Read kumam 2 Crónicas 7 Bible Online

2 Crónicas 7 - kumam bible

2 Crónicas 7

¹Tejtzun tb'aj na'n Salomón Dios, ku'tz jukpaj txqan q'aq' tuj kya'j ex e kub' tz'e'y qe chojb'il tu'n, kyuk'ix qe oyaj patun in che kub', ex b'i'x noj tuj tja Qman tu'n t-spik'umal,

²kyja'tzun tten minti' e okx qe pal tuj.

³Tej tkyil kykyaqil aj Israel aju q'aq' ex t-spik'umal Qman kub'il tib'aj tja, e kub'tzun ẍmeje' tuj ttxa'n tpe'n tja Dios tejxi tpon takl tib'aj kywitz twitz tx'otx', e oktzun ten k'ulul, xi kyq'o'n chjonte te Qman ex kyma: B'a'n te Qman, ex aju tk'ujlalil kukx in ten te jumajx.

⁴Te tib'ajxi jlu, ate rey kyuk'ix kykyaqil aj Israel xi kyq'o'n chojb'il te Qman.

⁵Xi tq'o'n rey Salomón 22 mil wakẍ tuk'ix jun syent tuk'il winqin mil ẍne'l te chojb'il. Atzun jlu o b'ant tu'n rey kyuk'ix kykyaqil aj Israel tej tik'set tq'ijlalil tja Qman.

⁶Qe pal ax e kub' ten tujx kylugar jatum in che ajb'en, ax ikx qe aj Leví q'i'n qe chnab' kyu'n, aju otoq kyaj tb'incha'n rey David tu'n tajb'en tmoj b'itz tej in b'itzantoq David kyuk'il, ex aju b'itz in tma'n: Aju tk'ujlalil Qman kukx tten te jumajx. Atzun qe pal in che q'ajtza'ntoq chun tajsa'n kywitz aj Leví, ex kykyaqil aj Israel wa'lqe'toq.

⁷Ax ikx b'aj t-xjansa'n Salomón tmij ttxa'n pe'n tkub' twitz tja Qman, ex atzun e kub' tpatun qe alumaj tuk'ix kysebyil qe alumaj otoq che kub' b'yo'n te chojb'il te mojb'ab'l tib'il, porke aju altar q'an k'uxb'il ttx'otx'il aju otoq b'aj tb'incha'n Salomón, minti' kanun tu'n kykub' patit qe alumaj tib'aj ex qe oyaj twitz awal ex ju kysebyil qe alumaj.

⁸Tuj tq'ijlalil lu, ate Salomón kyuk'ix kykyaqil aj Israel kub' kyik'sa'n wuq q'ij ninq'ij, ex kykyaqil xjal e ul b'aj, tzajx qe' jatum ta' tmojonil tnam Hamat ex pon b'aj max ttzi tq'ab' xaq tmojonil tnam Egipto.

⁹Tujtzun twajxaqin q'ij kub' kyik'sa'n ju ninq'ij ma'xix t-xilen, porke tuj enter wuq q'ij ninq'ij otoq b'aj kyik'sa'n tq'ijlalil altar, ex tuj juntl wuq q'ij kub' kyik'sa'n tq'ijlalil qe tal ja t-xaq tze'yin kywi'.

¹⁰Tuj 23 tajlal twuqin xjaw xi tma'n rey Salomón kye xjal tu'n kyaj kyja, ex kykyaqil xjal e aj kyja in che tzalaj wen tu'n tkyaqilju b'a'n otoq tb'incha Qman te David, te Salomón ex kye kykyaqil aj Israel aqeju etzan tu'n.

¹¹Tej tb'aj b'ant tkyaqil aq'untl tu'n Salomón ti'j tja Qman, ti'j tex tja ex ti'j tkyaqilju otoq kub' t-ximan tu'n tb'inchet,

¹²kub' tyek'un tib' Qman twitz Salomón te qonik'an ex tzaj tma'n te kyja': Ma nb'iye aju ma tzaj tqanina weye, ex ma jaw nsk'o'ne lugar lu tu'n tajb'en te njaye jatum tu'n kyxi q'ot qe chojb'il.

¹³Kyja'tzun, qa ma tzaj nsama'ne koresma, qa ma tzaj nma'ne tu'n mi'n ttzaj jb'al, qa ma txi nma'ne kye ẍplon tu'n tb'aj naj kyawale tuj kojb'il kyu'n, ex qa ma tzaj nsama'ne tx'u'j yab'il kyib'aj xjal etzan wu'ne;

¹⁴ex qa ma kub' kymansin kyib' qe xjal etzan wu'ne, aqeju tok nb'iye kyi'j, qa ma che kub'san kywitz weye, qa ma che ok ten jyol weye ex qa ma kyaj kykolin kyb'inchb'en mya b'a'n, che tzajeltzun nb'i'ne max tuj kya'j, kb'el nnajsa'ne kyil ex kpol kytx'otx' wu'ne ik tza'n tten nej puro tb'anilxix.

¹⁵Textzun ja'lo kukx k'okel nkwentine ja lu, ex ktzajel nb'i'ne aju kykub'sb'ile ktzajel kyqanine weye tuj lugar lu,

¹⁶porke o jaw nsk'o'ne ex o b'aj nxjansa'ne ja lu, jatum tu'n ttzaj na'n nb'iye tuj te jumajx. Kukx k'okel nkwentine ja lu, ex kukx tzul nna'ne.

¹⁷Atzun ja'lo, qa ma b'eta b'a'n nwitze ik tza'n o tb'incha David aju qtzan tmana, ex qa ma japun tu'na tkyaqilju o txi nma'ne teya, ex qa ma che japun qe nleye ex qe nxnaq'tzb'ile tu'na,

¹⁸aqine chin kyuwsalte tkawb'ila ik tza'n kyaj b'ant ti'j wu'ne tuk'il David aju qtzan tmana, tej t-xi nma'ne te qa ax kyxol qe tiyjil kukx tu'n kyjaw nsk'o'ne qe kawil tu'n kykawin kyib'aj aj Israel.

¹⁹Qatzun ma tz'el kypa'n kyib'e wi'je, ex qa mi'n ma che japun qe nleye ex qe nmandamyente kyu'ne, aqeju o che'x nma'ne kyeye, ex qa ma che ajb'ene kye junxitl dios ex qa ma che k'ulune kywitz,

²⁰che elex nlajo'ne tuj tx'otx' lu aju o txi nq'o'ne kyeye, ex aju ja ma b'aj nxjansa'ne kyjel nkoline, ex k'okel te kyxmayb'il ex te kytzeb'l kykyaqil nasyon.

²¹Maske tb'anilxix ke'yin ja lu ja'lo, pero te tib'ajxi ok kyik' b'et kykyaqil xjal ttxlaj che jawil lab'in ti'j ex ok kyma: ¿Tiqu'n ma tb'incha Qman ikju ti'j tnam lu ex ti'j ja lu?

²²Ex ktzajel tzaq'we'n kye kyja': Tu'nju ma tz'el kypa'n kyib' ti'j Qman aju Kydios qtzan kyxe'chel, aju etz q'inte kye tuj Egipto, ex tu'nju ma che ok lpe' kyi'j junxitl dios tu'n kyk'ulun kywitz ex tu'n kyajb'en kye, tu'ntzun tlaj tkyaqil jlu ma tzaj tq'o'n Dios jun nintz mya b'a'n kyib'aj, che chilo xjal.