Read kumam Éxodo 20 Bible Online

Éxodo 20 - kumam bible

Éxodo 20

¹Tzaj tma'n Dios kykyaqil qe yol lu, ex chi kyja':

²Aqine Kymane ex Kydiose aju etz q'inte kyeye tuj tx'otx' Egipto jatum ate'toqe te majen.

³Mi'n che k'ulune kywitz junxitl dios, o'kx nwitze tu'n kyk'ulune.

⁴Mi'n kub' kyb'incha'ne jun tilb'ilal; mi jun tilb'ilal ti'j ju at twitz kya'j, mi jun tilb'ilal ti'j ju at twitz tx'otx' ex mi jun tilb'ilal ti'j ju at tuj mar.

⁵Mi'n che kub' ẍmeje'ye kywitz ex mi'n che k'ulune kywitz, porke aqine Kymane ex Kydiose, ex minti' in kub' tuj nwitze tu'n kyk'ulune twitz juntl dios. Kpol kanun castiw wu'ne kyib'aj qe k'wa'lb'aj, qe tal chmamb'aj ex qe kyxk'a chmamb'aj tu'n tlaj in chin el ik'une kyu'n kyman,

⁶ex kukx ktel tq'aq'b'il nk'u'je kyi'j nimku kyiyjil xjal, aqeju in che k'ujlan weye ex in che japun qe nmandamyente kyu'n.

⁷Mi'n tzaj kyna'ne nb'iye noqx gan, aqine Kymane ex Kydiose, porke kb'el tcastiw xjal wu'ne, aju in tzaj na'nte nb'iye noqx gan.

⁸Kyna'ntze aju q'ij te ojlab'l tu'n tajb'en o'kx te weye.

⁹Qaq q'ij che aq'nale, ex kb'antel tkyaqil kyaq'une,

¹⁰atzunju twuqin q'ij, q'ij te ojlab'l tu'n kyk'ulune weye, aqine Kymane ex Kydiose. Mi jun aq'untl kb'antel kyu'ne tuj q'ij lu. Mi jun kyky'ajale ex mi jun kyme'jele k'aq'nal tuj q'ij lu, mi jun kymajene xinaq, mi jun kymajene xu'j, mi jun kyalune ex mi jun stranjer xjal at tuj kytanmiye.

¹¹Porke tuj qaq q'ij b'ant kya'j wu'ne, tuk'ix tx'otx' ex tkyaqilju at kywitz, tuk'ix mar ex tkyaqilju at tuj, ex in ojlane tuj twuqin q'ij, aqine Kymane. Tu'ntzun jlu kub' nky'iwla'ne q'ij lu te ojlab'l, ex el npa'ne tu'n tok te xjan.

¹²Kynimanxe kymane ex kytxu'ye tu'ntzun t-xi laq'e' tuj kyq'ije twitz tx'otx' aju kxel nq'o'ne kyeye, aqine Kymane ex Kydiose.

¹³Mi'n che b'iyune.

¹⁴Mi'n kyb'inchaye aj pajil.

¹⁵Mi'n che elq'ane.

¹⁶Mi'n che nik'ane yol kyi'j kyuk'ile.

¹⁷Mi'n pon kyk'u'je ti'j tja kyuk'ile; mi'n pon kyk'u'je ti'j t-xu'jil kyuk'ile, mi ti'j tmajen xinaq, mi ti'j tmajen xu'j, mi ti'j twakẍ, mi ti'j tbur, ex mi ti'j jun ti'xti at te.

¹⁸O kyil kykyaqil aj Israel aju tqan q'ankyoq, o kyb'i tq'ajq'ajel chun ex o kyil aju witz in b'uqintoq tu'n sib', ex tu'n jlu e tzaj lu'lun tu'n kyxob'il, ex najchaq e tzaj ten.

¹⁹Xitzun kyma'n te Moisés kyja': —Aya yolin quk'ile, ex jaku kub' qb'i'ne. Mi'n yolintl Dios quk'ile tu'ntzun mi'n qkyime, che chi.

²⁰Xitzun tma'n Moisés kye kyja': —Mi'n che xob'e. Ma kub'il Dios noq tu'n kyoke tuj malb'il tu'n, tu'ntzun tten t-xob'il tuj kywitze, ex tu'n mi'n kyb'inchane il, chi Moisés.

²¹Najchaq e tzaj ten xjal; atzunte Moisés xi laq'e' mastl jatum ta' Dios tuj q'eq muj.

²²Tzajtzun tma'n Qman te Moisés, q'manxa kye aj Israel kyja': —Ma kyile ma chin tzaj yoline kyuk'ile max tuj kya'j.

²³Mi'n kub' kyb'incha'ne qe tilb'ilal tu'n tok kydiosine, mi ti'j ttx'otx'il saq pwaq, mi ti'j ttx'otx'il q'an pwaq, o'kx nwitze tu'n kyk'ulune.

²⁴Kyb'inchan jawe jun b'yuj tx'otx' te jun altar te weye, ex atzun che b'el kyb'yo'ne kyẍne'le ex kywakẍe te chojb'il patun in kub' te weye, ex qa te oyaj te mojb'ab'l tib'il. Noq jatumchaq waje tu'n ttzaj na'n nb'iye, chin ule kyuk'ile ex che b'el nky'iwla'ne.

²⁵Qatzun ab'j altar ma jaw kyb'incha'ne te weye, mi'n b'aj kyxpe'line kyi'j ab'j, ex qa ma b'aj kyxpe'line kyi'j tu'n k'uxb'il, mlay tz'ajb'en te altar.

²⁶Ex mi'n kyb'inchaye jun altar ma' twa'l, tu'ntzun mi tok grad ti'j n-altare tu'ntzun mi'n kyq'ancha'lin qe kykuxe tib'aj ok kyjax b'ete.