Read kumam Éxodo 28 Bible Online

Éxodo 28 - kumam bible

Éxodo 28

¹Kyxol aj Israel, q'manxa te Aarón aju termaniya tu'n tul laq'e', tuk'ix Nadab, Abiú, Eleazar ex Itamar, aqeju tky'ajal, tu'ntzun kyok te pal te weye.

²B'inchama xb'alun tb'anilxix te Aarón aju termaniya, tu'n tjaw nimsa'n ex tu'n mas b'a'n tke'yinjtz.

³Q'manxa kye qeju at nim kynab'l, aqeju o tzaj nq'o'ne kynab'l tu'n kyb'inchante aq'untl tb'anilxix, tu'ntzun kyb'inchante t-xb'alun Aarón, tu'n tajb'en te ok tk'monte toklen tu'n tok te pal te weye.

⁴Qe xb'alun tu'n kyb'inchante, atzun qe jlu: Aju tal xb'alun k'okel ten ttzi t-xu'k, aju tkapiẍay, aju tmant, aju t-ẍjo'w b'inchamaj qe tilb'ilal twitz, aju k'alb'il twi' b'inchamaj ti'j noq' lino, ex aju k'alb'il tk'u'j. Atzun qe xb'alun tb'anilxix lu che b'antel tu'n tajb'en tu'n Aarón aju termaniya ex kyu'n qe tky'ajal, tu'ntzun kyok te pal te weye.

⁵Aju k'ajb'el tu'n kyb'ant qe xb'alun lu, atzun qe jlu: Q'an pwaq, noq' ẍq'ilun ke'yin, noq' ẍjulin ke'yin, noq' kyaq ke'yin, ex noq' lino chub'emaj ttze'yil.

⁶Aju k'ajb'el ok tb'ant kapiẍay, atzun jlu: Q'an pwaq, noq' ẍq'ilun ke'yin, noq' ẍjulin ke'yin, noq' kyaq ke'yin, ex noq' lino chub'emaj ttze'yil; tb'anilxix b'inchb'en te,

⁷ex kab'e taq'al twi t-semil, aqeju che ajb'el tu'n kyok mojb'et kykab'il pak' ttxa'n kapiẍay.

⁸Aju k'alb'il k'u'jb'aj xi'yni ti'jxi kapiẍay, tiqlix tib' tuk'il ex ax tb'anil b'inchb'en te. K'ajb'el q'an pwaq ti'j, tuk'ix noq' ẍq'ilun ke'yin, noq' ẍjulin ke'yin, noq' kyaq ke'yin, ex noq' lino chub'emaj ttze'yil.

⁹Q'intza kab'e ab'j ónice, ex tz'ib'an oka kyb'i qe tky'ajal Israel kywitz,

¹⁰qaq b'iyb'aj twitz jun ab'j, ex qaqtl b'iyb'aj twitz juntl, txolin tu'n kyten ik tza'n kyul-len itz'j.

¹¹Tu'n jun xjal at tnab'l ti'j, k'okel k'ochin tu'n kykyaj ten kyb'i tky'ajal Israel kywitz, ik tza'n twitz jun sey. Che b'elextzun tq'o'na kyuj kyq'uqb'il q'an pwaq kytx'otx'il,

¹²ex che okeltzun tq'o'na kyi'j taq'al kapiẍay, jun twi' jun t-semil ex jun twi' juntl. Kyu'ntzun qe ab'j lu, che tzajel na't qe tky'ajal Israel. Che xeltzun ti'n Aarón kyb'i nwitze kywi t-semil, tu'n kytzaj na't aqine Kymane.

¹³B'inchama qe kyq'uqb'il q'an pwaq kytx'otx'il,

¹⁴kyuk'ix kab'e caden q'an pwaq tb'anilxix kytx'otx'il, xpaltx'i'n kyten, ex che b'el tq'o'na qe caden lu kyi'jele qe kyq'uqb'il.

