Read kumam Nehemías 1 Bible Online

Nehemías 1 - kumam bible

Nehemías 1

¹Atzun qe tyol Nehemías jlu, aju tky'ajal Hacalías. Tej otoq b'ant winqin ab'q'i ttzyetlen tkawin Artajerjes, tuj xjaw Quisleu tb'i, aqine Nehemías atintoqe tuj nintz tnam Susa,

²tej tpon wermaniye Hanani kyuk'ix junjun xinaq tzajni qe tuj Judá. Xitzun nqanine kye ti'j tnam Jerusalén ex kyi'j qe xjal Judiy, aqeju otoq che aj tuj Babilonia ex otoq che pon tuj Jerusalén.

³Atzun kye tzaj kyma'n weye: Aqeju o che aj tuj Babilonia ex o che pon tuj Judá ate' tuj nim b'is ex in che ch'ixwi; atzunju muro tok ti'jele tnam Jerusalén jumajx o b'aj xitj, ex qe tlamel tnam o che b'aj tz'e'y tu'n q'aq', che chi.

⁴Tejtzun nb'inteye tqanil lu, in kub' qe'ye oq'el ex in b'isune kab' ox q'ij; kub' nyo'ne we'yaj ex in ok tene na'l Dios aju at tuj kya'j.

⁵Ex xi nma'ne te tuj nna'j Diose kyja': Nman Dios ata tuj kya'j, aya Dios ma' toklen ex xob'ajilxix, minti' in b'aj tch'expu'n tyola aju in kyaj b'ant ti'j, ex at tq'aq'b'il tk'u'ja kyi'j qeju in che k'ujlan teya ex in che japun qe tmandamyenta kyu'n.

⁶Ja'lo in chin kub'sane twitza tu'n ttzaj tb'i'na nna'j Diose q'ijl ex qonik'an kyi'j qe tmajena aqe aj Israel. Aqo'ye aj Israel ma qo b'inchane il twitza; aqine kyuk'ix qeju at nxilene kyuk'il ma qo b'inchane il.

⁷Nim mya b'a'n ma qb'inchaye twitza; minti' ma che japun qe tmandamyenta qu'ne, kyuk'ix qe tleya ex qe tkawb'ila, aqeju e tzaj tma'na te tmajena Moisés.

⁸Na'ntza aju yol tzaj tma'na te tmajena Moisés, chiya kyja': Qa ma che b'inchane il, che b'ajel sputune kyuj txqantl nasyon;

⁹qatzun ma che ajtz meltz'aje juntl maj wuk'ile ex qa ma txi kynimane qe nmandamyente ex qa ma che japun kyu'ne, maske kysputun kyib'e max ttxa'npun tx'otx', che tzajel wi'ne ma chixin tu'n kyule juntl maj tuj lugar sk'o'maj wu'ne, jatum tu'n ttzaj na'n nb'iye tuj, chitzuna, tmaya te Moisés.

¹⁰Tmajena qo'ye ex etzan qo'ye tu'na, ex o qo kolpete tu'na tu'n nimxix tipumala.

¹¹In chin kub'sane twitza Nman, tu'n ttzaj tb'i'na nqanb'etze ex kyqanb'etz qe tmajena, aqeju at kygan tu'n tjaw nimsa'n tb'iya kyu'n. O'kx in chin qanine teya tu'n b'a'n tel nb'eye ex tu'n ntzaj xtaline tu'n rey, nchiye tuj nna'j Diose. Porke aqine toktoq te q'ol tk'a rey Artajerjes.