Read kumam Éxodo 24 Bible Online

Éxodo 24 - kumam bible

Éxodo 24

¹Tzaj tma'ntl Qman te Moisés kyja': Tjatza tzalu wuk'ile, tuk'ix Aarón, Nadab, Abiú ex 70 tij xjal kyxol aj Israel, ex che mok'ekuye najchaqyin.

²O'kx teya ktzajel laq'e' wuk'ile; atzun kye txqantl, mi'n che tzaj laq'e', ex mi'n che jatz qe xjal tuk'ila, chi Qman.

³Kub'iltzun Moisés ex xi ttx'olb'a'n kye xjal tkyaqil tyol Qman, kyuk'ix kykyaqil qe ley; atzun kye tnam xjal xi kytzaq'we'n kykyaqil junx kyja': —Kb'antel qu'ne tkyaqilju ma tma Qman, che chi.

⁴Kub' ttz'ib'an Moisés tkyaqil yol tzaj tma'n Qman te. Tej tjaw we' te prim tuj juntl q'ij, jaw tb'incha'n jun altar t-xe witz, ex e kub' twalb'a'n kab'laj ab'j ik tza'nx kab'laj k'loj kyiyjil aj Israel.

⁵E je'x t-sama'n Moisés txqan ku'xun aj Israel, kub' kyb'yo'n txqan tal tor ex kub' kypatun te chojb'il ex te oyaj te mojb'ab'l tib'il tuk'il Qman.

⁶Tzajtzun ti'n Moisés mij chik' ex ku'x tq'o'n kyuj matij laq; atzun mijtl chik' kub' ttx'ito'n tib'aj altar.

⁷Te tib'ajxi jlu, tzaj ti'n Moisés aju u'j jatum tz'ib'antoq yol otoq kyaj b'ant ti'j tu'n Dios kyuk'il, ex jaw t-sch'i'n kywitz xjal. Atzun kye xjal kyma kyja': —Kb'antel qu'ne tkyaqilju ma tma Qman, ex kxel qnimane, che chi.

⁸Tzajtzun ti'n Moisés chik', xi ttx'ito'n kyib'aj xjal ex tma: Aju chik' lu, atzun kyuwsab'l te yol ma kyaj b'ant ti'j tu'n Qman kyuk'ile, ik tza'n in tma'n tkyaqil yol lu.

⁹Jaxtzun Moisés twi witz tuk'ix Aarón, Nadab, Abiú ex 70 tij xjal kyxol aj Israel,

¹⁰ex o kyil aju Kydios aj Israel. Tkub'toq jun wa'lb'il tjaq' tqan ik ke'yin ik tza'n ab'j zafiro, ex iktoq ke'yin ik tza'n twitz kya'j ok minti' muj.

¹¹Ex minti' b'aj kyi'j qe nejenel kye aj Israel tu'n Dios maske o ilwaj Dios kyu'n. E wa'ntzun ex e k'an.

¹²Tzajtzun tma'n Qman te Moisés kyja': Tjaxa wuk'ile twi witz ex ayona wi'je ma chixin. Che xel nq'o'ne qe tz'lom ab'j teya jatum tz'ib'amaj ley ex qe mandamyent wu'ne, tu'n tajb'en te xnaq'tzb'il kyeye.

¹³Jawtzun we' Moisés tuk'ix Josué aju onil te, ex kub' b'e kyu'n tu'n kyjax twi witz te Dios.

¹⁴Xi tma'n kye tij xjal kyxol aj Israel kyja': Che ayone qi'je tzalu okxi qkub'ile kyuk'ile. Kyjel ten Aarón ex Hur kyuk'ile, ex qa at jun ma b'aj kyxol xjal, kyq'manxe kye.

¹⁵Jaxtzun Moisés twi witz Sinaí, kub' juke' muj twi witz,

¹⁶ex atzun kub' ten tajwalil Qman. Qaq q'ij o ten aju muj twi witz. Tujtzun twuqin q'ij o txokl Moisés tu'n Dios tuj tmij muj.

¹⁷Aju tajwalil Qman twi witz ik ke'yin tuj kywitz aj Israel ik tza'n q'aq' in b'aj tz'e'y tkyaqil tu'n.

¹⁸Okxtzun Moisés tuj tmij muj ex jax twi witz. 40 q'ij ex 40 qonik'an o ten Moisés twi witz.