Read kumam Esdras 6 Bible Online

Esdras 6 - kumam bible

Esdras 6

¹Atzunte rey Darío xi tma'n tu'n tb'aj jyet kyxol qe u'j k'u'n tuj Babilonia.

²Ex tuj tja rey at tuj Ecbatana tuj tx'otx' Media, knet jun u'j kyu'n jatum tz'ib'an jun acta in tma'n kyja':

³Tuj tnejel ab'q'i ttzyetlen tkawin rey Ciro, ex jun orden tu'n in tma'n kyja': E tjaw b'inchet juntl maj tja Dios tuj Jerusalén, tu'ntzun t-xi q'ot chojb'il te Dios. E tkub' qe' t-simyentil ex e t-xi' 30 var twa'l ex 30 var tuj t-ẍkyin;

⁴ex ok tex ox txol ab'j nmaq, e t-xi' jun txol tze', ax ikx ok tex juntl ox txol ab'j. Aju kchjolte tkyaqil jlu, atzunju k'u'l tpwaq rey.

⁵Atzun qe makb'il q'an pwaq ex saq pwaq kytx'otx'il, aqeju e je'tz ti'n Nabucodonosor tuj tja Dios tuj Jerusalén ex e ul ti'n tuj Babilonia, e kyaj juntl maj tu'n kypon tuj Jerusalén ex tu'n kyokx q'ot tuj tja Dios tujx kylugar, chi orden tu'n Ciro.

⁶Kyja'tzun, aya Tatnai gobernador tuj partament tkub' ti'jxi nima Éufrates tuj telex q'ij, ex aya Setar-boznai ex qe txqantl kyuk'ile, aqeju at kyoklen tujx partament: Mi'n che'xe tuj Jerusalén lab'tel kyi'j xjal judiy;

⁷kyq'onxe amb'il te gobernador kye xjal Judiy kyuk'ix qe nejenel kye, tu'n tjaw kyb'incha'n juntl maj tja Dios tujx tlugar.

⁸Atzun orden jlu wu'ne, alkye tumel tu'n kyonine kyi'j qe nejenel kye xjal Judiy tu'n tjaw kyb'incha'n tja Dios: Tu'n tkyaqilju chojenj in tk'mon chmol pwaq te rey tuj partament ti'jxi nima Éufrates tuj telex q'ij, e tchjet gast ti'j tja Dios tujxix q'ij b'animaj ti'j, tu'ntzun mi'n twe' aq'untl.

⁹Ex tkyaqil q'ij tu'n t-xi q'ot kye qe pal tuj Jerusalén aju in kyqanin tu'n tajb'en kyu'n te oyaj patun in kub' te Dios at tuj kya'j: qa tal tor, qa ẍne'l, qa tal tman ẍne'l, qa twitz triw, qa atz'an, qa ta'l twitz uva ex qa chib'j aseyt,

¹⁰tu'ntzun t-xi kyq'o'n qe chojb'il in tzalaj Dios kyi'j, aju Dios at tuj kya'j, ex tu'n kyna'n Dios wi'je ex kyi'j qe nk'wa'le, tu'ntzun qtene tuj txub'txaj.

¹¹Ax ikx kxel nq'o'ne jun orden kyeye: Qa at jun mi ma txi tniman ley lu, kb'eletz q'it jun viga twi tja, kb'elex awet, ex atzun kb'el xo't xjal tib'aj twi tze' lu tu'ntzun tkyim, ex atzunju tja b'i'x kb'el xitun.

¹²Ate Dios jaw sk'onte tnam Jerusalén tu'n ttzaj na'n tb'i tuj, kyja'tzun qa at jun rey ex qa jun tnam ma kub' t-ximan tu'n tch'expet orden lu, ex qa tu'n tkub' t-xitun tja Dios tuj Jerusalén, najxwit xjal tu'n Dios. Aqine Darío, wu'ne ma txi nq'o'ne orden lu. Japunx orden lu kyu'ne ik tza'nx tz'ib'an, chi orden in tma'n tuj u'j.

