Read kumam Éxodo 12 Bible Online

Éxodo 12 - kumam bible

Éxodo 12

¹O yolin Qman tuk'il Moisés ex Aarón tuj Egipto, chi kyja':

²—Aju xjaw lu k'okel te kyeye te tnejel xjaw. K'okel te tnejel xjaw te ab'q'i.

³Kyq'manxe kye kykyaqil aj Israel kyja': Tuj laj tajlal xjaw lu, teyle te junjun ja xjal ktzajel ti'n jun tal ẍne'l ex qa jun tal chip.

⁴Qatzun nik'xi kyb'aj xjal tuj ja, ex qa mlay che xkye' ti'j tu'n tb'aj tkyaqil tchib'jal tal alumaj kyu'n, ktzajeltzun kytxko'n kyvesin aju mas niqayin ta', ex junx che chyo'l ti'j; kb'el kysipan kyxol ik tza'n kyajlal xjal ex nik'pun che chyo'n.

⁵Aju tal alumaj k'ajb'el, tal tman te jun ab'q'i ex misikyer ch'in tpaltil, qa tal ẍne'l ex qa tal chip.

⁶K'okel kyk'alo'ne okxi tjapun kyajlaj tajlal ax xjaw. Tujtzun q'ij lu teyle te junjun ja xjal aj Israel kb'el tb'yo'n tal alumaj ok tex q'ij.

⁷Ktzajel kyi'n tchk'el tal alumaj, ex k'okel kysu'n ti'j tkyaqil tmarkil tlamel ja jatum che chyo'l ti'j tchib'jal tal alumaj.

⁸Ax qonik'an lu che chyo'l ti'j chib'j txo'n twitz q'aq', junx tuk'il itzaj k'a tchyo'njtz, tuk'ix pan minti' t-samel tuj tu'n tjaw mal tk'u'j.

⁹Misikyer jun piẍ chib'j cha'x kxel kychyo'ne, mi tu'n tjax ta'l, noq o'kx txo'n twitz q'aq'; enter tuk'ix twi', qe tqan ex tuj tk'u'j.

¹⁰Misikyer ch'in kyjel kyq'o'ne te juntl q'ij. Qa at ch'in ma kyaj ten, b'i'x kb'el kypatune tu'n q'aq'.

¹¹Kxel kychyo'ne ik kytene kyja': K'alo'n kyk'u'je wen, ex tok kyxajb'iye, tuk'ix kyky'aqo'che tuj kyq'ab'e, ex jurat naj kxel kychyo'ne, ex atzun q'ij tqanx chin ik'el b'ete, aqine Kymane.

¹²Tujxtzun qonik'an lu chin ik'ele tuj tkyaqil tx'otx' Egipto, che b'el nb'yo'ne qe nej k'wa'lb'aj xinaq tuj kyja teyle junjun aj Egipto, ax ikx qe tnejel kyal alumaj; ex kb'el nq'o'ne kysentens kykyaqil kydios aj Egipto, aqine Kymane.

¹³Aju chik' otoq tz'ok kysu'ne ti'j tmarkil tlamel kyjaye k'ajb'el te jun techal kyi'j qe ja jatum ate'ye. Oktzun tok nke'yine chik', tqanx chin ik'el b'ete, ex mi a'l jun kyeye kymel tu'n k'ixb'isab'l ok kykyim qe tnejel kyky'ajal aj Egipto wu'ne.

¹⁴Ktzajel kyna'ne q'ij lu ex kb'el kyik'sa'ne te ninq'ij te nimb'il weye, aqine Kymane. Kukx kb'el kyik'sa'ne te jumajx, ex wiqinwiq kyjel kyma'ne kye kyk'wa'le.

¹⁵Wuq q'ij che wa'le pan minti' t-samel tuj tu'n tjaw mal tk'u'j; ex b'i'x tuj tnejel q'ij mi'n tentl t-samel pan tuj kyjaye. Alkye jun ma wa'nte pan at t-samel tuj kyuj q'ij lu, k'elex lajet kyxol aj Israel.

¹⁶Tza'nx tuj tnejel q'ij, ax ikx tuj twuqin q'ij, kb'el kychmon kyib'e tuj jun b'uyj xjan. Mi a'l jun k'aq'nal kyuj kab'e q'ij lu, o'kx kywaye b'a'n tu'n tb'ant kyu'ne.

