Read kumam Esdras 7 Bible Online

Esdras 7 - kumam bible

Esdras 7

¹Te tib'ajxi jlu, tej toktoq Artajerjes te rey kye aj Persia, at jun xinaq Esdras tb'i, tky'ajal Seraías, atzunte Seraías tky'ajal Azarías, atzunte Azarías tky'ajal Hilcías,

²atzunte Hilcías tky'ajal Salum, atzunte Salum tky'ajal Sadoc, atzunte Sadoc tky'ajal Ahitob,

³atzunte Ahitob tky'ajal Amarías, atzunte Amarías tky'ajal Azarías, atzunte Azarías tky'ajal Meraiot,

⁴atzunte Meraiot tky'ajal Zeraías, atzunte Zeraías tky'ajal Uzi, atzunte Uzi tky'ajal Buqui,

⁵atzunte Buqui tky'ajal Abisúa, atzunte Abisúa tky'ajal Finees, atzunte Finees tky'ajal Eleazar, atzunte Eleazar tky'ajal Aarón aju tnejel pal.

⁶Xnaq'tzamaj Esdras ti'j ley aju otoq tzaj tq'o'n Qman aju Kydios aj Israel te Moisés. O oninjtz Esdras tu'n Qman, kyja'tzun xi tq'o'n rey Artajerjes tkyaqil aju xi tqanin Esdras te.

⁷Kyja'tzun tten, tuj twuqin ab'q'i toklen Artajerjes te rey, ajtz Esdras tuj Babilonia tu'n tul tuj Jerusalén kyuk'ix jun k'loj aj Israel; kyxol qe jlu at qe pal, at aj Leví, at qe b'a'n che b'itzan, at qe kwentil ttzi tja Dios ex at qe xinaq ajb'el tuj tja Dios.

⁸Kub' b'e tu'n Esdras tu'n tajtz tuj Babilonia tuj tnejel q'ij te tnejel xjaw tuj twuqin ab'q'i toklen Artajerjes te rey, ex tu'nju onb'il tk'am tu'n t-xtalb'il Dios, pon tuj Jerusalén tuj tnejel q'ij te tjwe'yin xjaw tex ab'q'i.

¹⁰Nim tgan Esdras tu'n t-xnaq'tzan tib' ti'j tley Qman, ex tu'n tjapun tu'n, ex tu'n t-xi t-xnaq'tza'n tley Qman ex qe tmandamyent kye aj Israel.

¹¹Atzun copya jlu ti'j u'j xi tq'o'n rey Artajerjes te Esdras aju pal ex xnaq'tzal ti'j ley, ex xnaq'tzamaj ti'j tkyaqil tmandamyent Qman ex qe tley aju tzaj tq'o'n kye aj Israel:

¹²Aqine Artajerjes aju kawil kyib'aj txqantl rey, in xi nq'olb'ene aya Esdras, aya pal ex xnaq'tzal xnaq'tzamaj ti'j tley Dios aju at tuj kya'j.

¹³Ma txi nma'ne kye kykyaqil aj Israel ate' tjaq' nkawb'ile, tuk'ix kye pal ex kye aj Leví, qa kyaj tu'n kyxi' tuk'ila tuj Jerusalén, b'a'n tu'n kyxi'.

¹⁴Porke wu'ne ma txi nsama'na, ex kyu'n qeju wuq onil weye, tu'n t-xi'ya ke'yilte qa in japun kyu'n qe xjal ate' tuj Judá ex tuj Jerusalén aju in tma'n tley Tdiosa, aju at tuj tq'ab'a.

¹⁵Q'inxa q'an pwaq ex saq pwaq aju ma txi qq'o'ne, aqine kyuk'ix qe onil weye, ik tza'nx tb'is qk'u'je, tu'n t-xi qq'o'ne te Kydios aj Israel aju najl tuj Jerusalén,

¹⁶ex q'inxa tkyaqil saq pwaq ex q'an pwaq jaku knet tu'na tuj tkyaqil tx'otx' Babilonia, tuk'ixju ktzajel kyq'o'n qe xjal ex qe pal tu'n kyex kygan, tu'n tajb'en tuj tja Dios tuj Jerusalén.

