Read kumam 2 Crónicas 31 Bible Online

2 Crónicas 31 - kumam bible

2 Crónicas 31

¹Tejtzun tb'aj tkyaqil jlu, kykyaqil aj Israel otoq che ten e je'x kyuj qe tnam ate' tuj Judá, ex b'aj kyb'uchin qe ab'j otoq tz'ok kyq'o'n xjal te xjan, kub' kypa'n qe tilb'ilal xu'j dios Asera ex kub' kyxitun qe ja te kyk'ulb'il xjal kywi' qe witz, tejxi tnaj tkyaqil jlu kyu'n kyxol aj Judá ex aj Benjamín, ax ikx kyxol aj Efraín ex aj Manasés. Ex te tib'ajxi jlu kykyaqil e aj meltz'aj kyuj kytanmi, teyle junjun tuj tex tetzb'il.

²Te tib'ajxi jlu, ok ten Ezequías nak'ulte ti'j kyaq'un pal ex aj Leví, tu'n kyaq'nan tuj k'lojin, teylex te junjun ti'j taq'un, tu'ntzun kyxi q'ot qe oyaj patun in che kub' ex kyuk'ix qe chojb'il te mojb'ab'l tib'il, tu'n t-xi kyq'o'n chjonte te Qman ex tu'n tjaw kynimsa'n tb'i ex tu'n kyajb'en tuj ttxa'n tpe'n tja Dios.

³Ax ikx xi tq'o'n rey ti'j tex tq'inumab'l, qe chojb'il in che'x q'ot prim ex qale, ex qe oyaj patun in che kub' kyuj qe q'ij te ojlab'l, ex qeju in che'x q'ot tuj ninq'ij ok ttzaj ke'yin juntl ak'aj xjaw, ex kyuj qe ninq'ij ma' kyoklen, ik tza'nx tz'ib'an tuj tley Qman.

⁴Ax ikx xi tma'n kye xjal najlqe tuj Jerusalén tu'n t-xi kyq'o'n kye pal ex kye aj Leví aju onb'il b'anin ti'j, tu'ntzun kyajb'en o'kx tuj taq'un Dios ik tza'n in tma'n tley Qman.

⁵Ex tej kyb'inte aj Israel aju tqanil lu, tu'n tkyaqil kyanmi tzaj kyi'n tnejel twitz triw, ta'l twitz uva, chib'j aseyt, ta'l kab' tb'anil ex tnejel twitz tkyaqil txkaj awal in tzaj tuj kojb'il. Ax ikx pon kyi'n nimxix tlaji'n ti'j tkyaqil twitz kyawal.

⁶Ax ikx qe aj Israel ex qe aj Judá, aqeju najlqe kyuj qe tnam ate' tuj Judá, tzaj kyi'n aju tlaji'n kyi'j qe wakẍ ex kyi'j qe ẍne'l ex tlaji'n kyi'j qe ti'xti nne'l kypa'n tu'n tajb'en te Qman aju Kydios. Tkyaqil jlu okx kyq'o'n tuj b'yujin.

⁷Tzyet kyi'n ti'j tuj toxin xjaw ex we' tu'n kypon kyi'n tuj twuqin xjaw.

⁸Ex tej t-xi' Ezequías kyuk'ix qe xjal at kyoklen ttxlaj ke'yilte aju otoq chmet, xi kyq'o'n chjonte te Qman ex kye aj Israel aju tnam etzan tu'n.

⁹Xitzun tqanin Ezequías kye pal ex kye aj Leví ti'j tkyaqilju otoq chmet.

¹⁰Xi ttzaq'we'n Azarías aju tnejel pal ex tiyjil Sadoc kyja': Atxix tej ttzyet tu'n tul kyi'n xjal kyoyaj tuj tja Qman, at nim qwaye ex malpe kyaj ten nim; tkyaqil jlu ma kyaj ten, tu'nju ma kub' tky'iwla'n Qman aju tnam etzan tu'n.

