Read kumam Éxodo 17 Bible Online

Éxodo 17 - kumam bible

Éxodo 17

¹E je'tz kykyaqil aj Israel tuj tzqij tx'otx' Sin, e ik' b'et ik tza'n tzaj tma'n Qman kye, ex e kub' ten tuj Refidim, ex minti' knet a' te kyk'a'.

²E jawtzun ilin xjal ti'j Moisés ex xi kyma'n te: —Q'ontza a' te qk'a'ye, che chi. Xi tma'n Moisés kye: —¿Tiqu'n in che ok tene ilil wi'je? ¿Tiqu'n nno'k Qman tuj malb'il kyu'ne? Chi Moisés.

³Tzaj txqetle'n kyi'j xjal ex e ok ten yolil mya b'a'n ti'j Moisés, xi kyma'n te: —¿Ti til o qo etz ti'na tuj Egipto tu'n qkyime tu'n txqetle'n, kyuk'ix qe qk'wa'le ex qe qalune? Che chi.

⁴Oktzun ten Moisés kub'sal twitz Qman ex xi tma'n te kyja': —¿Ti che okel xjal lu wu'ne? Noq ch'ixmi in chin ok xo'ne tu'n ab'j kyu'n, chi Moisés.

⁵Tzajtzun tma'n Qman te kyja': —Nejkuya kywitz ex q'inxa junjun tij xjal aj Israel tuk'ila. Ax ikx q'inxa tky'aqo'cha tuk'ila, aju ajb'en tu'na tej tkub' tpeq'una tib'aj nima tuj Egipto, ex b'et-xa.

⁶Lu qine chin b'el tene twitza tib'aj pik t-xe witz Horeb. K'okel tpeq'una twitz pik ex k'eletz a' tuj. Che k'altzun qe xjal ti'j, chi Dios. Tb'inchatzun Moisés ikju kywitz tij xjal kyxol aj Israel.

⁷Meriba[5] tb'i lugar lu ok tq'o'n, tu'nju kyuw jaw kyyol aj Israel ti'j Qman, ex Masah[6] juntl tb'i ok tq'o'n, tu'nju ok Qman tuj malb'il kyu'n, ex che chi kyja': ¿Atpelo Qman qxol, ex qa mi a'l?

⁸E tzajtzun aj Amalec q'ojlel kyi'j aj Israel tuj Refidim,

⁹ex xi tma'n Moisés te Josué kyja': Sk'o'n jawa txqan xinaq, ex kyxi'ye q'ojlel kyi'j aj Amalec. Atzun weye chin b'el tene twi witz nchi'j tuk'il tky'aqo'ch Dios tuj nq'ab'e.

¹⁰Tb'inchatzun Josué ik tza'n otoq tma Moisés te. Ok ten q'ojlel kyi'j aj Amalec; atzunte Moisés tuk'ix Aarón ex Hur e jax twi witz.

¹¹Ok kyjaw tq'o'n tq'ab' Moisés twitz kya'j, in che kamb'antoq aj Israel, ex ok kykub' ti'n tq'ab', atzun qe aj Amalec in che kamb'antoq.

¹²E sikttzun tq'ab' Moisés. Tu'ntzun jlu tzaj q'i'n jun ab'j tu'n tkub' qe' tib'aj. Kub'tzun qe' tib'aj. Atzunte Aarón ex Hur tzyu'n qe tq'ab' Moisés kyu'n, jun ti'j jun tq'ab' ex jun ti'j juntl. Kyja'tzun o kyipa tq'ab' tejxi tex q'ij.

¹³Kub' kyi'j kykyaqil soldad aj Amalec tu'n spad tu'n Josué.

¹⁴Tzaj tma'n Qman te Moisés kyja': —Tz'ib'an ku'xa jlu tuj jun u'j tu'n ttzaj na't, ex q'manxa te Josué kyja': Te jumajx che b'el nnajsa'ne qe aj Amalec. Mi jun ktzajel na'nte kye twitz tx'otx', chi Qman.

¹⁵Jaw tb'incha'n Moisés jun altar ex ok tq'o'n tb'i kyja': Ate Qman ma tz'ok te nbanderiye,

¹⁶ex tmatl: Tu'nju e jo'k ten qe aj Amalec q'ojlel ti'j Qman, tu'ntzun jlu, kukx kq'ojlel Qman kyi'j wiqinwiq te jumajx.