¹⁷Tu'n tkyaqil pwaq lu jaku che laq'et tal tor, tman ẍne'l ex qe tal tman ẍne'l, tu'n tok junx tuk'il oyaj twitz triw, sebad ex ta'l twitz uva, tu'ntzun t-xi q'ot te Dios tib'aj altar tuj tja Kydiose tuj Jerusalén.

¹⁸Atzunju q'an pwaq ex saq pwaq kyjel ten, aya kyuk'ix qe tuk'ila, kyb'inchame alkye b'a'n tuj kywitze, ik tza'nx tajb'il Dios.

¹⁹Atzun qe makb'il ma txi q'o'n tuj tkwenta tu'n kyajb'en tuj k'ulb'il tuj tja Dios, axa kxel q'onte kye te Dios tuj Jerusalén.

²⁰Noq alkyex juntl atx taj tu'n tajb'en tuj tja Tdiosa, b'a'n tu'n t-xi tqanina kye qe xjal k'u'lte nq'inumab'le.

²¹Aqine rey Artajerjes in xi nq'o'ne orden lu kye kykyaqil k'u'l pwaq ate' ti'jxi nima Éufrates tuj telex q'ij, tu'n t-xi kyq'o'n tkyaqilju ktzajel tqanin Esdras, aju pal ex xnaq'tzal xnaq'tzamaj ti'j tley Dios aju at tuj kya'j.

²²B'a'n tu'n t-xi kyq'o'ne 75 quintal saq pwaq te, tuk'ix kyaje syent quintal triw, qaq syent galón ta'l twitz uva, ex qaq syent galón chib'j aseyt; tkyaqil jlu mlay tzik' mastl tib'aj, atzun atz'an, b'a'n t-xi q'ot noq nik'pun ktzajel tqanin.

²³Tkyaqilju ktzajel tqanin Dios aju at tuj kya'j tu'n tajb'en tuj tja, il ti'j tu'n t-xi q'ot naj, tu'ntzun mi'n ttzaj jun castiw kyib'aj qe nk'wa'le ex kyib'aj qe tnam jatum in chin kawine.

²⁴Ax ikx b'a'n tu'n kyb'inteye tu'n mi'n tel qanit mi jun txkaj chojenj kyi'j qe pal, qe aj Leví, qe b'itzal, qe kwentil ttzi tja Dios, qeju in che ajb'en tuj tja Dios ex noq alkyex juntl xjal in ajb'en tuj tja Dios.

²⁵Atzun teya Esdras, ik tza'nx tnab'la ma tzaj tq'o'n Tdiosa, che tq'o'n oka qe jwes ex qe kawil aqeju b'a'n tley Tdiosa kyu'n, tu'n t-xi kyb'incha'n ti'j kyxtis kykyaqil xjal ate' tuj partament ti'jxi nima Éufrates tuj telex q'ij, atzun kye qeju minti' b'a'n tley Dios kyu'n, che t-xnaq'tzanxa qe.

²⁶Qa at jun minti' ma japun tley Tdiosa ex nleye tu'n, aqine rey, il ti'j tu'n tkub' t-sentens; qa tu'n tkyim, qa tu'n tex lajet tuj ttanmi, qa tu'n tchjet tmult, ex qa tu'n tokx pres, chi tyol u'j.

²⁷Oktzun ten Esdras na'l Dios ex tma: Chjonte te Qman aju Kydios qxe'chel, tu'nju ma yolin tuj tanmi rey tu'n tb'aj tb'incha'n juntl maj tuj tja Dios tb'anilxix ke'yin tuj Jerusalén;

²⁸ex noq tu'n t-xtalb'il Dios ma chin jaw sk'o'ne tu'n rey, ex kyu'n qeju onil te ex kyu'n qe xinaq ma' kyoklen ttxlaj, tu'n woke te nejenel. Ma tzaj tq'o'n Qman wipumale, porke tu'nju onb'il tu'n ma che ok nchmo'ne qeju mas ma' kyoklen kyxol aj Israel, tu'n kyex tuj Babilonia junx wuk'ile, chi Esdras.