Read kumam Éxodo 30 Bible Online

Éxodo 30 - kumam bible

Éxodo 30

¹Ax ikx b'inchama jun altar tu'n tkub' patit storak tib'aj. B'inchama ti'j tze' ch'i'x acacia,

²kab' xk'achub' twitz, kab' xk'achub' tnuqb'il ex jun var twa'l; junx kyjel twitz tuk'il tnuqb'il, ex kyiqlix kyib' qe tkach ti'j.

³Lo'tzin kub'a q'an pwaq tb'anilxix tib'aj, ex lo'tzin oka kyi'j kykyajil pak' ttxlaj ex kyi'j qe tkach, ex lo'tzin jawa jun adorn ttzi'yile te tib'aj, q'an pwaq ttx'otx'il.

⁴Kyi'j kab'e tb'utx' te jun pak' tjaq'xi adorn, q'on oka kab' argoy q'an pwaq kytx'otx'il, ex kab'e kyi'j kab'etl tb'utx' ti'j juntl pak', tu'ntzun kyex qe tze' tolin kyi'j kyuj, aqeju che ajb'el tu'n t-xi tanut.

⁵B'inchama qe tze' lu ti'j tze' ch'i'x acacia, ex lo'tzin oka q'an pwaq kyi'j.

⁶Kb'eltzun tq'o'na altar lu ti'jtzi xb'alun te maqb'il. Atzun kb'el tq'o'na tumlal kax k'ub'l nleye ex tumlal tmaqsil, jatum k'okel nk'ulb'a'n wib'e tuk'ila.

⁷Kb'el tpatun Aarón storak at tk'ok'jal tib'aj altar lu kykyaqil prim ok kyxi tb'incha'n qe kandil.

⁸Ax ikx te qale, ok kyok ttxaqo'n qe kandil, kb'el tpatun storak. Tuj tkyaqil tab'q'iyil kukx kb'antel jlu nwitze.

⁹Mi'n kub' kyq'o'ne juntl wiq storak tib'aj altar lu, mi jun chojb'il patun in kub', mi oyaj ti'j twitz awal; ax ikx mi'n kub' kyqo'ne oyaj ti'j ta'l twitz uva tib'aj.

¹⁰Kb'antel najsb'il il tu'n Aarón jun maj tuj ab'q'i, ok tkub' tq'o'n tchk'el alumaj kxel q'ot te chojb'il il kyib'aj tkach altar lu. Tuj tkyaqil tab'q'iyil te jumajx kukx kb'antel najsb'il il tib'aj altar lu jun maj tuj ab'q'i. A jlu xjanxix nwitze, aqine Kymane.

¹¹Tzaj tma'n Qman te Moisés kyja':

¹²Ok tjaw ti'na kyajlal aj Israel, teyle te junjun kye ktzajel tq'o'n jun chojb'il te weye tu'n tklet tchwinqlal, tu'ntzun mi'n kykyim tu'n k'ixb'isab'l ok kyb'aj tajla'na.

¹³Teyle junjun aju kjawil tajlal ktzajel tq'o'n jun tal saq pwaq te chojb'il te weye; a jlu mij talil aju saq pwaq in ajb'en tuj njaye. Aju saq pwaq lu, ch'ixmi mey ons talil.

¹⁴Kykyaqil qeju otoq jaw kyajlal kxelx qe' kyi'j qeju otoq che japun twi' winqin ab'q'i, ktzajel kyq'o'n te weye aju chojb'il lu,

¹⁵ex ok ttzaj tq'o'n teyle junjun aju chojb'il te weye tu'n tklet tchwinqlal, mya mas nim kchjetel tu'n q'inun ex mya mas ch'in kchjetel tu'n meb'a; ax tajlal kchjetel kyu'n, jun tal saq pwaq.

¹⁶Kjawil tchmo'na aju saq pwaq ktzajel kyq'o'n aj Israel tu'n tklet kychwinqlal, ex kxel tq'o'na tu'n tajb'en tuj ja xb'alun te mojb'ab'l tib'il. Tu'ntzun jlu che tzajel nna'ne qe aj Israel, qa otoq tzaj kyq'o'n chojb'il tu'n tklet kychwinqlal.

¹⁷Tzaj tma'ntl Qman te Moisés kyja':

¹⁸B'inchama jun tkub'il a' te tx'ajb'il, q'an k'uxb'il ttx'otx'il ex ax q'an k'uxb'il ttx'otx'il tq'uqb'il. Q'on kub'a t-xol ja xb'alun te mojb'ab'l tib'il tuk'il altar, ex kb'elex tq'o'na a' tuj.

