Read kumam Nehemías 8 Bible Online

Nehemías 8 - kumam bible

Nehemías 8

¹oktzun kychmon kyib' kykyaqil xjal tuj plas tkub' niqayin twitz tlamel tnam, Ttzi ja A' tb'i, ex xi kyma'n te Esdras aju xnaq'tzal ti'j ley, tu'n ttzaj ti'n libro te ley aju kyaj ttz'ib'an Moisés, aju otoq tzaj tq'o'n Qman kye aj Israel.

²Tuj tnejel q'ij te twuqin xjaw, ate Esdras aju tok te pal, ul ti'n libro te ley tuj b'uyj tib'il jatum b'aj kychmon kyib' qe xinaq ex qe xu'j, kyuk'ix kykyaqil qeju otoq tz'ok kynab'l;

³jaw t-sch'i'n Esdras libro te ley kywitz kykyaqil xjal, tzyet-x te prim ex kukx t-sch'in tejxi tpon chilkuq'ij, ex atzun kub' we' twitz plas tkub' niqayin ttxlaj tlamel tnam Ttzi ja A' tb'i. Kykyaqil xjal in che b'in ti'j ley tej tjaw t-sch'i'n.

⁴Ate Esdras aju xnaq'tzal ti'j ley, wa'ltoq tib'aj jun wa'lb'il tz'lom aju otoq kub' b'incha'n tu'n tajb'en tuj q'ij lu, ex tuj tb'anq'ab' wa'lqetoq Matatías, Sema, Anías, Urías, Hilcías ex Maasías. Atzun tuj tnayaj e kub' ten Pedaías, Misael, Malquías, Hasum, Hasbadana, Zacarías ex Mesulam.

⁵Kub'tzun tjaqo'n Esdras libro te ley kywitz kykyaqil xjal, ex tu'nju ma' tjaw aju wa'lb'il twitz kya'j, kyja'tzun q'ancha'l kye kykyaqil xjal. Tejtzun tjaqet libro, kykyaqil xjal e kub' we'.

⁶Oktzun ten Esdras nimsal tb'i Qman aju Dios ma'xix toklen, ex kykyaqil xjal jaw kyi'n kyq'ab' twitz kya'j ex kyma: Ikxwitju, ikxwitju; e kub' ẍmeje' tejxi tpon takl tib'aj kywitz max twitz tx'otx' ex e ok ten k'ulul te Qman.

⁷Atzun qe aj Leví: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán ex Pelaía, atzun qe jlu e je'x chik'b'ante tley Dios kye xjal, atzun kye xjal ax wa'lqetoq tujx kylugar.

⁸Jaw kysch'i'n aj Leví aju in tma'n tuj libro te tley Dios tuk'il tq'ajq'ajel kywi' kyuw, ex xi kychik'b'a'n aju in tma'n tuj libro tu'n tel kynik' xjal cabalxix ti'j.

⁹Kykyaqil xjal e ok ten oq'el tej kyb'inte aju in tma'n ley, atzunte Nehemías aju gobernador, tuk'ix Esdras aju xnaq'tzal ti'j ley ex pal, kyuk'ix aj Leví, aqeju e je'x chik'b'ante ley kye xjal, xi kyma'n kye kykyaqil tu'n mi'n kyb'isun ex tu'n mi'n kyoq', porke aju q'ij lu pa'maj tu'n tajb'en te k'ulb'il te Dios, aju Kydios.

¹⁰Ax ikx xi tma'n Nehemías kye: Kyaje ex che chyo'ne ti'j tb'anil chib'j, che k'ane ta'l twitz uva chi' ex kyq'onxe ch'in kye qeju minti' b'animaj kye, porke aju q'ij lu, jun q'ij pa'nmaj tu'n Qman tu'n tajb'en te k'ulb'il te. Mi'n che b'isune, porke aju tzalajb'il tu'n Qman in tq'o'n kyipumale.

¹¹Ax ikx qe aj Leví xi kyq'uqb'a'n kyk'u'j xjal, xi kyma'n kye tu'n mi'n kyq'ajt ex tu'n mi'n kyoq', porke aju q'ij lu pa'nmaj tu'n Qman tu'n tajb'en te k'ulb'il te.

¹²Kykyaqiltzun xjal e je'x wa'l ex k'al, ex xi kyq'o'n kywa qeju minti' kywa b'animaj ex kub' kyik'san jun nintz ninq'ij tu'nju cabalxix el kynik' ti'j ju otoq tzaj xnaq'tza'n kye.

¹³Tuj juntl q'ij kykyaqil qe nejenel kye junjun k'loj xjal at kyxilen kyxolx, kyuk'ix qe pal ex qe aj Leví, ok kychmon kyib' tuk'il Esdras aju xnaq'tzal ti'j ley, tu'n kyxnaq'tzan ti'j ju in tma'n ley,

¹⁴ex e ok noj ti'j jun yol tz'ib'an tuj ley jatum in tma'n aju otoq tma Qman te Moisés, qa tuj twuqin xjaw il ti'j tu'n tkub' kyik'sa'n aj Israel ninq'ij, kyq'ijlalil qe tal ja t-xaq tze'yin kywi' ex il ti'j tu'n kyten kyuj.

¹⁵Extzun tqanil kyuj kykyaqil tnam ex tuj Jerusalén, tu'n kyxi' xjal tuj k'ul jyolte t-xaq olivo, t-xaq q'atxab', t-xaq xa'j ex txqantl tze' polin kyxaq, tu'n tb'aj kyb'incha'n qe tal ja t-xaq tze'yin kywi', ik tza'n tz'ib'amaj tuj ley.

¹⁶E extzun qe xjal ex e ul meltz'aj q'i'n t-xaq tze' kyu'n, tu'n kyb'ant tal ja t-xaq tze'yin kywi', twi kyja ex qa ttxa'n kype'n teyle junjun, ax ikx ttxa'n tpe'n tja Dios ex tuj plas tkub' ttxlaj tlamel tnam aju tok tb'i Ttzi ja A', ax ikx tuj juntl plas tkub' ttxlaj tlamel tnam, aju tok tb'i Ttzi ja te Efraín.

¹⁷Kykyaqil aj Israel, aqeju otoq che etz tuj Babilonia ex otoq che ul tuj Jerusalén, jaw kyb'incha'n qe tal ja t-xaq tze'yin kywi', ex axtzun e ten kyuj. Atxix tuj tq'ijlalil Josué aju tky'ajal Nun, b'ajxtoq b'ant jun maj ik tza'nju o b'ant tuj q'ij lu, ex nimxix e tzalaj qe xjal.

¹⁸Tuj enter wuq q'ij kub' kyik'sa'n ninq'ij ex tkyaqil q'ij jaw t-sch'i'n Esdras junjun tnej yol in tma'n tuj libro te tley Dios; tzyet tu'n tuj tnejel q'ij ex pon b'aj tuj mankb'il q'ij, ex tuj twajxaqin q'ij ok jun b'uyj tib'il kyu'n ma' t-xilen, ik tza'n tz'ib'an tuj ley.