Read kumam 2 Crónicas 28 Bible Online

2 Crónicas 28 - kumam bible

2 Crónicas 28

¹Otoq japun Acaz twi' winqin ab'q'i tej ttzyet tkawin ex o kawin qaqlaj ab'q'i tuj Jerusalén, ex mya b'a'n e ela qe tb'inchb'en tuj twitz Qman, ex minti' o tb'incha ik tza'n te David aju qtzan t-xe'chel,

²noq o'kx ok lpe' kyi'j kyb'inchb'en qe rey kye aj Israel; ax ikx e kub' tb'incha'n qe tilb'ilal Baal ti'j k'uxb'il in kub' ulj tu'n q'aq',

³ex kub' tpatun storak tuj tal chq'ajlaj Ben-hinom ex e kub' tpatun qe tky'ajal te chojb'il, ik tza'n ju ik'b'ilxix in kyb'incha'n qe xjal kyuj txqantl nasyon, aqeju otoq che ex tlajo'n Qman kywitz aj Israel.

⁴Ax ikx xi tq'o'n chojb'il ex kub' tpatun storak kyuj qe ja te kyk'ulb'il xjal kywi' qe witz, ex kywi' qe tal witz, ex kyjaq' kykyaqil tze' nim kyxaq.

⁵Tu'ntzun jlu xi q'o'n tuj tq'ab' rey kye aj Siria tu'n Qman aju Tdios, o kub' ti'j kyu'n aj Siria, nimku xjal e je'x q'i'n pres ex e pon q'i'n tuj tnam Damasco. Ax ikx xi q'o'n tu'n Qman tuj tq'ab' rey kye aj Israel ex nimxix xjal o naj tu'n.

⁶Porke ate Peka aju tky'ajal Remalías tuj junx q'ij e kub' tb'yo'n jun syent tuk' winqin mil xinaq tuj Judá, aqeju kyuwxix kyk'u'j tuj q'oj. O b'ant jlu tu'nju kyaj kykolin Qman aju Kydios qtzan kyxe'chel.

⁷Ax ikx te Zicri aju aj Efraín ex kyuw tk'u'j tuj q'oj, kub' b'yo'n Maasías tu'n, aju tky'ajal rey, tuk'ix Azricam aju nejenel tuj tja rey, tuk'ix Elcana aju nejenel kye qeju at kyoklen ttxlaj rey.

⁸Ax ikx qe soldad aj Israel xi kypresin kab' syent mil xjal aj Judá; at xu'j, at tal q'a ex at tal txin. Ax ikx xi kyi'n nimku ti'xti ex pon kyi'n tuj Samaria.

⁹Attoq jun t-sanjel Dios ma chixin, Oded tb'i, etz kanul kyi'j qe soldad tej kyja'toq kyokx tuj Samaria ex xi tma'n kye: —Ma tzaj tq'oj Qman aju Kydios qtzan qxe'chel kyi'j aj Judá ex kyja'tzun ma kub' kyi'j kyu'ne. Atzun kyeye ma che kub' kyb'yo'ne tuk'il nimxix kytx'u'jile, ex aju kyb'inchb'ene mya b'a'n lu ma japun tuk'il Dios tuj kya'j.

¹⁰Ax ikx ma kub' kyximane tu'n tok kyq'o'ne te kymajene qe xinaq ex qe xu'j aj Judá ex aj Jerusalén. Pero ¿myapetzun ikx kyeye in che b'inchane il twitz Qman aju Kydiose?

¹¹Kyja'tzun chin kyb'intze ex kyq'o'n aje qe xjal ma che tzaj kypresine, aqeju ax kyermaniye, ex nimxix tq'oj Qman ma tzaj kyi'je.

¹²Atzunte Azarías aju tky'ajal Johanán, tuk'ix Berequías aju tky'ajal Mesilemot, tuk'ix Ezequías aju tky'ajal Salum, ex tuk'ix Amasa aju tky'ajal Hadlai, aqeju nejenel kye aj Efraín, e ok kymayo'n qeju otoq che'x aj tuj q'oj,

¹³ex xi kyma'n kye: —Mi'n che tzaj kyi'ne tzalu qe xjal ma che tzaj kypresine, porke tu'n jlu jaku tzaj qil ti'j tu'n Qman. Ya ma chmet qil, ex atzun kyeye kyajb'ile tu'n tchmet mastl, ex tu'n jlu ktzajel nimxix tq'oj Qman qi'j.

