Read kumam Esdras 5 Bible Online

Esdras 5 - kumam bible

Esdras 5

¹Ate Hageo aju t-sanjel Dios, tuk'ix Zacarías aju tky'ajal Iddo, xi kyma'n kye xjal judiy aqeju najl tuj Judá ex tuj Jerusalén, aqeju tqanil in tzaj tma'n Qman kye, aju Kydios aj Israel.

²Atzunte Zorobabel aju tky'ajal Salatiel, tuk'ix Jesúa aju tky'ajal Josadac, tzyet juntl maj aq'untl kyu'n tu'n tjaw b'inchet tja Dios tuj Jerusalén, ex e ten t-sanjel Dios kyuk'il tu'n kyonin kyi'j.

³Tzajtzun Tatnai aju gobernador tuj tx'otx' ta' tuj tumlal telex q'ij te nima Éufrates, tuk'ix Setar-boznai ex kyuk'ix txqantl kyuk'il, e je'x q'malte kye kyja': ¿Alkye ma txi q'onte orden kyeye tu'n tjaw kyb'incha'ne tja Dios lu ex tu'n tb'aj kyb'incha'ne tkyaqil tuj?

⁴Ax ikx tzaj kyqanin: ¿Ti kyb'i qe xjal in che aq'nan ti'j ja lu?

⁵Maske ikju, pero axte Dios o kwentin kye qe nejenel kye xjal Judiy, kyja'tzun minti' o we' aq'untl kyu'n. Xi t-sama'n Tatnai tqanil lu tuk'il Darío aju rey kye aj Persia, ex e ayon tu'n kyk'monte alkye tzaq'web'l tu'n rey.

⁶Atzun jun copya lu te u'j tu'n Tatnai aju gobernador te tx'otx' tkub'sa'n tuj tumlal telex q'ij te nima Éufrates, ex tu'n Setar-boznai ex qe txqantl kyuk'il ex qe xjal ma' kyoklen tu'n rey, aqeju ate'toq tuj tumlal telex q'ij te nima Éufrates, aju xi kysama'n te rey Darío.

⁷Chitzun in tma'n kyja': Tat Rey, kuchiwt b'a'n ta'ya.

⁸Qaje tu'n tb'inteya jlu: O qox aje tuj tx'otx' Judá, ex aju tja Dios aju Dios ma'xix toklen, nib'an tjaw kyb'incha'n xjal kyu'n qe nmaq ab'j xpelimaj ex nib'an kyjax naj qe tqul; kyuwxix in che aq'nan ti'j aq'untl lu ex aju aq'untl in b'et-xix wen.

⁹Xi qqanine kye nejenel kye xjal judiy al u'n otoq txi q'o'n orden kye tu'n tjaw b'inchet juntl maj tja Dios ex tu'n tjax kyq'o'n tqul,

¹⁰xi qqanine ti kyb'i qe xjal nejenel ti'j aq'untl, tu'ntzun t-xi qsama'ne kyb'i tuk'ila.

¹¹Atzun kye tzaj kytzaq'we'n: Qeye in qo ajb'ene te Dios, aju Dios tajaw kya'j ex tajaw tx'otx', ex in qo aq'nane tu'n tjaw b'inchet juntl maj tja, aju jaw b'incha'n tu'n jun nintz rey kye aj Israel ojtxi.

¹²Ex qe qtzan qxe'chele kyb'incha mya b'a'n, ex tu'ntzunju tzaj nimxix tq'oj Dios kyi'j, aju tajaw kya'j; e je'x q'o'n tu'n tuj tq'ab' rey Nabucodonosor aju rey kye aj Babilonia aju aj Caldeo, ex aju rey lu kub' t-xitun tja Dios ex e je'x ti'n nimku xjal aj Israel tuj Babilonia.

¹³Te tib'ajxi tzaj tq'o'n Ciro orden tu'n tjaw b'inchet juntl maj tja Dios tuj tnejel ab'q'i ttzyetlen tkawin tuj Babilonia.

¹⁴Ax ikx etz ti'n Ciro tuj tja kydios xjal aj Babilonia qe makb'il q'an pwaq ex saq pwaq in che ajb'entoq nej tuj tja Dios tuj Jerusalén, aqeju otoq che pon ti'n rey Nabucodonosor tuj Babilonia, ex e je'x tq'o'n tuj tkwent jun xjal Sesbasar tb'i, aju otoq tz'ok tq'o'n te gobernador.

¹⁵Ex xi q'o'n orden te tu'n kyajtz ti'n qe makb'il, tu'ntzun kyul meltz'aj juntl maj tuj Jerusalén, ex tu'n tjaw b'incha'n juntl maj tja Dios tujx tlugaril jatum tkub'sa'n nej.

¹⁶Tejtzun tul Sesbasar tuj Jerusalén kub' qe' t-simyentil tja Dios tu'n; atxixtzun ttzyetlen tu'n tjaw b'inchet juntl maj tja Dios, ex na'nx tb'ant, che chi xjal judiy qeye.

¹⁷Ja'lo qa b'a'n tuj twitza, Tat Rey, qajb'ile tu'n tku'x jyet kyuj qe libro kye qe rey kye aj Babilonia, tu'ntzun qb'inteye qa ax tok o tma Ciro tu'n tjaw b'inchet juntl maj tja Dios tuj Jerusalén, ex qajb'ile tu'n qb'inteye alkye teya t-ximb'etz ti'j jlu, Tat Rey, chi tuj u'j.