Read kumam Ester 3 Bible Online

Ester 3 - kumam bible

Ester 3

¹Te tib'ajxi jlu ok q'o'n Amán tu'n rey Asuero te nejenel kyxol kykyaqil qeju ate' ttxlaj. Ate Amán tky'ajal Hamedata ex tiyjil Agag.

²Kykyaqil qeju in che ajb'entoq tuj tja rey in che kub' ẍmeje' ex in kub' mok'e' kywi' te nimb'il te Amán ok ti'k b'et, ex qa ok kypon twitz, porke iktzun tten q'ma'maj tu'n rey; atzunte Mardoqueo minti' xi tniman aju orden lu.

³Atzun kye xjal ma' kyoklen ttxlaj rey xi kyqanin te Mardoqueo tiqu'n minti' in xi tniman aju orden tzaj tq'o'n rey.

⁴Ex tkyaqil q'ij in xi kyqanin ax yol, atzunte minti' in xi tniman aju in tzaj kyma'n te. E je'xtzun q'malte jlu tuk'il Amán, tu'ntzun tkyil alkye tu'n tb'inchanjtz ti'j tu'nju otoq txi tma'n kye qa Judiy xjalte.

⁵Tejtzun tel tnik' Amán ti'j minti' in kub' ẍmeje' ex minti' in kub' mok'e' twi' Mardoqueo twitz, tzaj nimxix tq'oj,

⁶ex tu'nju otoq tb'i Amán alkye ttanmi Mardoqueo, minti' kub' tuj twitz tu'n tkub' tb'yo'n o'kx te Mardoqueo, ex kub'tzun ten ximal ti'j tza'n tten tu'n kykub' b'aj tb'yo'n kykyaqil xjal Judiy, aqeju najlqe tjaq' tkawb'il rey Asuero.

⁷Tuj tnejel xjaw te ab'q'i ex qa aju xjaw Nisán tb'i, tej otoq b'ant kab'laj ab'q'i ttzyetlen tkawin rey Asuero, jaw kyi'n swert twitz Amán tu'ntzun tel kynik' ti'j alkye q'ij ex alkye xjaw tu'n tjapun aju otoq kub' t-ximan, ex tk'ulb'aku tu'n swert qa tu'n tb'ant jlu tuj oxlaj tajlal tkab'lajin xjaw, ex qa aju xjaw Adar tb'i.

⁸Xitzun tma'n Amán te rey Asuero: —Tat Rey, at jun k'loj xjal kysputun kyib' kyuj kykyaqil partament ate' tjaq' tkawb'ila kypa'n kyib' kyi'j txqantl; junxitl kyley kywitz txqantl tnam, ex minti' in che japun qe tleya kyu'n. Kyja'tzun mya b'a'n tu'n kukx kyanq'in xjal lu, Tat Rey.

⁹Kyja'tzun qa b'a'n tuj twitza, q'o'n exa jun orden tu'n kykyim kykyaqil xjal lu; atzun weye jaku txi nq'o'ne wuq mil tuk' jwe' syent quintal saq pwaq kye qe k'u'l pwaq, tu'n tokx kyq'o'n tuj k'ub'l tq'inumab'la.

¹⁰Eltzun ti'n rey Asuero t-xmulq'ab' ex xi tq'o'n te Amán aju tky'ajal Hamedata ex tiyjil Agag, aju aj q'oj kyi'j xjal Judiy,

¹¹ex xi tma'n te: —E tkyaj ten pwaq te teya, ex atzunju tnam lu, b'inchama ti'j noq alkye tajb'ila tu'n tb'ant.

¹²Tuj oxlaj tajlal tnejel xjaw te ab'q'i e txkettzun qe aj tz'ib'al te rey, ex atzun qe e kub' tz'ib'ante qe orden e xi tma'n Amán, tu'ntzun t-xi q'o'n kye qe xjal at kyoklen ttxlaj rey ex kye qe gobernador ate' kyuj kykyaqil partament ex kye qe nejenel ate' tuj junjun tnam. Aqeju orden lu e kub' tz'ib'an tuj tyol teyle junjun partament ex tuj tyol teyle junjun tnam, tok tpirm rey Asuero kyi'j ex seyarimaj qe tu'n t-sey rey.

¹³E je'xtzun sama'n naj qe sanjel q'olte u'j kyuj kykyaqil partament ate' tjaq' tkawb'il rey. Ex kyuj qe u'j lu in tma'n qa tuj junx q'ij tu'n kynaj kykyaqil xjal Judiy; qe ku'xun, qe tij xjal, qe k'wa'l ex qe xu'j, ex tu'n tel kyi'n tkyaqil kyq'inumab'l. Ex atzun tu'n tb'ant jlu tuj oxlaj tajlal tkab'lajin xjaw, ex qa aju xjaw Adar tb'i.

¹⁴Xi sama'n jun copya ti'j ley lu kyuj kykyaqil partament ex kyuj kykyaqil tnam, tu'ntzun tjaw sch'i'n kywitz xjal ex tu'n kyb'inte, tu'ntzun tb'ant kyten tuj q'ij b'animaj ti'j.

¹⁵Tuj tnam Susa jaw sch'in naj aju ley lu, ex qe sanjel jurat naj e je'x sipal kye u'j ik tza'nx otoq tma rey. Atzunte rey tuk'ix Amán e kub' qe' k'al vin, ex qe xjal ate' tuj tnam Susa tzaj t-xob'il kyi'j ex tzaj b'aj kyk'u'j.