Read kumam Ester 4 Bible Online

Ester 4 - kumam bible

Ester 4

¹Tej tb'inte Mardoqueo ti'j tkyaqilju otoq b'aj, el t-sb'it'un t-xb'alun ti'j te jun techal tb'is, ex ok tq'o'n t-xb'alun ch'i'x twitz, jax tchitun tza'j tuj twi' ex b'aj tb'etin tuj tnam in sch'in wen tu'n ta'w tb'is,

²ex kyja'x tten tej tpon max ttzi tja rey. Axtzun kub' we', ex minti'toq q'o'n amb'il tu'n tokx jun xjal tuj tja rey tok t-xb'alun ch'i'x twitz.

³Ax ikx kyuj kykyaqil partament jatum pon tqanil ley otoq txi tq'o'n rey, tzaj nimxix b'is kyxol xjal Judiy; tu'ntzunju kub' kyyo'n we'yaj, e ok ten oq'el ex e jaw ayayan, ex nimku kye e kub' tan tuj tza'j ex ok kyq'o'n kyxb'alun ch'i'x twitz.

⁴Qe majen xu'j in che ajb'en te Ester aju t-xu'jil rey, kyuk'ix qe xinaq ate' te xq'uqil te, xi kyma'n te Ester ti'j aju in tb'incha'ntoq Mardoqueo. Tzajtzun nimxix tb'is Ester ex xi t-sama'n xb'alun te, tu'ntzun tel tch'expu'n t-xb'alun ch'i'x twitz tok ti'j, atzunte Mardoqueo minti' xi tniman.

⁵Txkettzun Hatac tu'n Ester, ate Hatac jun kyxol qe xq'uqil tja rey otoq tz'ok tq'o'n rey tu'n tajb'en te Ester, ex xi tma'n Ester te tu'n t-xi' ke'yilte Mardoqueo ex tu'n t-xi tqanin te ti in b'ajtoq ex tiqu'n in tb'incha'ntoq jlu.

⁶Xi'tzun Hatac yolil tuk'il Mardoqueo, aju ma ta'toq tuj ttxa'n pe'n tkub'sa'n tumlal twitz tlamel tja rey.

⁷Xitzun tchik'b'a'n Mardoqueo ti'j tkyaqilju in b'aj, ax ikx xi tma'n ti'j saq pwaq otoq txi ttziyan Amán tu'n tokx tq'o'n tuj k'ub'l tq'inumab'l rey qa ma che kub' b'aj b'yo'n kykyaqil xjal Judiy.

⁸Ax ikx xi tq'o'n Mardoqueo jun copya te ley te Hatac, aju otoq tz'ex chik'b'a'n tuj tnam Susa, jatum tz'ib'an qa tu'n kykub' b'aj b'yo'n kykyaqil xjal Judiy, tu'ntzun t-xi tq'o'n Hatac te Ester ex tu'n tb'inte Ester ti'j tkyaqil jlu. Ax ikx xi tma'n te Hatac tu'n t-xi tma'n te Ester tu'n t-xi' yolil tuk'il rey, tu'n tkub'san twitz kyi'j qe t-xjalil, tu'n mi'n kynaj.

⁹Ajtzun meltz'aj Hatac ex xi tchik'b'a'n tkyaqil te Ester, aju otoq tma Mardoqueo.

¹⁰Xitzun t-sama'n Ester juntl maj Hatac tuk'il Mardoqueo q'malte tzaq'web'l lu:

¹¹—Kykyaqil xjal in che ajb'en te rey ex qeju najlqe kyuj qe partament ate' tjaq' tkawb'il, b'a'n kyu'n at jun orden in tma'n kyja': Qa at jun xinaq ex qa jun xu'j ma pon twitz rey max twitz ja te tujxi, ex qa mya txko'n otoq txi' tu'n rey, kb'el tcastiw tu'n tkyim; o'kx ju xjal mlay kub' b'yo'n qa ma tzaj tnuqpi'n rey tbastón q'an pwaq ti'j. Ik tza'n weye ma b'ant-xi jun xjaw na'nx ntxkete tu'n rey, chi Ester.

¹²Tejtzun tb'inte Mardoqueo aju tzaq'web'l tu'n Ester,

¹³atzunte aj t-sama'ntl ju yol lu: Mi'n ximana ti'j qa o'kxku aya jun xjal Judiy kkletela noq tu'nju tokxa tuj tja rey.

¹⁴Qa ma kub' t-xk'ayin tib'a tu'n tyolina twitz rey qi'je, jaku tzaj kolb'il kye xjal Judiy tuj juntl lugar, atzun teya ex qe terman qtzan tmana che kymele. B'alo tu'n jlu ma tz'oka te t-xu'jil rey, tu'n tonina quk'ile tuj ju mya b'a'n ktzajel qib'aje lu.

¹⁵Xitzun t-sama'ntl Ester ju tzaq'web'l lu te Mardoqueo:

¹⁶Chmo'n oka kykyaqil xjal Judiy ate' tuj tnam Susa tu'ntzun tkub' kyyo'n we'yaj tu'n nlaje, mi'n che wa'ne ex mi'n che k'ane tuj enter ox q'ij ex ox qonik'an; ax ikx weye tzalu kyuk'ix qe nmajene xu'j kb'el qyo'ne we'yaj, ex te tib'ajxitzun chin xe'le yolil tuk'il rey, maske chin ik'ele tib'aj ley. Qatzun ma chin kub' b'yo'ne, malo b'ant-x nkyime, chi Ester.

¹⁷Xi'tzun Mardoqueo ex b'ant tu'n ik tza'nx otoq tma Ester.