Read kumam Ester 7 Bible Online

Ester 7 - kumam bible

Ester 7

¹E je'x rey tuk'ix Amán tuj nintz wa'n aju otoq b'aj tb'incha'n Ester.

²Tuj tkab'in nintz wa'n lu, tej matoq in che k'an vin, xi tma'ntl rey te Ester: —Qanintza weye noq alkye tajb'ila ex jaku txi nq'o'ne teya; maske ma tzaj tqanina mijku nkawb'ile jaku txi nq'o'ne teya.

³Atzunte Ester xi ttzaq'we'n: —Tat Rey, qa axix tok at tk'ujlalila wi'je ex qa b'a'n jaku tz'ela tuj twitza, o'kx wajb'ile tu'n t-xi nqanine teya tu'n tkolina wi'je ex kyi'j qe nxjalile tu'n mi'n qkyime;

⁴porke tza'nx qe nxjalile, ax ikx weye ma qo'x k'ayine tu'n qkub' b'yo'ne tu'n qnaje te jumajx. Noqwit ma qo'x k'ayine te majen, minti'wtlo ma nmaye jun yol teya, ex tu'nju ma kub' t-ximan aj q'oj tu'n tb'inchante mya b'a'n qi'je, knajel nim tq'inumab'la ex mlay chjet jlu tu'n, kyja'tzun ma txi nma'ne jlu teya.

⁵Atzunte rey Asuero xi tqanin te: —¿Alkyetzun, ex jatum ta' aju xjal ma kub' ximante tu'n tb'inchante jlu?

⁶Xi ttzaq'we'n Ester: —Aju yajlal qeye ex aj q'oj qi'je, atzun Amán aju xjal jumajx mya b'a'n. Tejtzun tb'inte Amán jlu, tzaj nimxix t-xob'il twitz rey ex twitz Ester.

⁷Atzunte rey Asuero tzaj nimxix tq'oj, jaw we' jatum nno'ktoq nintz wa'n ex xi' t-xol tqan b'ech tkub' twitz tja. El tnik' Amán ti'j qa tu'n tkub' b'yo'n tu'n rey, kyja'tzun ax kyaj ten tuja tu'n tkub'san twitz Ester tu'n mi'n tkub' b'yo'n.

⁸Tejtzun tul meltz'aj rey tajtzlenxi t-xol tqan b'ech, okxtzun juntl maj tuj ja jatum otoq b'ant nintz wa'n, o til lu Amán ẍmejl tkub' ttxlaj q'uqb'il jatum qejltoq Ester, ex xitzun tma'n rey te: —¿Maj ikx tajb'ila tu'n tkub' tana tuk'il Ester nwitzxe ex tujx njaye? Noqx nb'ajku tma'n rey qe yol lu, qe xq'uqil te rey ok kymaqsi'n twitz Amán.

⁹Attoq jun kyxol qeju xq'uqil te rey, Harbona tb'i, tma kyja': —Tat Rey, ma tja Amán ya b'animaj jun tze' te 25 var twa'l, aju tu'nx Amán xi tma'n tu'n tjaw b'inchet tu'n tjaw yob'it Mardoqueo ti'j, aju tzaj tq'o'n tqanil tu'n tkleta ex tu'n mi'n tkub' b'yo'na. —Axni kyyob'in jawe Amán ti'j, chi rey, xi tma'n.

¹⁰Kyja'tzun tten jaw yob'in Amán ti'jx tze' aju otoq b'ant tten tu'n tu'n tjaw yob'it Mardoqueo ti'j. Tu'ntzun jlu o chewix tq'oj rey.