Read kumam Éxodo 25 Bible Online

Éxodo 25 - kumam bible

Éxodo 25

¹Tzaj tma'n Qman te Moisés kyja':

²—Q'manxa kye aj Israel tu'n tjaw kychmo'n oyaj te weye. Kjawil kychmo'ne kyxol kykyaqil qeju kyaj tu'n ttzaj kyq'o'n tu'n kyex kygan ex tu'n tkyaqil kyanmi.

³Aqeju oyaj kjawil kychmo'ne, atzun qe jlu: Q'an pwaq, saq pwaq, q'an k'uxb'il,

⁴xb'alun ẍq'ilun ke'yin, xb'alun ẍjulin ke'yin, xb'alun kyaq ke'yin, tb'anil xb'alun lino, ttzmal chip,

⁵ttz'umal ẍne'l tok tk'a' kyaq ke'yin, tz'u'm tb'anilxix, tze' ch'i'x acacia,

⁶aseyt tu'n tajb'en kyuj kandil, t-samel at tk'ok'jal tu'n tku'x q'ot tuj aseyt aju in ajb'en ok tok toklen jun xjal, ex tu'n tajb'en te tk'ok'jal storak,

⁷qe tal ab'j ónice ex txqantl tal ab'j tb'anil, tu'n tok q'ot ti'j kapiẍay nno'k tq'o'n tnejel pal, ex ti'j tal xb'alun nno'k ten ttzi t-xu'k.

⁸Q'manxa kye tu'n kyb'inchante jun ja xb'alun te weye, tu'n nnajane kyxol.

⁹Kjawil kyb'incha'ne aju ja lu ex kykyaqil qe makb'il che tel tuj, ik tza'nxix kxel nyek'une teya.

¹⁰B'inchama jun kax ti'j tze' ch'i'x acacia, te jun var tuk'il jun xk'achub' tnuqb'il, ox xk'achub' twitz, ex ox xk'achub' twa'l.

¹¹Lo'tzin oka q'an pwaq tb'anilxix tujile ex ti'jele, ex b'inchan jawa jun adorn q'an pwaq ttx'otx'il ttzi'yile.

¹²Ax ikx b'inchama kyaje argoy q'an pwaq kytx'otx'il, ex q'on oka qe kyi'j kykyajil tqan kax, kab'e jun pak' ex kab'etl juntl pak'.

¹³Ax ikx b'inchama kab'e tze' tolin kyi'j, ti'j tze' ch'i'x acacia, ex lo'tzin oka q'an pwaq kyi'j.

¹⁴Q'on extzuna qe tze' lu kyuj qe argoy ate'k ttxlaj kax, tu'n kyajb'en tu'n t-xi tanut kax.

¹⁵Ax che kyjel ten qe tze' kyuj qe argoy kyok ti'j kax, mi'n che etz q'it.

¹⁶Tujtzun kax lu kb'elex tq'o'na aju ley kxel nq'o'ne teya.

¹⁷B'inchama jun tmaqsil kax q'an pwaq tb'anilxix ttx'otx'il, jatum tu'n tnajset kyil xjal, te jun var tuk'il jun xk'achub' tnuqb'il ex ox xk'achub' twitz.

¹⁸Ax ikx b'inchama kab'e tilb'ilal querubín q'an pwaq kytx'otx'il tx'ino'n tu'n martiy, ex che b'el tq'o'na kyib'aj kykab'il pak' ttxa'n tmaqsil kax.

¹⁹Jun kb'el ten tib'aj jun pak' ttxa'n tmaqsil kax ex jun tib'aj juntl pak'. Junx piẍ k'elel tmaqsil kyuk'il qe kab'e tilb'ilal querubín.

²⁰Che jawil kylik'un kyxik' tu'n ttxayit tmaqsil kax. Ktel twitz jun tumlal twitz juntl, ex kyja' kb'el kyke'yin tib'aj tmaqsil.

²¹Kb'elex tq'o'na tuj kax aju ley kxel nq'o'ne teya, ex kb'el tq'o'na tmaqsil kax.

