Read kumam 2 Crónicas 33 Bible Online

2 Crónicas 33 - kumam bible

2 Crónicas 33

¹Toktoq Manasés twi' kab'laj ab'q'i tej ttzyet tkawin ex o kawin 55 ab'q'i tuj Jerusalén,

²ex mya b'a'n e ela qe tb'inchb'en tuj twitz Qman, tu'nju o tb'incha axju mya b'a'n kyb'incha qe nasyon otoq che ex tlajo'n Qman kywitz aj Israel.

³E jaw tb'incha'n juntl maj qe ja kywi' qe witz jatum in che k'ulun xjal mya nimal Dios qe, aqeju otoq che kub' t-xitun Ezequías aju qtzan tman; e jaw tb'incha'n qe altar jatum tu'n kyk'ulun xjal twitz tilb'ilal Baal, ex e kub' tb'incha'n qe tilb'ilal xu'j dios Asera, ax ikx o k'ulun twitz q'ij, twitz xjaw ex kywitz kykyaqil che'w ate' twitz kya'j,

⁴ex e jaw tb'incha'n qe altar tuj tja Qman jatum otoq tma Qman kyja': Atzun ktel nb'iye tuj te jumajx tuj Jerusalén.

⁵Jaw tb'incha'n txqantl altar tuj kykab'il ttxa'n tpe'n tja Dios jatum tu'n kyk'ulun xjal kywitz che'w, twitz q'ij ex twitz xjaw.

⁶Ax ikx e kub' tpatun qe tk'wa'l te chojb'il tuj chq'ajlaj Ben-hinom, o b'ant ttxokon kyi'j kyanmi kyimni, o b'ant tq'ijin, o b'ant mañ tu'n ex ok ten qanil t-xjel kye qe spiritist ex kye qe xjal b'a'n che ky'a'n. Jumajx mya b'a'n ela qe tb'inchb'en tuj twitz Qman, kyja'tzun tzaj nim tq'oj Qman ti'j tu'n jlu.

⁷Ax ikx okx tq'o'n tuj tja Dios aju tilb'ilal otoq b'ant tu'n; aju ja lu otoq yolin Dios ti'j tuk'il David ex Salomón aju tky'ajal kyja': Ktel nb'iye te jumajx tuj ja lu tuj Jerusalén, aju tnam o jaw nsk'o'ne kyxol kykyaqil kyiyjil aj Israel,

⁸ex mlay che'x nlajo'ntle qe aj Israel tuj tx'otx' o txi nq'o'ne kye qtzan kyxe'chel, qa ma txi kyniman tkyaqilju o txi nma'ne kye ex qa ma che japun qe nxnaq'tzb'ile, qe nleye ex qe nmandamyente kyu'n, aju xi nma'ne te Moisés, chi Dios.

⁹B'aj tzpet kynab'l aj Judá ex aj Jerusalén tu'n Manasés, ex mas nimxix mya b'a'n o kyb'incha ik tza'n otoq kyb'incha qe nasyon otoq che naj tu'n Qman kywitz aj Israel.

¹⁰O yolin Qman tuk'il Manasés ex kyuk'il t-xjalil, ex minti' xi kyb'i'n.

¹¹Tu'ntzun jlu e tzaj ti'n Qman qe nejenel kye t-soldad rey te Asiria, tzyet Manasés kyu'n, ok kyq'o'n k'uxb'il tqul tq'ab', b'aj kyk'alo'n tu'n caden q'an k'uxb'il ex xi kyi'n tuj Babilonia.

¹²Tejtzun tten tuj yajb'il ok ten na'l Dios, kub' tmansinxix tib' twitz Dios aju Kydios qtzan t-xe'chel,

¹³ex tej tok ten na'l Dios o tzaj tb'i'n Dios aju tqanb'etz, xi tq'o'n Qman amb'il te tu'n taj meltz'aj tuj Jerusalén ex tu'n tk'monte toklen juntl maj te kawil. Eltzun tnik' Manasés ti'j, ate Qman aju Dios axix tok.