¹⁹Ate Aarón kyuk'ix qe tky'ajal k'elel kytx'jo'n kyq'ab' ex kyqan tu'n a' lu.

²⁰Ok kyokx tuj ja xb'alun te mojb'ab'l tib'il, kb'ajel kytx'jo'n kyib' tu'n a' tu'n mi'n kykyim, ax ikx ok kypon laq'e' ti'j altar tu'n kyajb'en ex tu'n ttzaj kyq'o'n weye aju oyaj patun in kub',

²¹k'elel kytx'jo'n kyq'ab' ex kyqan tu'n mi'n kykyim. A jlu jun ley kukx ktel tuj tkyaqil tab'q'iyil te jumajx te Aarón ex kye tiyjil che ul itz'j te tib'ajxi.

²²Tzaj tma'ntl Qman te Moisés kyja':

²³Q'i'ntza qe tk'ok'jal tb'anilxix jlu: Kab'laj libr ttxk'omal tze' mirra tb'anilxix, qaq libr canela, qaq libr tqan ajlaj at tk'ok'jal,

²⁴ex kab'laj libr tk'ok'jal tze' casia. Che maletel tu'nju malb'il in ajb'en tuj njaye. Ax ikx q'i'ntza kyaje litr aseyt nne'l ti'j twitz olivo.

²⁵Kyi'jtzun qe jlu b'inchama aju aseyt xjan at tk'ok'jal, ik tza'n in b'ant tu'n jun xjal b'inchal perjum, tu'n tjax qet tuj twi' jun pal ok tok toklen. Atzunju aseyt lu k'ajb'el te xjansab'l.

²⁶Atzun jlu kb'el tqo'na tib'aj ja xb'alun te mojb'ab'l tib'il, tib'aj kax k'ub'l nleye,

²⁷tib'aj mes ex kykyaqil qe makb'il kyok ti'j, tib'aj kykub'il kandil ex kykyaqil qe makb'il kyok ti'j, tib'aj altar patb'il storak,

²⁸tib'aj altar patb'il oyaj ex kykyaqil qe makb'il kyok ti'j, tib'aj tkub'il a' ex tib'aj tq'uqb'il.

²⁹Kyja'tzun che okel te xjanxix tu'na. Noq alkyexku ma tz'ok takl kyi'j, b'i'x kxjansetel.

³⁰Ax ikx kb'el tqo'na aseyt lu tib'aj twi Aarón ex kyib'aj kywi' qe tky'ajal, tu'ntzun kyxjanset tu'n kyok te pal te weye.

³¹Kxel tma'na kye aj Israel kyja': Atzun aseyt lu k'ajb'el te xjansab'l tuj tkyaqil tab'q'iyil te jumajx, tu'n tjax qet tuj twi' jun xjal ok tok toklen.

³²Mi'n kub' kyqo'ne tib'aj noq alkyex jun xjal mya tiyjil pal, ex mi'n kub' kyb'incha'ne aseyt ik tza'n jlu. Aju aseyt lu xjan ex kyq'on oke te xjan.

³³Qa at jun ma kub' b'inchante aseyt ik tza'n jlu, ex qa ma kub' tq'o'n tib'aj noq alkyex jun xjal, b'i'x k'elex lajet tu'ntzun mi'n ttentl kyxol t-xjalil, chi Qman.

³⁴Tzaj tma'ntl Qman te Moisés kyja': Q'intza qe tk'ok'jal lu: Tq'olil tze' estacte, qe xlek at kyk'ok'jal, tq'olil tze' gálbano ex storak tb'anil. Junx k'elel kyalil tu'na.

³⁵Kyi'jtzun qe jlu b'inchama storak tb'anilxix ex xjan. Kb'ajel t-smo'na wen ik tza'n in b'ant tu'n jun xjal b'inchal perjum, kxel tq'o'na ch'in atz'an tuj ex k'okel te xjan.

³⁶Kb'ajel tche'na ch'in ex ni'j k'okel tu'na. Kb'eltzun tq'o'na twitz kax k'ub'l nleye tuj ja xb'alun te mojb'ab'l tib'il jatum kb'el nyek'un wib'e twitza. Aju storak lu xjanxix k'okel te kyeye.

³⁷Mi'n kub' kyb'incha'ne storak ik tza'n jlu tu'n tajb'en kyu'ne. Weye jlu ex xjan te kyeye. Aqine Kymane.

³⁸Qa at jun ma kub' b'inchante storak ik tza'n jlu tu'n t-achin ti'j tk'ok'jal, b'i'x k'elex lajet tu'n mi'n ttentl kyxol t-xjalil.