¹⁵Ax ikx tb'anil b'inchb'en te tal xb'alun k'okel ten ttzi t-xu'k Aarón tu'n t-xi tb'incha'n kyi'j xjal, ex ax noq' che ajb'el tu'na ik tza'n ti'j kapiẍay, atzun qe jlu: Q'an pwaq, noq' ẍq'ilun ke'yin, noq' ẍjulin ke'yin, noq' kyaq ke'yin, ex lino chub'emaj ttze'yil.

¹⁶Mejetz'in twitz ex junx kyjel tnuqb'il tuk'il twitz; jun xk'achub' tnuqb'il ex jun xk'achub' twitz.

¹⁷Che okel tq'o'na kyaje txol tal ab'j tb'anilxix ti'j. Tuj tnejel txol k'okel tq'o'na jun tal ab'j sardio, jun topacio ex jun carbunclo.

¹⁸Tuj tkab'in txol k'okel tq'o'na jun tal ab'j esmeralda, jun zafiro ex jun diamante.

¹⁹Tuj toxin txol k'okel tq'o'na jun tal ab'j jacinto, jun ágata ex jun amatista

²⁰ex tuj tkyajin txol k'okel tq'o'na jun tal ab'j berilo, jun ónice ex jun jaspe. Kykyaqil qe tal ab'j lu che b'elex tq'o'na kyuj kyq'uqb'il q'an pwaq kytx'otx'il.

²¹Ax kyajlal tal ab'j k'okel tq'o'na ik tza'n kyajlal tky'ajal Israel, kab'laj kyb'et. Ik tza'n twitz jun sey k'okel tz'ib'et tb'i jun tky'ajal Israel twitz teyle junjun.

²²B'inchama kab'e caden q'an pwaq tb'anilxix kytx'otx'il ex xpaltx'i'n kyten, tu'n kyok ten ti'j tal xb'alun k'okel ten ttzi t-xu'k.

²³Ax ikx b'inchama kab' argoy q'an pwaq kytx'otx'il, ex che okel tq'o'na kyi'j kykab'il ttxa'n tal xb'alun;

²⁴che okex tq'o'na kykab'il caden kyuj argoy q'an pwaq kytx'otx'il che okel ten kyi'j kykab'il ttxa'n tal xb'alun.

²⁵Che okel tq'o'na kytxa'n kykab'il caden kyib'aj qe kyq'uqb'il q'an pwaq kytx'otx'il kyoksa'n kyi'j qe kab'e twi t-semil, ttzi twitz kapiẍay.

²⁶B'inchan kub'tla kab' argoy q'an pwaq kytx'otx'il ex che okel tq'o'na kyi'j kykab'il ttxa'n tal xb'alun te tujxi, tib'aj ttxa'n, junx tuk'il kapiẍay.

²⁷B'inchama kab'etl argoy q'an pwaq kytx'otx'il, ex che okel tq'o'na kyi'j qe kab'e twi t-semil kapiẍay te kub'ni, junx tuk'il slapb'il te ex ch'in tib'aj k'alb'il tk'u'j kapiẍay.

²⁸Tu'n jun k'alb'il ẍq'ilun ke'yin, che okel k'alet qe argoy kyok ti'j tal xb'alun kyuk'il qeju kyok ti'j kapiẍay, tu'ntzun tkyaj ten tal xb'alun tib'aj k'alb'il tk'u'j kapiẍay, ex tu'n mi'n tel tpa'n tib' tal xb'alun ti'j kapiẍay.

²⁹Kyja'tzun, ok tokx Aarón tuj Lugar Xjan, che okex ti'n kyb'i qe tky'ajal Israel twitz tal xb'alun k'okel ten ttzi t-xu'k, tu'n t-xi tb'incha'n kyi'j xjal, tu'ntzun kukx kytzaj na't nwitze, aqine Kymane.

