Read kumam 2 Crónicas 24 Bible Online

2 Crónicas 24 - kumam bible

2 Crónicas 24

¹Toktoq Joás twi' wuq ab'q'i tej ttzyet tkawin ex o kawin 40 ab'q'i tuj Jerusalén. Aju ttxu', Sibia tb'i ex aj Beerseba.

²B'a'n e ela qe tb'inchb'en Joás tuj twitz Qman, akux itz'xtoq pal Joiada.

³Tzaj tjyo'n Joiada kab'e t-xu'jil Joás, ex kyi'jtzun qe xu'j lu e tzaj qe tky'ajal ex qe tme'jel.

⁴Te tib'ajxi kub' t-ximan Joás tu'n t-xi tb'incha'n tja Qman.

⁵E ok tchmo'n qe pal ex qe aj Leví ex xi tma'n kye kyja': Kyxi'ye kyuj qe tnam ate' tuj Judá, ex kychmon jawe pwaq kyxol kykyaqil aj Israel, aju at tu'n tchjet kyu'n tkyaqil ab'q'i, tu'ntzun t-xi b'inchet tja Dios. Kyq'o'nke tilil ti'j jlu, chi Joás; atzun kye aj Leví minti' ok kyq'o'n tilil.

⁶Tzajtzun txko'n Joiada aju tnejel pal tu'n rey, ex xi tma'n te kyja': —¿Tiqu'n minti' nno'k il ti'j tu'na tu'n ttzaj kyi'n qe aj Leví kyoyaj xjal ate' tuj Judá ex tuj Jerusalén, aju kyaj b'ant ti'j tu'n Moisés aju tmajen Dios, kyuk'il aj Israel, tu'n tajb'en ti'j ja jatum k'u'n ju yol kyaj b'ant ti'j tu'n Dios kyuk'il? Chi rey.

⁷Porke ate Atalía, aju jumajx mya b'a'n tmod, kyuk'ix qe tal, otoq che okx tuj tja Dios ex otoq tz'etz kyelq'a'n tkyaqil ti'xti in che ajb'en tuj k'ulb'il, aqeju ate'kx tuj tja Dios, ex atzun ajb'en kyu'n kye qe tilb'ilal Baal, aju nno'k kydiosin.

⁸Xitzun tma'n rey tu'n tb'ant jun kax, ex kub' kyq'o'n tetz ti'jtzi tlamel tja Qman.

⁹Extzun tqanil kyu'n tuj tkyaqil tx'otx' Judá ex tuj tnam Jerusalén, tu'n ttzaj kyi'n xjal chojenj te Qman, aju otoq txi tma'n Moisés aju tmajen Dios kye aj Israel tuj lugar tzqij tx'otx'.

¹⁰Kykyaqiltzun qe nejenel ex kykyaqil tnam xjal e pon q'olte kyoyaj tuk'il tzalajb'il tuj kax, tejxi tnoj kyu'n.

¹¹Tkyaqil maj ok t-xi kyi'n aj Leví aju kax kyuk'il qe xjal at kyoklen ttxlaj rey tu'n tik' kywitz ti'j, ex oktzun kyke'yinte qa ya attoq nim pwaq tuj, in pontzun aju aj tz'ib'al te rey tuk'ix ju xjal at toklen tu'n tnejel pal, k'molte pwaq, in jatz kyi'n ex in xi kyi'n aju kax tu'n tkub' kyq'o'n juntl maj jatum tkub'. Kyja'tzun in b'ant kyu'n tkyaqil maj ex nimxix pwaq chmet kyu'n.

¹²Atzunte rey tuk'ix pal Joiada xi kyq'o'n pwaq lu kye qeju kykyajsa'n te nejenel ti'j aq'untl ti'j tja Qman, tu'n t-xi kychjo'n twi kyk'u'j qe albañil ex qe calpinter, tu'n t-xi kyb'incha'n tja Qman, ex tu'n kychjet qe majen b'a'n che aq'nan ti'j k'uxb'il ex ti'j q'an k'uxb'il, tu'ntzun t-xi kyb'incha'n tja Qman.

¹³Qe nejenel ti'j aq'untl e ok ten aq'nal kyuwxix ex b'aj kyb'incha'n tja Qman ik tza'nx tten tnejel, ex aju tja Qman kyaj ten tuj segurxix.

¹⁴Tejtzun tb'aj b'ant aq'untl kyu'n, aju pwaq kyaj ten xi kyi'n tuk'il rey ex tuk'il Joiada, ex atzun kye xi kyma'n tu'n kyb'aj b'inchet qe makb'il tu'n kyajb'en tuj tja Qman, tza'nx qe makb'il in che ajb'en ok kyok qe k'ulb'il, ax ikx qeju in che ajb'en tu'n kyxi q'ot qe chojb'il patun in che kub', ex qe pak' ex qe txqantl makb'il puro q'an pwaq ex saq pwaq kytx'otx'il. Akux itz'xtoq pal Joiada, kukx xi kyq'o'n ju chojb'il patun in kub' twitz tja Qman.