¹⁷Kb'el kyik'sa'ne aju ninq'ij te wab'l pan minti' t-samel tuj tu'n tjaw mal tk'u'j, ex tujtzun ju q'ij lu e je'tz wi'ne tuj Egipto tuj k'lojin kytene; kb'el kyik'sa'ne kykyaqil ab'q'i te jumajx, ex wiqinwiq kyjel kyma'ne kye kyk'wa'le.

¹⁸Te qale tuj kyajlaj tajlal tnejel xjaw ktzyetel tu'n kywa'ne pan minti' t-samel tuj, ex kpol b'aj te qale tuj 21 tajlal ax xjaw.

¹⁹Misikyer t-samel pan ktel tuj kyjaye kyuj wuq q'ij lu, ex alkye jun ma wa'n pan at t-samel tuj tu'n tjaw mal tk'u'j, k'elex lajet kyxol aj Israel, qa stranjer xjal ex qa ax aj Israel.

²⁰Kyja'tzun, mi'n che wane pan at t-samel tuj tu'n tjaw mal tk'u'j. Noq jatum che najale che wa'le ti'j pan minti' t-samel tuj, chi Qman te Moisés ex Aarón.

²¹E tzajtzun ttxko'n Moisés kykyaqil tij xjal kyxol aj Israel ex xi tma'n kye kyja': Kyxi'ye ex kyi'ntze jun tal tman ẍne'l ex qa jun tal chip te teyle junjun ja xjal, ex kyb'yonkuye tu'n tik'set Xjan Q'ij, tej tqanx tik' b'et Qman.

²²Kb'elex kyq'o'ne tchk'el tuj jun palangan. Kyi'ntze jun che'l tq'ab' tal tze' hisopo tb'i, kymu'n ku'xe tuj chik' ex kysu'nke ti'j tkyaqil tmarkil tlamel ja. Mi jun kyeye k'eletz tuj tja qa na'nxtoq tkub' q'ij.

²³Ok tik' Qman k'ixb'isal kye aj Egipto tu'n kamik, k'okel tke'yin aju chik' ti'j tmarkil tlamel kyjaye, ex tqanx k'ik'el ttzi ja lu. Tu'ntzun jlu mlay taq' Qman amb'il te q'ol kamik tu'n tokx tuj kyjaye.

²⁴Kxel kynimane aju mandamyent lu, ax ikx il ti'j tu'n kyniman qe kyiyjile che ul itz'j te tib'ajxi, ex k'okel te jun ley te jumajx.

²⁵Ok kyokxe tuj tx'otx' ktzajel tq'o'n Qman kyeye ik tza'n o tzaj ttziyan, kukx kb'el kyik'sa'ne jlu.

²⁶Ok ttzaj kyqanin kyk'wa'le kyeye: ¿Ti t-xilen aju in kyb'incha'ne lu?, qa che chi,

²⁷kxe'ltzun kytzaq'we'ne kyja': Aju tal alumaj lu in kub' b'yet tu'n ttzaj na't Xjan Q'ij te Qman. Tej kyk'ixb'iset aj Egipto tu'n kamik, tqanx ik' b'et Qman ttzi qjaye tuj Egipto, aqo' aj Israel, ex kyja'tzun o qo klete, che chikuye kye kyk'wa'le, chi Moisés kye. Kub'tzun mok'e' kywi' aj Israel, ex e k'ulun te Qman.

²⁸E je'xtzun ex kyb'incha tkyaqil ik tza'nx otoq tzaj tma'n Qman te Moisés ex Aarón.

²⁹Tmij aq'b'il tk'ixb'isa Qman tu'n kamik qe nej k'wa'lb'aj xinaq tuj tja teyle junjun aj Egipto, tzajx qe' ti'j tnejel tky'ajal Faraón in kub' qe'toq tuj tq'uqb'il, pon b'aj ti'j tnejel tky'ajal xjal tokxtoq tuj pres, ax ikx kykyaqil qe nej kyal alumaj e kyim.

³⁰Jawtzun we' Faraón te qonik'an lu kyuk'ix qeju attoq kyoklen ttxlaj, ex kykyaqil aj Egipto e jaw oq' wen tu'n ta'w kyb'is, porke tuj tkyaqil tx'otx' Egipto minti' jun ja minti'wt jun xjal kyim tuj.

³¹Ax qonik'an lu e je'x txokb'aj Moisés ex Aarón tu'n Faraón, ex xi tma'n kye kyja': —Kyexe kyuk'ix kykyaqil aj Israel, ex kypa'mil kyib'e kyi'j qe nxjalile. Kyxi'ye k'ulul te Kymane aju Kydiose, ik tza'n o kymaye.