³⁰Q'on ku'xa Urim ex Tumim tuj tal xb'alun k'okel ten ttzi t-xu'k Aarón tu'n t-xi tb'incha'n kyi'j xjal, tu'ntzun kyxi ti'n Aarón ttzi t-xu'k ok tokx nwitze. Kyja'tzun kukx che xel ti'n Aarón ttzi t-xu'k qe makb'il che ajb'el tu'n t-xi tb'incha'n kyi'j xjal nwitze, aqine Kymane.

³¹B'inchama jun xb'alun ẍq'ilun ke'yin, aju k'okel tujxi kapiẍay,

³²tuk'ix jun toy' tuj tmij tu'n tjax twi' tuj. Slapun kub'a jun tqul ttzi'yile toy' lu, ik tza'n kyten qe chikyet tz'u'm, tu'ntzun mi'n t-xi tzaqj.

³³Ttxa'nile xb'alun lu k'okel tq'o'na tilb'ilal ẍoq' karnad ẍq'ilun ke'yin, ẍjulin ke'yin ex kyaq ke'yin. Kyxoltzun qe jlu che okex ten tal campan q'an pwaq kytx'otx'il.

³⁴Jun tal campan q'an pwaq ttx'otx'il ex jun ẍoq' karnad, juntl tal kampan ex juntl ẍoq' karnad; iklex ktemb'il tkyaqil ttxa'nile xb'alun.

³⁵K'okeltzun tq'o'n Aarón ti'j tkyaqil maj ok tajb'en tuj taq'un te pal, tu'ntzun kyb'injtz tq'ajq'ajel qe campan ok tokx nwitze tuj ja xb'alun, ax ikx ok tetz, tu'ntzun mi'n tkyim.

³⁶B'inchama jun tal tz'lom q'an pwaq tb'anilxix ttx'otx'il ex k'ochin jatza ik tza'n twitz jun sey, tu'n kykyaj qe yol lu twitz: XJANSAMAJ TE JLU TE QMAN.

³⁷K'okel tq'o'na tal tz'lom lu tib'aj twitz ti'j k'alb'il twi', ex k'okel k'alet tu'n jun taq'al ẍq'ilun ke'yin,

³⁸kyja'tzun ax ktemb'il tib'aj twitz Aarón. Che xel tiqan Aarón kykyaqil kyil aj Israel ok t-xi kyq'o'n alkyexku kyoyaj xjan. Akux in aq'nan nwitze, ax ktemb'il tib'aj twitz tu'ntzun kyk'monte xtalb'il wu'ne. Aqine Kymane.

³⁹Chmon ku'tza jun ẍjo'w ti'j noq' lino, ex b'inchama jun k'alb'il twi' ax ti'j noq' lino, ex jun k'alb'il tk'u'j pitxin twitz.

⁴⁰B'inchama kyẍjo'w qe tky'ajal Aarón kyuk'ix k'alb'il kyk'u'j ex k'alb'il kywi', tu'n kyjaw nimsa'n ex tu'n mas b'a'n kyke'yinjtz.

⁴¹Che okeltzun tq'o'na xb'alun lu ti'j Aarón aju termaniya ex kyi'j qe tky'ajal, ex kb'el tqo'na aseyt tib'aj kywi', che elel tpa'na, ex che b'ajel t-xjansa'na, tu'ntzun kyok te pal te weye.

⁴²Ax ikx b'inchama kycalsonsiy ti'j xb'alun lino, tu'ntzun ttxayit kykux. Kxel qe' kymij, ex kpol b'aj ti'j kykux.

⁴³Che okel ti'j Aarón ex kyi'j qe tky'ajal ok kyokx tuj ja xb'alun te mojb'ab'l tib'il, ex qa ok kyxi laq'e' ti'j altar tu'n kyajb'en tuj Lugar Xjan, tu'ntzun mi'n kyb'inchante jun il ex tu'n mi'n kykyim. A jlu jun ley kukx ktel te Aarón ex kye tiyjil che ul itz'j te tib'ajxi.