²²Atzun k'okel nk'ulb'an wib'e tuk'ila tib'aj tmaqsil kax ex kyxol qe kab'e tilb'ilal querubín, aqeju kykub'sa'n tib'aj kax k'ub'l nleye. Atzun kxel nma'ne teya tkyaqil aju waje tu'n t-xi tma'na kye aj Israel.

²³B'inchama jun mes ti'j tze' ch'i'x acacia, jun var tnuqb'il, kab'e xk'achub' twitz, ex ox xk'achub' twa'l.

²⁴Lo'tzin oka q'an pwaq tb'anilxix ti'jele, ex b'inchan jawa jun adorn q'an pwaq ttx'otx'il ttxa'nile mes.

²⁵Ax ikx b'inchama jun tmaqel ttxa'nile tjaq' mes, kyaje q'ab' twa'l, ex lo'tzin oka jun adorn q'an pwaq ttx'otx'il ti'jele.

²⁶B'inchama kyaje argoy q'an pwaq kytx'otx'il, ex q'on oka qe kyi'j kykyajil pak' ttxa'n mes, kyumlal qe tqan.

²⁷Che okel ten qe argoy lu tjaq' tmaqel mes tu'n kyokx qe tze' tolin kyi'j tu'n kyajb'en tu'n t-xi tanut mes.

²⁸B'inchama qe kab'e tze' lu ti'j tze' ch'i'x acacia, ex lo'tzin oka q'an pwaq kyi'j, ex kyi'jtzun kxel tanut mes.

²⁹Ax ikx b'inchama ti'j q'an pwaq tb'anilxix, qe laq, qe pak', qe xar ex qe vas ma tij, tu'n kyajb'en te qob'l oyaj ti'j ta'l twitz uva.

³⁰Kukx che b'el kyq'o'ne tib'aj mes lu qe pan in che kub' q'o'n nwitze.

³¹Ax ikx b'inchama jun kykub'il kandil q'an pwaq ttx'otx'il tx'ino'n tu'n martiy. Te junx k'elel aju tq'uqb'il, tqan, qe tcopa, qe tilb'ilal xwakin kyten, ex qe tilb'ilal b'ech.

³²Che elel qaq tq'ab' ti'j tk'u'j; ox tuj jun pak' ex ox tuj juntl pak'.

³³Ti'j teyle junjun tq'ab' k'elel ti'j tk'u'j, che tel ox tilb'ilal b'ech tjaq'xi, ik ktel b'inchb'en kye ik tza'n t-xmakal tze' almendro; ax ikx ktel ox tilb'ilal xwakin kyten tuk'ix kycopa. Iklex ktelb'a kyi'j qe qaq tq'ab'.

³⁴Ti'j ju tqan tuj tmij kykub'il kandil, che tel kyaje tilb'ilal b'ech tjaq'xi, ik ktel b'inchb'en kye ik tza'n tilb'ilal t-xmakal tze' almendro; ax ikx ktel kyaje tilb'ilal xwakin kyten tuk'ix kycopa.

³⁵Ti'j teyle junjun moj tq'ab' k'elel ti'j tk'u'j, kyjel q'ot jun tilb'ilal b'ech tjaq'xi.

³⁶Qe tilb'ilal b'ech ex qe tq'ab' che elel ti'j junx piẍ q'an pwaq tb'anilxix ex tx'ino'n tu'n martiy.

³⁷Ax ikx b'inchama wuq kandil, aqeju che okel kytxaqo'ne tu'n kyq'onte spik'un tetz twitzx,

³⁸ex qe matzb'il kywi mech kyuk'ix qe tal tkub'il ttza'jil mech, ax ikx q'an pwaq kytx'otx'il.

³⁹K'ajb'el 75 libr q'an pwaq tb'anilxix kyu'ne tu'n tb'ant aju kykub'il kandil ex kykyaqil qe makb'il che ajb'el tuk'il.

⁴⁰Kyb'inchame jlu ik tza'nx tilb'ilal xi nyek'une teya twi witz.