¹¹Kyja'tzun tten xi tma'n Ezequías tu'n kyb'aj b'inchet qe tal ja ttxlaj tja Qman, tu'ntzun tokx q'ot kywitz awal kyuj. Ex tejtzun kyb'aj b'ant

¹²b'i'x e okx q'o'n qe oyaj kyuj, kyuk'ix qe tlaji'n otoq che pon q'o'n ex qe oyaj otoq che el pa'n te Qman. Aju ok kyq'o'n te nejenel ti'j tkyaqil jlu, atzun Conanías aju aj Leví, ex atzunte Simei aju terman ok te tkab'in nejenel.

¹³Qe xq'uqil e ten tjaq' tkawb'il Conanías ex Simei aju terman, atzun qe jlu: Jehiel, Azazías, Nahat, Asael, Jerimot, Jozabad, Eliel, Ismaquías, Mahat ex Benaía. Tu'n rey Ezequías ok tq'o'n kyoklen ex tu'n Azarías aju nejenel ma'xix toklen tuj tja Dios.

¹⁴Ate Coré aju tky'ajal Imna, aju aj Leví, atzun toksa'n te xq'uqil ttzi ja tkub' tumlal tjawitz q'ij, ex tuj tkwent ta' tu'n kyk'met qe oyaj in xi kyq'o'n xjal te Dios tu'n kyex kygan, ex tuj tkwent tu'n kykub' sipet qe oyaj nne'l kypa'n xjal te Qman.

¹⁵Qe onil te Coré ate' kyuj kytanmi pal, atzun qe jlu: Edén, Miniamín, Jesúa, Semaías, Amarías ex Secanías. Atzun qe e kub' sipante oyaj tujxix tumel kyxol qe kyuk'il ex xi kyq'o'n kye tij xjal ax ikx kye ku'xun, ik tza'nx taq'un junjun k'loj b'animaj ti'j.

¹⁶Ax ikx xi kyq'o'n kye qe xinaq tz'ib'an kyb'i tuj list ex otoq japun ox ab'q'i kyu'n ex qa mas, ex kye qeju in che ajb'en tuj tja Dios tkyaqil q'ij, ik tza'nx kyaq'un junjun k'loj b'animaj ti'j.

¹⁷Ax ikx xi kyq'o'n kye qe pal tz'ib'an kyb'i tuj list ik tza'nx junjun k'loj kyiyjil, ex kye aj Leví, aqeju otoq japun winqin ab'q'i kyu'n ex qa mas, ik tza'n kyaq'un junjun k'loj b'animaj ti'j.

¹⁸Kyaj tz'ib'et kyb'i kykyaqil kyuk'ix qe tal kyk'wa'l, qe kyxu'jil, qe kyky'ajal ex qe kyme'jel, tu'nju xi kyq'on kyib' te jumajx tu'n kyajb'en tuj tja Dios.

¹⁹Kyuj kykyaqil kytanmi pal ate'toq qe xinaq otoq tz'ok q'o'n kyoklen tu'n t-xi kysipan kywa pal tiyjil Aarón, ex kywa kykyaqil aj Leví tz'ib'amaj kyb'i, aqeju najlqe kyuj qe aldey kyi'jele kytanmi pal.

²⁰Atzun jlu o tb'incha Ezequías kyuj kykyaqil tnam ate' tuj Judá. B'a'nxix e ela qe tb'inchb'en twitz Qman aju Tdios ex tz'aqlxix ex axix tok qe.

²¹Tkyaqil aq'untl o tb'incha ti'j tja Dios, ax ikx tu'n kyjapun qe tley Qman kyu'n xjal ex qe tmandamyent; tuj tkyaqil jlu ok tilil tu'n tu'n tniman te Dios tu'n tkyaqil tanmi, ex tu'ntzun jlu b'a'n ela tkyaqil aju tb'incha.