¹³Ate Tatnai aju gobernador tuj partament ti'jxi nima Éufrates tuj telex q'ij, tuk'ix Setar-boznai ex kyuk'ix qe kyuk'il, o japun orden kyu'n, aju otoq tz'etz tu'n rey Darío.

¹⁴Kyja'tzun tzyet juntl maj aq'untl ti'j tja Dios kyu'n qe nejenel kye xjal Judiy, ik tza'nx xi q'ma'n kye kyu'n Hageo ex Zacarías aju tky'ajal Iddo aqeju t-sanjel Dios, ex b'a'n ela aq'untl. Pon b'aj twi aq'untl ik tza'n q'ma'maj tu'n Kydios aj Israel ex ik tza'nx orden otoq tz'etz tu'n Ciro, tu'n Darío ex tu'n Artajerjes, aqeju rey kye aj Persia.

¹⁵B'ant tja Dios tuj ox tajlal xjaw Adar ex tuj tqaqin ab'q'i ttzyetlen tkawin rey Darío.

¹⁶Kub'tzun kyik'sa'n qe pal, qe aj Leví ex qe txqantl xjal aj Israel aqeju otoq che etz tuj Babilonia, jun ninq'ij tuk'il tzalajb'il, tej tik'set tq'ijlalil tja Dios tu'n tajb'en te k'ulb'il te.

¹⁷Tuj ik'sb'il q'ij lu xi kyq'o'n jun syent tal tor te chojb'il, kab' syent tman ẍne'l ex kyaje syent tal tman ẍne'l, ax ikx xi kyq'o'n kab'laj tman chip, jun ti'j junjun k'loj kyiyjil aj Israel, te jun oyaj te Dios te chojb'il kyil kykyaqil aj Israel.

¹⁸Ax ikx e ok q'o'n qe pal ti'j kyaq'un ik tza'nx kyturn, ax ikx qe aj Leví, tu'n kyajb'en tuj k'ulb'il tuj tja Dios tuj Jerusalén, ik tza'nx tz'ib'amaj tuj tley Moisés.

¹⁹Ax ikx qeju otoq che ajtz tuj Babilonia ex otoq che ul meltz'aj tuj Jerusalén kub' kyik'sa'n Xjan Q'ij tuj kyajlaj tajlal tnejel xjaw.

²⁰Otoq b'aj kyxjansan kyib' qe pal ex qe aj Leví, kyja'tzun saq qe ik tza'nx in tma'n tley Moisés, ex kyja'tzun kub' kyb'yo'n qe tal tman ẍne'l in che kub' b'yet tuj Xjan Q'ij, te kye qeju otoq che etz tuj Babilonia, te kye txqantl kyerman pal ex te kyex aj Leví.

²¹Kykyaqil aj Israel, aqeju otoq che etz tuj Babilonia, e wa'n ti'j wab'j in b'ant tuj Xjan Q'ij, junx kyuk'il kykyaqil qeju otoq tz'el kypa'n kyib' ti'j mya b'a'n in b'ant kyu'n txqantl tnam, ex otoq tz'ok kymojb'an kyib' kyuk'il aj Israel tu'n kyk'ulun te Qman aju Kydios aj Israel.

²²Kub' kyik'sa'n xjal wuq q'ij ninq'ij tuk'il tzalajb'il, tu'n kywa'n pan minti' t-samel tuj tu'n tjaw mal tk'u'j, tu'nju otoq noj tuj kyanmi tu'n tzalajb'il tu'n Qman, tu'nju xtalb'il otoq b'inchanjtz kye tu'n rey kye aj Asiria ex tu'nju otoq onin kyi'j tu'n tjaw b'inchet juntl maj tja Dios, aju Kydios aj Israel.