¹⁴Tb'ajlenxi jlu jaw tb'incha'n Manasés juntl maj aju muro tok ti'jxi tnejel, aju tok ti'jele tnam tok tb'i Ttanmi David, aju muro xi'ynix tumlal telex q'ij teju chq'ajlaj Gihón tu'n tpon tuj tq'ab' xaq, tejxi tpon max ttzi tlamel, Tlamel Kyiẍ tb'i, ex kyaj ten ju tal witz Ofel tujxi muro, ex ma'xix ok twa'l muro tu'n. Ax ikx e kub' tq'o'n qe nejenel kye soldad kyuj kykyaqil qe tnam tok muro kyi'j ate' tuj Judá.

¹⁵Ax ikx e je'tz ti'n tuj tja Qman qe kydios txqantl nasyon, tuk'ixju tilb'ilal otoq kub' tb'incha'n, ex kyuk'ix kykyaqil qe altar otoq che jaw tb'incha'n te kyk'ulb'il xjal twi witz, jatum tkub'sa'n tja Dios ex tuj tnam Jerusalén, ex e je'x t-xo'n ti'jxi tnam.

¹⁶Te tib'ajxi xi tb'incha'n aju altar te Qman ex e je'x tq'o'n qe chojb'il te mojb'ab'l tib'il tib'aj, ex qe chojb'il te aq'b'il chjonte, ex xi tma'n kye aj Judá tu'n kyk'ulun twitz Qman aju Kydios aj Israel.

¹⁷Maske ikju, atzun kye xjal kukx xi kyq'o'n qe chojb'il kywi' qe witz jatum in che k'uluntoq nej kywitz qe tilb'ilal, ex aqeju oyaj lu, te Qman xi kyq'o'n.

¹⁸Aju ch'intl tx'olb'ab'en ti'j Manasés ex ti'j tna'j Dios ex kyi'j qe yol kyma qe t-sanjel Dios te, aju tzaj q'ma'n kye tu'n Dios aju Kydios aj Israel, atzun tz'ib'an tuj libro jatum ta' tkyaqil tx'olb'ab'en kyi'j kyaq'unb'en qe rey kye aj Israel.

¹⁹Aju tna'j Dios ex aju tzaq'web'l o tk'am, kyuk'ix kykyaqil qe il o tb'incha ex ju tten mya tz'aqlxix, kyuk'ix qe lugar kywi' qe witz jatum e jaw tb'incha'n qe ja te kyk'ulb'il xjal mya nimal Dios qe, ex jatum e kub' tq'o'n qe tilb'ilal xu'j dios Asera ex qe txqantl tilb'ilal tej na'nxtoq tkub' tmansin tib' twitz Dios, atzun tz'ib'an tkyaqil jlu tuj libro ti'j tx'olb'ab'en kyaj kytz'ib'an qe t-sanjel Dios.

²⁰Tejtzun tkyim Manasés, ku'x maqu'n tuj tx'otx' twitz tja. Te tib'ajxi aju o kawin te t-xel, atzun Amón aju tky'ajal.

²¹Toktoq Amón twi' 22 ab'q'i tej ttzyet tkawin ex o kawin kab' ab'q'i tuj Jerusalén.

²²Qe tb'inchb'en mya b'a'n e ela tuj twitz Qman ik tza'nx qe tb'inchb'en Manasés aju qtzan tman. Kub' tq'o'n chojb'il kywitz kykyaqil qe tilb'ilal otoq b'aj tb'incha'n Manasés aju qtzan tman, ex o k'ulun kywitz.

²³Atzun te minti' kub' tmansin tib' twitz Dios ik tza'n tb'incha Manasés aju qtzan tman, noq o'kx ok ten b'inchal nimxix mya b'a'n.

²⁴O moje' kyyol qe xjal at kyoklen ttxlaj tu'n kyb'inchante mya b'a'n ti'j ex kub' kyb'yo'n ax tuj tja.

²⁵Atzun kye tnam xjal e kub' kyb'yo'n qeju otoq che kub' b'yonte qtzan rey Amón, ex ok kyq'o'n Josías aju tky'ajal tu'n tkawin te t-xel.