¹⁴Atzun kye soldad xi kyq'o'n qe pres tuj kykwent nejenel ex tnam xjal, tuk'ix tkyaqil ti'xti otoq tz'el kyi'n kye tuj q'oj,

¹⁵atzun kye nejenel jaw kysk'o'n junjun xinaq tu'n kykyaj ten qe pres tuj kykwent, kyuk'ix qe ti'xti otoq tz'el q'i'n kye. Kyxol qe ti'xti lu tzaj kyi'n qe xb'alun tu'n tok kyq'o'n kyi'j qe xjal sqi't kyi'j, ok kyq'o'n kyxajab', xi kyq'o'n kywa ex kyk'a', ok kyq'anan qe ẍil kyi'j, kykyaqil qeju minti' kyipun tu'n kyb'et e jax kyq'o'n kyib'aj qe bur, xi kyi'n tu'n kypon tuj Jericó aju tnam at nim tqan xa'j tuj, ex e kyaj kyq'o'n kyuk'il qe kyxjalil. Te tib'ajxi jlu e ajtz meltz'aj tu'n kyul tuj Samaria.

¹⁶Tuj tq'ijlalil lu xi t-sama'n rey Acaz junjun xjal qanil onb'il tuk'il rey kye aj Asiria,

¹⁷tu'nju otoq che ok tzoqpaj juntl maj aj Edom kyi'j aj Judá, otoq kub' kyi'j kyu'n, ex otoq che'x kyi'n junjun aj Judá pres.

¹⁸Ax ikx qe aj Filisteo otoq kub' kyi'j qe tnam kyu'n, aqeju ate' tuj chq'ajlaj t-xe witz ex tuj tx'otx' Néguev, aju kyetoq aj Judá, ex otoq tz'el kyetzan qe tnam lu: Bet-semes, Ajalón, Gederot, Soco, Timna ex Gimzo, kyuk'ix qe aldey ate' kyi'jele, ex otoq che kub' ten najal kyuj.

¹⁹Porke tu'n Qman kub' kycastiw aj Judá, noq tu'n tlaj Acaz aju kyrey, ex xi tq'o'n Acaz amb'il kye aj Judá tu'n kyb'inchante nimku mya b'a'n, ex jumajx otoq tz'el tpa'n tib' Acaz ti'j Qman.

²⁰Ex minti' o onin Tiglat-pileser aju rey kye aj Asiria ti'j rey Acaz, noqpe o tzaj tu'n tok tzoqpaj q'ojlel ti'j ex ok ten yajlal te.

²¹Maske etz ti'n rey Acaz qe ti'xti wi'yilxix ate' tuj tja Qman, kyuk'ix qeju ate' tuj tja rey ex qeju ate' tuj kyja qe nejenel, tu'n t-xi tq'o'n te chojenj te rey te Asiria, ex mi tu'n jlu minti' o knet onb'il tu'n.

²²Ex maske o tzaj nim mya b'a'n tib'aj rey Acaz, ex kukx o b'inchan il twitz Qman.

²³Xi tq'o'n chojb'il kye qe kydios aj Damasco, ex kyu'ntzun qe jlu otoq kub' ti'j. Kub' t-ximan kyja': Qa o che onin qe kydios aj Siria kyi'j qe kyrey, ax ikxtzun weye, jakulo che onin wi'je qa ma txi nq'o'ne chojb'il kye, chi Acaz. Tu'ntzun jlu o tzaj nimku mya b'a'n tib'aj ex kyib'aj kykyaqil aj Israel.

²⁴E ok tchmo'n Acaz qe makb'il ate' tuj tja Dios ex b'i'x e b'aj tb'uchin, kyaj tlamo'n qe tlamel tja Dios ex xi tma'n tu'n kyjaw b'inchet altar kyuj kykyaqil t-skyin cay te tnam Jerusalén, tu'n kyajb'en kye kydios xjal mya nimal Dios qe.

²⁵E jaw tb'incha'n qe altar kyuj kykyaqil tnam ate' tuj Judá, tu'ntzun tkub' patit storak kywitz junxitl dios, ex tu'n jlu tzaj tq'oj Qman ti'j, aju Kydios qtzan t-xe'chel.

²⁶Aju ch'intl tx'olb'ab'en ti'j ex ti'j tkyaqilju o b'ant tu'n, atxix tej ttzaj qe' ex tejxi tpon b'aj, atzun tz'ib'an tuj ju libro jatum ta' tkyaqil tx'olb'ab'en kyi'j qe rey kye aj Judá ex kye aj Israel.

²⁷Tejtzun tkyim, ku'x maqu'n kyuk'il qtzan t-xe'chel tuj tnam Jerusalén, ex minti' okx maqu'n tuj kypantyón qe rey. Te tib'ajxi, aju o kawin te t-xel, atzun Ezequías aju tky'ajalx.