³²Kyi'nxe qe kyẍne'le ex qe kywakẍe ik tza'n o kymaye, ex kyexe. Ax ikx chin kyky'iwlankuye, chi Faraón.

³³E ok ten aj Egipto lajwersil kye aj Israel tu'n kyetz naj tuj tx'otx' Egipto, tu'nju o kyma: Qo kymel qkyaqil, che chi.

³⁴Ik' kyi'n aj Israel tq'otjil kypan na'nxtoq t-xi' t-samel tuj, okx kypotzin tal chok tuj xb'alun, ex jax kyq'o'n twi kysemil.

³⁵O kyb'incha ik tza'n otoq tma Moisés; xi kyqanin kye aj Egipto tu'n ttzaj kyq'o'n kye qe ti'xti q'an pwaq ex saq pwaq kytx'otx'il, tuk'ix xb'alun.

³⁶Tu'n Qman b'a'n e e'la aj Israel tuj kywitz aj Egipto, ex tzaj kyq'o'n aju xi kyqanin kye. Kyja'tzun tten etz kyi'n aj Israel nimku ti'xti wi'yilxix kye aj Egipto.

³⁷E je'tz aj Israel tuj Ramesés tu'n kyul tuj Sucot, b'alo qaq syent mil xinaq aqeju otoq pon kyipun. Minti' e ok qe xu'j te tajlal, mi qe k'wa'l.

³⁸Ax ikx e je'tz nimku txkaj xjal kyuk'il, kyuk'ix nim ẍne'l ex nimxix wakẍ.

³⁹E ok ten txo'l kywa ti'j tq'otjil pan etz kyi'n tuj Egipto, aju minti'toq t-samel tuj, tu'nju noq elakyim e je'tz lajo'n kyu'n aj Egipto, ex minti'toq ten amb'il kyi'j tu'n tokx kyq'o'n t-samel tuj.

⁴⁰Otoq che ten aj Israel 430 ab'q'i tuj Egipto.

⁴¹Kyb'ajlenxi qe 430 ab'q'i lu, ax q'ij e je'tz kykyaqil xjal etzan tu'n Qman, tuj k'lojin kyten.

⁴²Tuj qonik'an lu o kwentin Qman kyi'j tu'n kyetz tuj Egipto. Atzun qonik'an lu te Qman ex te nimb'il te; k'ajb'el kye aj Israel te itz'leb'l, ex kukx kb'antel kyu'n te jumajx.

⁴³Tzaj tma'n Qman te Moisés ex te Aarón kyja': —Atzun qe ley lu tu'n tik'set Xjan Q'ij tej tqanx tik' b'et Qman: Mi jun stranjer xjal kchyo'l ti'j alumaj in chyo'njtz tuj ninq'ij lu.

⁴⁴Aju majen laq'omaj tu'n pwaq, b'a'n tu'n tchyo'n ti'j, ex qa otoq b'aj sircunsidarit;

⁴⁵atzunju majen noq nnu'l aj aq'nal ex qe stranjer xjal, mlay che chyo'n ti'j.

⁴⁶Kxel chyo't tuj junx ja. Misikyer jun piẍ tchib'jal k'eletz tuj ja, ex mi'n kub' toqet tb'aqil.

⁴⁷Iklex kb'antel jlu kyu'n kykyaqil aj Israel.

⁴⁸Qatzun at jun stranjer xjal ma najan kyxole ex taj tu'n tkub' tik'sa'n ninq'ij lu te nimb'il te Qman, il ti'j tu'n t-sircunsidarit nej kyuk'ix kykyaqil xinaq ate' tuj tja; b'a'ntzun tu'n tik'san ninq'ij lu tu'nju otoq tz'ok mer ik tza'n jun kyxjalile. Ex mi jun xjal mya sircunsidarimaj kchyo'l ti'j alumaj lu.

⁴⁹Axtzun qe ley lu che ajb'el kye aj Israel ex kye stranjer xjal, aqeju ax najl kyxole, chi Qman kye.

⁵⁰O kyb'incha kykyaqil aj Israel ik tza'n otoq tma Qman te Moisés ex te Aarón.

⁵¹Axtzun q'ij lu e je'tz ti'n Qman qe aj Israel tuj Egipto tuj k'lojin kyten.