Read kumam Éxodo 16 Bible Online

Éxodo 16 - kumam bible

Éxodo 16

¹E je'tz kykyaqil aj Israel tuj Elim, ex tuj 15 tajlal tkab'in xjaw e ul tuj tzqij tx'otx' Sin, tej otoq b'ant jun xjaw kyetzlen tuj Egipto. Atzun tkub' tx'otx' lu t-xol Elim ex Sinaí.

²Kykyaqil aj Israel e ok ten yolil mya b'a'n ti'j Moisés ex ti'j Aarón tuj tzqij tx'otx' lu,

³ex xi kyma'n kye kyja': —Maswitlo b'a'n noqwit o qo kyime tu'n Qman tuj tx'otx' Egipto, tej in qo kub' qe'toqe wa'l kyxol qk'ile nojnitoq qe tu'n chib'j, tej in qo nojxixtoqe wen tu'n wab'j. Atzun kyeye, ma qo tzaj kyi'ne tuj tzqij tx'otx' lu tu'n qkyime qkyaqile tu'n we'yaj, che chi.

⁴Tzajtzun tma'n Qman te Moisés kyja': —Ktzajel nchitune wab'j twitz kya'j, atzun kye xjal che eletz chmolte te kykyaqil q'ij, ex o'kx kywa aju in b'aj te jun q'ij kjawil kychmo'n, tu'ntzun kyok tuj malb'il wu'ne, qa kxel kyniman nyole ex qa mi'n.

⁵Atzun tuj tqaqin q'ij b'i'x kjawil kychmo'n kywa te kab' q'ij, chi Qman.

⁶Xitzun kyma'n Moisés ex Aarón kye kykyaqil aj Israel: Te qale ja'lo k'elel kynik'e ti'j, ate Qman etz q'inte kyeye tuj tx'otx' Egipto;

⁷atzun te prim nchi'j ok kyila'ye tajwalil Qman, tu'nju ma tb'i in che yoline mya b'a'n ti'j. Atzun qeye, ¿ti qxilene tu'nju in che yoline mya b'a'n qi'je? Che chi.

⁸Ax ikx tmatl Moisés: Ktzajel tq'o'n Qman chib'j te kychi'ye qale ja'lo; atzun te prim nchi'j ktzajel tq'o'n kywaye nimxix, tu'nju ma tb'i in che yoline mya b'a'n ti'j. Atzun qeye, ¿ti qxilene? Mya qi'je in che yoline mya b'a'n, noq o'kx ti'j Qman, chi Moisés.

⁹Xi tma'n Moisés te Aarón kyja': —Q'manxa kye kykyaqil aj Israel tu'n kytzaj laq'e' twitz Qman, porke ma tb'i Qman in che yolin xjal mya b'a'n ti'j, chi Moisés.

¹⁰Matoq in yolin Aarón kyuk'il kykyaqil aj Israel, xi kyke'yin tuj tzqij tx'otx', lu tajwalil Qman tzaj tyek'un tib' tuj muj,

¹¹ex tzaj tma'n Qman te Moisés kyja':

¹²—Ma nb'iye in che yolin aj Israel mya b'a'n. Q'manxa kye kyja': Te qale ja'lo che chyo'le chib'j, atzun prim che wa'le okxi kynoje, ex k'eleltzun kynik'e ti'j, aqine Kymane aju Kydiose, chi Qman.

¹³Tejtzun tok qax e ul tz'uchin ex b'aj noj ti'jele kycampament xjal kyu'n; atzun te prim tzaj tq'ab' che'w ex kub' ti'jele campament.

¹⁴Tej tkub' naj tq'ab' che'w, at jun kyaj ten twitz tx'otx', tal ch'intoq ex tal se'wtoq, ik tza'n ttxa che'w.

¹⁵Tejtzun tkyil aj Israel kyma kyxolx: ¿Titzun jlu? Che chi, tu'nju minti' ojtzqi'ntoq kyu'n. Xi ttzaq'we'n Moisés kye: —Atzun wab'j jlu aju ma tzaj tq'o'n Qman kyeye tu'n t-xi kywa'ne.

¹⁶Atzun jlu ma tzaj tma'n Qman: Kjawil kychmo'ne o'kx aju in b'aj kyu'ne tuj jun q'ij, jun k'oẍ te teyle junjun xjal tuj tja.

¹⁷B'anttzun kyu'n aj Israel ikju. At junjun jaw tchmo'n nim, ex at junjun noq ch'in.

