Read kumam Éxodo 21 Bible Online

Éxodo 21 - kumam bible

Éxodo 21

¹Atzun qe ley lu kxel tma'na kye aj Israel:

²Qa at jun kyxole ma laq'et jun aj Hebreo tu'n te tmajen, qaq ab'q'i k'ajb'el te; atzun tuj twuqin ab'q'i k'elex tzoqpet noq kukx.

³Qa ma laq'et tjunal te, ax tjunal te k'elex. Qa attoq t-xu'jil tej tlaq'et, tuk'ix t-xu'jil k'elex tuk'il.

⁴Qatzun ma txi q'o'n t-xu'jil tu'n tpatrón, ex otoq tzaj tky'ajal ex qa tme'jel ti'j xu'j lu, tetzun tpatrón aju xu'j lu kyuk'ix qe tal; atzunte majen tjunal te k'elex.

⁵Qatzun ma tma majen kyja': At nk'ujlalile ti'j npatrone, ti'j nxu'jile ex kyi'j qe nk'wa'le, mlay chin exe qa chi,

⁶kxe'ltzun q'i'n majen tu'n tpatrón kywitz jwes, ex kpol ti'n ttzi tlamel tja ex qa ti'j tqan tja. Atzun k'elex tq'o'n toy' t-ẍkyin majen tu'n jun tal k'uxb'il tz'u'p twi', ex k'okeltzun te tmajen te jumajx.

⁷Qa at jun ma txi tk'a'yin tme'jel tu'n tok te majen, mlay tz'ex tzoqpet ik tza'n in che ex tzoqpet qe majen xinaq.

⁸Qa mya b'a'n xu'j lu tuj twitz tpatrón aju otoq jaw sk'o'nte te, kxel tq'o'n patrón amb'il tu'n tchjet tzoqpib'l te. Ok tel tik'un, minti' tumel tu'n t-xi tk'a'yin te jun stranjer xjal.

⁹Qa ma txi tq'o'n te t-xu'jil tky'ajal, il ti'j tu'n tb'ant ti'j ik tza'n in b'ant kyi'j qe tme'jel.

¹⁰Qa ma moje' jun xinaq tuk'il juntl xu'j, mi'n tz'ajtz ti'n ti'j twa tnejel t-xu'jil, mi ti'j t-xb'alun, ex mi ti'j toklen tuj mejeb'le'n.

¹¹Qatzun mi'n ma japun qeju ox jlu tu'n, k'elextzun majen xu'j lu noq kukx, ex mi'n kyaj tchjo'n tzoqpib'lte.

¹²Qa at jun ma tz'ok tb'yo'n jun tuk'il, ex qa ma kyim tu'n, ax ikx te kb'el b'yet.

¹³Atzun teju mya ximantoq tu'n tu'n tkub' tb'yo'n tuk'il, noq o'kx ax Dios otoq tzaj q'o'nte amb'il te tu'n tkyim tuk'il tu'n, kxe'ltzun nyek'une kyeye jatum kpol oq.

¹⁴Qatzun at jun tuj ewaj ma tz'ok tzoqpaj ti'j tuk'il, ex qa ma kyim tu'n, maske otoq pon oq twitz n-altare, ex k'eletz kyi'ne tu'n tkyim.

¹⁵Qa at jun ma tz'ok b'yonte tman ex qa ttxu', il ti'j kb'el b'yet.

¹⁶Ax ikx qa at jun ma txi elq'ante jun xjal, qa ma txi tk'ayin, ex qa ma tz'el knet tuj tq'ab', il ti'j kb'el b'yet.

¹⁷Ax ikx qa at jun ma yasun ti'j tman ex qa ti'j ttxu', il ti'j kb'el b'yet.

¹⁸Ax ikx qa ma che jaw q'ojl xinaq, ex qa ma tza'w jun tu'n tuk'il, qa tu'n ab'j ex qa tu'n tq'ab', ex qa minti' ma kyim, noq o'kx otoq kub' twitz watb'il tu'n ta'w k'ixb'len,

¹⁹qa ma b'anix, ex qa ma tz'etz b'etel tok tky'aqo'ch, ktzoqpeteltzun aju otoq tz'ok b'yonte te. O'kx il ti'j tu'n t-xi tchjo'n tq'ij, jte' q'ij minti' otoq tz'aq'nan, ex k'okel tq'anan.

²⁰Qa at jun ma tz'ok b'yonte tmajen tu'n tze', qa xinaq ex qa xu'j, ex ma kyim tu'n, kb'el tcastiw.

²¹Qatzun itz'x ok tex jun q'ij ex qa kab'e, mlaytzun kub' tcastiw patrón, tu'nju tetoq.

