'aj tb'yo'n qe tiyjil Acab.

⁸Tej in jyontoq Jehú kyi'j qe tiyjil Acab tu'n kykub' tb'yo'n, e knet qe nejenel tuj Judá tu'n, ex qe xjal at kyxilen tuk'il Ocozías, aqeju in che ajb'entoq ttxlaj, ex e kub' b'yo'n qe jlu tu'n Jehú.

⁹Ax ikx xi tma'n tu'n t-xi joyb'aj Ocozías, atzun otoq txi tewan tib' tuj Samaria, tzyettzun kyu'n ex xi kyi'n twitz Jehú ex kub' kyb'yo'n. Ku'xtzun kymaqu'n ex kyma kyja': A jlu tal tchman Josafat aju o jyon ti'j Dios tu'n tkyaqil tanmi. Kyja'tzun kyxol qe tiyjil Ocozías minti' jun kyaj ten otoq tz'ok tipun tu'n tkawin te t-xel.

¹⁰Tejtzun tb'inte Atalía aju ttxu' Ocozías qa otoq kyim tal, xi tma'n tu'n kykub' b'yo'n kykyaqil qe kyiyjil rey tuj Judá.

¹¹Ex ate Josaba aju tme'jel qtzan rey Joram etz q'i'n Joás tu'n kyxol txqantl tky'ajal rey Ocozías, aqeju nib'antoq kykub' b'yo'n, el tewan twitz Atalía ex atzun okx tq'o'n tuj jun tal cuart junx tuk'il ju xu'j kwentil te. Kyja'tzun minti' kub' b'yo'n. Atzun jlu o b'ant tu'n Josaba aju tme'jel qtzan rey Joram. Ate Josaba tanb' qtzan Ocozías ex t-xu'jil pal Joiada.

¹²Atzun okx ewan Joás qaq ab'q'i tuj tja Dios junx kyuk'il kab'e xu'j lu. Tujtzunju qaq ab'q'i lu o kawin Atalía kyib'aj aj Judá.