¹⁸Kub' kymalo'n tuj k'oẍ. Aqeju jaw kychmo'n nim, minti' kyaj ten kye, ex aqeju jaw kychmo'n noq ch'in, akux o kanun kye. Teyle junjun jaw tchmo'n ik tza'nx twa in b'aj.

¹⁹Ax ikx xi tma'n Moisés kye: Mi jun kyeye kyaj tklo'n twa te juntl q'ij.

²⁰At junjun minti' xi kyniman tyol Moisés, kyaj kyklo'n kywa te juntl q'ij, b'i'x e tzaj poq'l ẍuq' tuj, ex o tzuwix. Tzaj tq'oj Moisés kyi'j.

²¹Kykyaqil prim jaw tchmo'n teyle te junjun aju in b'aj tu'n tuj jun q'ij, ex oktzun tmeq't q'ij in kub' uljtoq aju minti' otoq jaw chmet.

²²Tujtzun tqaqin q'ij jaw kychmo'n kywa te kab' q'ij, kab'e k'oẍ te teyle junjun xjal. Kykyaqil qe nejenel kyxol xjal e ul ex xi kytx'olb'a'n jlu te Moisés.

²³Xitzun tma'n Moisés kye kyja': —Atzun jlu ma tzaj tma'n Qman: Nchi'j, q'ij xjan te ojlab'l, aju ojlab'l pa'nmaj te Qman. Aju wab'j at tu'n ttzq'ajset kyu'ne tuj jorni, kytzq'ajsame ja'lo; ex aju at tu'n tjax ta'l kyu'ne, kytxkon jaxe ja'lo, ex tkyaqilju kyjel ten, kyk'u'nxe te nchi'j chi Moisés.

²⁴Atzun kye xi kyk'u'n te juntl q'ij aju kyaj ten, ik tza'n otoq tma Moisés. Minti' o naj tu'n ẍuq' ex minti' o tzuwix.

²⁵Xi tma'n Moisés kye: Che wa'ne ti'j ja'lo, porke ja'lo q'ij te ojlab'l te nimb'il te Qman. Ja'lo mlay knet wab'j kyu'ne twitz tx'otx'.

²⁶Qaq q'ij che elexe chmolte te, atzun tuj twuqin q'ij, q'ij te ojlab'l, ex mlay knet kywaye twitz tx'otx', chi Moisés.

²⁷At junjun xjal e je'x chmolte kywa tuj twuqin q'ij ex minti' knet kyu'n.

²⁸Tzajtzun tma'n Qman te Moisés kyja': —¿Maj kukx kxe'l kyu'ne tu'n mi'n kyxi kynimane qe nmandamyente ex qe nxnaq'tzb'ile?

²⁹Kyb'intze, aqine Kymane o txi nq'o'ne jun q'ij te ojlab'l. Tu'ntzun jlu, tuj tqaqin q'ij in xi nq'o'ne kywaye te kab' q'ij. Teyle te junjun, ax e tkyaj ten tuj tja, ex mi jun tu'n tex b'etel tuj twuqin q'ij, chi Dios.

³⁰Kyja'tzun e ojlan qe xjal tuj twuqin q'ij.

³¹Aju wab'j jaw kychmo'n aj Israel, maná tb'i ok kyq'o'n. Ik tten ik tza'n tiyjil culantr, saqtoq ke'yin ex iktoq tk'ok'jal ik tza'n pan tuk'il ta'l kab'.

³²Tmatl Moisés: —Atzun jlu ma tzaj tma'n Qman: Kynojsame jun k'oẍ tu'n maná ex kyk'u'nxe tu'n tok kyke'yin qe kyiyjile che ul itz'j te tib'ajxi aju wab'j xi nq'o'ne te kywaye tuj tzqij tx'otx', tej kyetz wi'ne tuj tx'otx' Egipto, chi Qman, chi Moisés.

³³Xi tma'n Moisés te Aarón kyja': Q'intza jun xar ex q'on ku'xa jun k'oẍ maná tuj. Q'on kub'a twitz Qman ex e t-xi k'u't, tu'ntzun tok kyke'yin qiyjil che ul itz'j te tib'ajxi, chi Moisés.

³⁴Kub'tzun tq'o'n Aarón ju xar lu twitz kax k'ub'l tley Dios, tu'n t-xi k'u't ik tza'n otoq tma Qman te Moisés.

³⁵Aqe aj Israel e wa'n 40 ab'q'i ti'j maná, tejxi kypon tuj tx'otx' attoq xjal tuj, tejxi kypon ttzi tmojonil tx'otx' Canaán.

³⁶Jun efa, in xi b'aj laj k'oẍ tuj.