²²Qa ma che jaw q'ojl xinaq, ex tk'ulb'aku ma tza'w jun xu'j kyu'n, aju otoq tz'ok ten tal, ex qa tu'n jlu ma tz'el tal, ex qa minti' ma kyim xu'j, k'elel tmult xjal otoq tza'w xu'j tu'n, ik tza'n tajlal ok ttzaj tqanin chmilb'aj ex ik tza'n ok kyma' jwes.

²³Qatzun ma k'ixb'i xu'j, il ti'j kchjetel tu'nju xinaq otoq k'ixb'isante te. Qa ma kyim xu'j tu'n, ax ikx te il ti'j tu'n tkyim.

²⁴Qa ma naj tb'aq' twitz xu'j tu'n, ax ikx te il ti'j tu'n tnaj tb'aq' twitz; qa ma tz'etz twitz te' xu'j tu'n, ax ikx te il ti'j tu'n tnaj twitz te'; qa ma naj tq'ab' xu'j tu'n, ax ikx te il ti'j tu'n tnaj tq'ab'; qa ma naj tqan xu'j tu'n, ax ikx te il ti'j tu'n tnaj tqan.

²⁵Qa ma tz'e'y xu'j tu'n xinaq, ax ikx te il ti'j tu'n ttz'e'y; qa ma tz'ok ẍil ti'j xu'j tu'n xinaq, ax ikx te il ti'j tu'n tok ẍil ti'j; qa ma k'ixb'i xu'j tu'n xinaq, ax ikx te il ti'j tu'n tk'ixb'i.

²⁶Qa at jun ma tz'ok tk'ixb'isa'n tb'aq' twitz tmajen, qa xinaq ex qa xu'j, ex qa tu'n jlu ma kyaj moẍix tu'n, k'elextzun ttzoqpi'n tu'n tlaj otoq naj tb'aq' twitz.

²⁷Qa ma tz'etz jun twitz te' tmajen tu'n, qa xinaq ex qa xu'j, k'elextzun ttzoqpi'n tu'n tlaj otoq naj twitz te'.

²⁸Qa ma jaw ẍu'yin jun xinaq ex qa jun xu'j tu'n jun wakẍ, ex qa tu'n jlu ma kyim, k'okeltzun xo't wakẍ lu tu'n ab'j tu'n tkyim, ex mi'n txi chyo't tchib'jal; atzunte tajwil minti' til.

²⁹Qatzun otoq tz'el q'ij jawni ẍu'yin wakẍ ex otoq tb'i tajwil ex minti' otoq tz'ok tq'o'n tkwent ti'j; qa ma kub' tb'yo'n wakẍ jun xinaq ex jun xu'j, k'okeltzun xo't wakẍ lu tu'n ab'j tu'n tkyim; ax ikx te tajwil kb'el b'yet.

³⁰Qatzun ma tzaj qanin tu'n tchjet twi kyimni, kxe'ltzun tchjo'n noq jte' ktzajel qanin te te kolpib'lte, tu'n mi'n tkyim.

³¹Qa ma jaw ẍu'yin jun tal q'a ex qa jun tal txin tu'n jun wakẍ, ax ley lu k'ajb'el ti'j.

³²Qa ma jaw ẍu'yin jun majen xinaq ex qa jun majen xu'j tu'n jun wakẍ, kxe'ltzun tchjo'n tajwil wakẍ 30 saq pwaq te tajwil majen; atzunte wakẍ k'okel xo't tu'n ab'j tu'n tkyim.

³³Qa at jun xjal ma kyaj tkatb'a'n jun xoch ex qa ma ku'x tlaku'n jun jul tu'n tjatz a' tuj, qa minti' ma kyaj tmaqsi'n ttzi', ex qa ma ku'x tz'aq jun wakẍ tuj ex qa jun chej,

³⁴kxe'ltzun tchjo'n tajwil jul aju twi alumaj, ex aju alumaj otoq kyim k'okel te te.

³⁵Qa ma jaw ẍu'yin twakẍ jun tu'n twakẍ juntl, ex qa tu'n jlu ma kyim wakẍ, kxe'ltzun k'ayit aju wakẍ itz'x, kb'el kyi'n tmij pwaq otoq tz'oktz twi', ex kb'el kyi'n tmij aju wakẍ otoq kyim.

³⁶Qatzun otoq tz'el q'ij jawnix ẍu'yin wakẍ ti'j tuk'il ex otoq tb'i tajwil ex minti' otoq tz'ok tq'o'n tkwent ti'j, kxe'ltzun tq'o'n twakẍ te t-xel wakẍ, ex aju wakẍ otoq kyim k'okel te te.