Read kumam Éxodo 3 Bible Online

Éxodo 3 - kumam bible

Éxodo 3

¹In kwentintoq Moisés kyi'j t-ẍne'l Jetro[2] aju tji' ex pal te Madián, at jun q'ij xi ti'n qe ẍne'l tuj tzqij tx'otx' ex pon t-xe witz Horeb, aju witz te Dios.

²Kub'tzun tyek'un tib' t-anjel Qman twitz tuj jun wi' ch'i'x k'ul in julintoq tu'n q'aq'. O til in julintoq ch'i'x k'ul tu'n q'aq' ex minti' in kub' tz'e'ytoq.

³Tmatzun Moisés: Chin xel laq'e'ye ke'yilte te, ex ok wila'ye tiqu'n minti' in kub' tz'e'y aju ch'i'x k'ul lu.

⁴Tej tlonte Qman kyja'toq t-xi laq'e' Moisés ke'yilte te, tzaj q'ajt tuj ch'i'x k'ul ex tzaj tma'n te kyja': —Moisés, Moisés. —Lu qine lu, chi Moisés, xi ttzaq'we'n.

⁵Tzajtzun tma'n Dios te kyja': —Mi'n tzaj laq'e'ya. Q'i'mela t-xajb'iya kyi'j tqana, porke xjan aju lugar jatum tkub'a.

⁶Ex tzaj tma'ntl: Aqine Tdios tmana, aju Tdios Abraham, Tdios Isaac ex Tdios Jacob, chi Qman. Oktzun tmaqsi'n Moisés twitz tu'nju tzaj t-xob'il ti'j tu'n tlonte twitz Dios.

⁷Tzaj tma'ntl Qman: —Ma wile yajb'il kye xjal etzan wu'ne, aqeju ate' tuj Egipto. Ma nb'iye tq'ajq'ajel kywi' in che ayayan kyu'n caporal, ex b'a'n wu'ne nik'pun in che k'ixb'isanjtz,

⁸ex tu'ntzun jlu ma chin ku'tze tu'n kyklet wu'ne tuj kyq'ab' aj Egipto, tu'n kyetz wi'ne tuj tx'otx' ma chixin ex tu'n kypon wi'ne tuj jun tx'otx' b'a'n ex ma' twitz. Aju tx'otx' lu, q'inunxix ex tb'anilxix. Atzun najl qe aj Canaán, qe aj Heteo, qe aj Amorreo, qe aj Ferezeo, qe aj Heveo ex qe aj Jebuseo.

⁹Ma nb'iye in che ayayan aj Israel ex ma wile in che k'ixb'isanjtz kyu'n aj Egipto.

¹⁰Tu'ntzun jlu, txi'ya ja'lo. Kxel nsama'na twitz Faraón tu'n kyetz ti'na tuj Egipto qe xjal etzan wu'ne, aqeju aj Israel, chi Dios.

¹¹Xitzun tma'n Moisés te Dios: —¿Ti woklene tu'n nxi'ye twitz Faraón ex tu'n kyetz wi'ne aj Israel tuj Egipto?

¹²Tzaj ttzaq'we'n Dios te: —Txi'ya, ok chin tele tuk'ila. Atzun jlu k'ajb'el te jun techal teya qa wu'ne otoq txi nsama'na: Ok kyetz ti'na tuj Egipto qe xjal etzan wu'ne, kykyaqile che k'ulule weye t-xe witz lu, chi Dios.

¹³Xitzun tma'n Moisés te Dios: —Ok npone kywitz aj Israel, ex ok t-xi nma'ne kye kyja': Ma chin tzaj sama'ne kyuk'ile tu'n Kydios qxe'chel, nchiloye, ex qa ma tzaj kyqanin weye: ¿Titzun tb'i? qa che chi, ¿titzun kxel nma'ne kye? Chi Moisés.

¹⁴Tzaj ttzaq'we'n Dios te Moisés: —AQINE AJU AX QINE, chi Dios. Ax ikx tzaj tma'ntl: Kyja'tzun tten kxel tma'na kye aj Israel: Aju tok tb'i AQINE ma tzaj samante weye kyuk'ile, chikuya.

¹⁵Xi tma'ntl Dios te Moisés: Atzun jlu kxel tma'na kye aj Israel: Ate Qman[3] aju Kydios qxe'chel, Tdios Abraham, Tdios Isaac ex Tdios Jacob, ma tzaj samante weye kyuk'ile. Atzun nb'iye jlu te jumajx, chi Dios, ex kukx ktzajel na'n kyuj kykyaqil tab'q'iyil, chikuya kye.

¹⁶Txi'ya, chmon b'aja qe tij xjal at kyoklen kyxol aj Israel ex q'manxa kye kyja': Ate Qman aju Kydios qxe'chel, Tdios Abraham, Tdios Isaac ex Tdios Jacob, kub' tyek'un tib' nwitze, ex tzaj tma'n weye kyja': Ax tok ma tz'ok nq'o'ne kwent kyi'je ex ma wile aju in b'inchanjtz kyi'je tuj Egipto, chi Dios.

¹⁷Ex tmatl: Aqine chin eletz q'inte kyeye tuj yajb'il kyi'je tuj Egipto, tu'n kyxi'ye tuj kytx'otx' aj Canaán, aj Heteo, aj Amorreo, aj Ferezeo, aj Heveo ex aj Jebuseo. Aju tx'otx' lu q'inunxix ex tb'anilxix, chikuya kye.

¹⁸Kxel b'i'n tyola kyu'n qe tij xjal kyxol aj Israel. Aya kyuk'ix qe tij xjal lu che xe'le twitz rey te Egipto, ex kxel kyma'ne te kyja': Ate Qmane aju Qdiose, aqo'ye aj Hebreo, kub' tyek'un tib' qwitze. Tu'ntzun jlu, q'ontza amb'il qeye tu'n qxi'ye tuj tzqij tx'otx' ox q'ij qb'eye, tu'n t-xi qq'o'ne chojb'il te Qmane aju Qdiose, che chikuye te.

¹⁹B'a'n wu'ne, mlay che etz tzoqpi'ne tu'n rey te Egipto qa minti' ma kub' tcastiw wu'ne.

²⁰Atzun weye kxel nyek'une wipumale, che b'el nk'ixb'isa'ne qe aj Egipto kyu'n kykyaqil nb'inchb'ene nim kyipumal che b'antel wu'ne kyi'j, ex maxitzun che eletz tzoqpi'ne tu'n.

²¹Wu'ne knetel xtalb'il kyu'n aj Israel kywitz aj Egipto, tu'ntzun mi'n kyetz minti' q'i'n kyu'n.

²²Kxel tqanin teyle junjun xu'j te tvesin aj Egipto, ex te xu'j aj Egipto ax najl tuj tja, qe ti'xti saq pwaq kytx'otx'il, q'an pwaq kytx'otx'il ex xb'alun tu'n tok kyq'o'n kyi'j kyal; kyja'tzun tten k'eletz kyi'n aju at kye aj Egipto, chi Dios.