Read kumam 2 Crónicas 27 Bible Online

2 Crónicas 27 - kumam bible

2 Crónicas 27

¹Otoq japun Jotam twi' 25 ab'q'i tej ttzyet tkawin ex o kawin qaqlaj ab'q'i tuj Jerusalén. Aju ttxu', Jerusa tb'i ex tme'jel Sadoc.

²Qe tb'inchb'en Jotam b'a'n e ela tuj twitz Qman ik tza'nx qe tb'inchb'en Uzías aju qtzan tman, ex minti' okx patul storak tuj tja Dios ik tza'n tb'incha qtzan tman. Atzun qe tnam xjal kukx o kyb'incha mya b'a'n.

³B'aj tb'incha'n Jotam aju tlamel tkub' te jawni te tja Dios, ax ikx b'aj tb'incha'n aju muro tok ti'j tnam tumlal lugar Ofel tb'i.

⁴Ax ikx e jaw tb'incha'n qe tnam tuj tiwitz tx'otx' Judá ex e jaw tb'incha'n qe ja te kykolb'il kyib' xjal ex qe ja ma' kywa'l kyuj chk'ul.

⁵O q'ojin tuk'il rey kye aj Amón ex o kub' kyi'j tu'n. Tuj ab'q'i lu aju chojenj chjet kyu'n aj Amón, 75 quintal saq pwaq tuk'ix 37 mil quintal triw ex 37 mil quintal sebad. Ax tajlal jlu xi kyq'o'n tej tel tkab'in ex toxin ab'q'i.

⁶O ten nim tipumal Jotam porke o b'et tuj tumelxix twitz Qman.

⁷Aju ch'intl tx'olb'ab'en ti'j Jotam ex kyi'j kykyaqil qe q'oj e ok tuj tkwent ex kyi'j qe aq'untl e b'ant tu'n, atzun tz'ib'an tuj libro kye rey kye aj Israel ex kye aj Judá.

⁸Otoq japun Jotam twi' 25 ab'q'i tej ttzyet tkawin ex o kawin qaqlaj ab'q'i tuj Jerusalén.

⁹Tejtzun tkyim, ku'x maqu'n kyxol qtzan t-xe'chel tuj tnam tok tb'i Ttanmi David. Te tib'ajxi, aju o kawin te t-xel, atzun Acaz aju tky'ajal.