¹⁵Otoq tijin Joiada wen ex otoq tz'el nim ab'q'i tu'n. Otoq japun jun syent tuk'il 30 ab'q'i tu'n tej tkyim.

¹⁶Ku'xtzun kymaqu'n tuj tnam tok tb'i Ttanmi David, junx kyxol qe rey otoq che kyim, porke b'a'n otoq tb'incha kyuk'il aj Israel ex otoq tz'ajb'en tuj taq'un Dios ax ikx ti'j tja Dios.

¹⁷Tkyimlenxitzun Joiada e pon qe nejenel kye aj Judá tuk'il rey ex xi kyma'n tu'n kyniman te, atzunte rey xi tb'i'n aju o kyma,

¹⁸kyajtzun kykolin aju tja Qman aju Kydios qtzan kyxe'chel, ex e ok ten k'ulul kywitz qe tilb'ilal xu'j dios Asera ex kywitz txqantl tilb'ilal. Tu'ntzun jlu tzaj tq'oj Qman kyi'j aj Judá ex kyi'j aj Jerusalén.

¹⁹Kyja'tzun tzaj t-sama'n Qman qe t-sanjel kyuk'il, tu'n kyaj meltz'aj juntl maj tuk'il, ex qe xjal minti' xi kyb'i'n aju yol xi q'ma'n kye kyu'n t-sanjel Dios.

²⁰Ultzun T-xew Dios tuk'il Zacarías aju tky'ajal qtzan pal Joiada, kub' we' kywitz tnam xjal ex tma kyja': Chitzun Dios ma tma: ¿Tiqu'n minti' in xi kynimane qe nmandamyente? ¿Tiqu'n kyu'nxe in tzaj kyi'ne mya b'a'n kyib'aje? Tu'nju ma chin kyaj kykoline, ax ikx weye che kyjel nkoline chi Dios, chi Zacarías.

²¹Atzun kye xjal moje' kyyol tu'n kyok tzoqpaj ti'j Zacarías, ex xi tma'n rey tu'n tok kyxo'n tu'n ab'j ttxa'n tpe'n tja Qman.

²²Ik' tna'l tu'n rey Joás aju xtalb'il b'inchanjtz te tu'n Joiada aju qtzan tman Zacarías, ex kub' b'yo'n Zacarías aju tky'ajal Joiada tu'n Joás. Tej ch'ixtoq tkyim jaw tq'ajq'ajel twi' ex tma kyja': Awt Qman tzaj ke'yinte jlu ex tu'n t-xelin kyi'je ik tza'nx ma kyb'inchaye.

²³Tb'ajlenxi jun ab'q'i e ok tzoqpaj qe soldad aj Siria ti'j Joás, e okx tuj Judá ex tuj Jerusalén, kub' kyb'yo'n kykyaqil qe nejenel kye tnam xjal ex tkyaqil ti'xti ex kyi'n, xi kysama'n tuk'il rey kye aj Damasco.

²⁴Qe aj Siria nik'xi kyb'aj e pon, ex tu'n Qman kub' kyi'j txqan soldad nimxix kyb'aj kyu'n, tu'nju otoq tz'el kypa'n kyib' aj Judá ti'j Qman aju Kydios qtzan kyxe'chel. Kyja'tzun tten kub' tcastiw Joás.

²⁵Tejtzun kyaj meltz'aj aj Siria, ate Joás nim te otoq tza'w tuj q'oj, ex atzun qe xjal at kyoklen ttxlaj jaw kyi'n kyib' ti'j, tu'n t-xelin kyu'n tu'nju tkub'len tb'yo'n tky'ajal pal Joiada; kyja'tzun kub' kyb'yo'n ax twi twatb'il. Ku'xtzun maqu'n Joás kyu'n tuj tnam tok tb'i Ttanmi David, ex minti' okx q'o'n tuj kypantyón qe rey.

²⁶Aqeju jaw kyi'n kyib' ti'j Joás, atzun qe jlu: Zabad aju tal Simeat, aju aj Amón, ex Jozabad aju tal Simrit, aju aj Moab.

²⁷Aju yol tz'ib'an kyi'j qe tky'ajal Joás ex ti'j nimku yol o kyma qe t-sanjel Dios ti'j, ex ti'j tjawlen tb'incha'n tja Dios; tkyaqil jlu atzun tz'ib'an kyuj qe libro jatum ta' tkyaqil tx'olb'ab'en kyi'j kyaq'unb'en qe rey. Te tib'ajxi, aju o kawin te t-xel, atzun Amasías aju tky'ajal.