Read kumam Éxodo 19 Bible Online

Éxodo 19 - kumam bible

Éxodo 19

¹Tuj tnejel q'ij te toxin xjaw kyetzlen aj Israel tuj tx'otx' Egipto, e ul tuj tzqij tx'otx' Sinaí.

²Tej kyik' tuj Refidim, e ul tuj tzqij tx'otx' Sinaí; axtzun e kub' ten tuj tzqij tx'otx' lu ex kub' kyq'o'n kyja t-xe witz.

³Jax Moisés tuk'il Qman Dios, o txokli Moisés tu'n max twi witz ex tzaj tma'n te: Kxel ttx'olb'a'na kye tiyjil Jacob, aqeju aj Israel, kyja':

⁴—O kyile aju o b'ant wu'ne kyi'j aj Egipto ex tza'n tten ma che ul wi'ne wuk'ile tzalu, mer ik tza'n kyib'aj t-xik' t'iw.

⁵Ja'lotzun, qa ma chinx kynimane tuj tkyaqil, ex qa ma japun kyu'ne aju yol kyaj b'ant ti'j wu'ne kyuk'ile, che okeltzune te jun k'loj xjal etzan wu'ne kyxol kykyaqil nasyon, porke weye tkyaqil twitz tx'otx'.

⁶Che okel nq'o'ne te pal tuj nkawb'ile, ex che okele te jun k'loj xjal pa'nmaj te weye. Atzun yol lu kxel tma'na kye aj Israel, chi Dios.

⁷Kub'iltzun Moisés, e tzaj ttxko'n qe tij xjal kyxol aj Israel, ex xi ttx'olb'a'n kye tkyaqil yol otoq tzaj tma'n Qman te.

⁸Xitzun kytzaq'we'n kykyaqil xjal junx: —Tkyaqilju ma tma Qman kb'antel qu'ne, che chi. Xi tma'n Moisés tkyaqil kyyol xjal te Qman.

⁹Tzajtzun tma'n Qman te Moisés: —Chin pole tuk'ila tuj jun piẍ q'eq muj, tu'ntzun kyb'inte xjal ok nyoline tuk'ila ex tu'n t-xi nimana kyu'n te jumajx. Xi tma'ntl Moisés kyyol xjal te Qman,

¹⁰ex tzaj tma'ntl Qman te kyja': —Tku'xa kyuk'il xjal ex q'manxa kye tu'n tb'aj kyxjansan kyib' ja'lo ex nchi'j, ex tu'n tjatz kytx'jo'n ti'j kyxb'alun,

¹¹tu'ntzun b'anin kyten ka'j, porke ka'j chin kub'ile twi witz Sinaí tu'n tkub' nyek'un wib'e kywitz, aqine Kymane.

¹²Q'on kub'a jun techal ti'jele witz, ex q'manxa kye kyja': Ten kykwente kyi'je, mi'n che jaxe twi witz, ex mi'n che pon laq'e'ye t-xe witz, ex alkye jun ma tz'ok makonte te, ax tok kymel.

¹³Alkye jun otoq tz'okx tujxi techal, mi'n txi jun xjal tzyulte te, noq o'kx ab'j ex qa plech kxel xo't ti'j tu'n tkyim; qa xjal ex qa alumaj, noq alkyex, mlay tz'anq'in. Ok tok q'ajtza'n chun nim tuj, maxitzun b'a'n kyjax twi witz, chi Dios.

¹⁴Ku'tz Moisés twi witz, kub'il jatum ate'toq qe xjal, e b'aj t-xjansa'n, ex qe xjal jatz kytx'jo'n ti'j kyxb'alun.

¹⁵Xi tma'n Moisés kye kyja': —Kyb'incham kytene te ka'j. Mi'n kub' kymojb'an kyib'e tuk'il kyxu'jile, chi Moisés.

¹⁶Tej qsqix tuj toxin q'ij, kub' qoptz'aj tqan q'ankyoq, o julin wen ex kub' juke' q'eq muj twi witz. Tzajtzun q'ajt chun kyuw wen, ex tzaj nim t-xob'il kyi'j kykyaqil xjal ate' tuj campament.

¹⁷E jik'tzun tuk'in Moisés qe xjal tu'n kyxi' kanul ti'j Dios ex axtzun e kub' we' t-xe witz.

¹⁸Tkyaqil witz Sinaí in b'uqintoq wen tu'n sib', tu'nju otoq kub'il Qman twi' tuj tqan q'aq'. Aju sib' in b'uqintoq twi witz mer ik tza'n sib' tuj jorni, ex tkyaqil witz in lu'luntoq wen.

¹⁹Noq jawni jaw tq'ajq'ajel twi chun. Oktzun ten Moisés yolil tuk'il Dios, atzunte Dios in tzajxi ttzaq'we'ntoq tuk'il tq'ajq'ajel twi' kyuw.

²⁰Kub'iltzun Qman twi witz Sinaí, ex jax txko'n Moisés tu'n, tu'n tjax twi witz. Jaxtzun Moisés twi witz,

²¹ex tzaj tma'n Qman te kyja': —Tku'xa kyuk'il xjal, ex q'manxa kye tu'n mi'n kyoktz tujtzi techal ex tu'n mi'n kytzaj ke'yilte weye, ok che kymel nimku qa ma che oktz tujtzi techal.

²²Ax ikx qe pal in che tzaj laq'e' ntxlaje, il ti'j tu'n kyxjansante kyib' tu'ntzun mi'n kynaj wu'ne.

²³Xitzun tma'n Moisés te Qman: —Mlay che jatz xjal twi witz Sinaí, porke o tzaj tma'na kyja': Q'on kub'a techal ti'jele witz, ex xjansama, chitzuna.

²⁴Tzaj tma'n Qman te: —Tku'xa ex b'ix ja'wila juntl maj tuk'ix Aarón tuk'ila. Atzun kye pal kyuk'ix qe xjal, mi'n che ik'tz tib'aj techal, ex mi'n che jatz ke'yilte weye, tu'ntzun mi'n kynaj wu'ne, chi Qman.

²⁵Ku'tztzun Moisés ex kub'il kyuk'il xjal, ex xi tma'n yol lu kye.