Read kumam Éxodo 31 Bible Online

Éxodo 31 - kumam bible

Éxodo 31

¹Tzaj tma'n Qman Dios te Moisés kyja':

²B'intza, kyxol qe tiyjil Judá o jaw nsk'o'ne Bezaleel aju tky'ajal Uri ex tal tchman Hur;

³o noj tuj tanmi tu'n Nxewe ex o tz'ok nim tnab'l wu'ne, o txi nq'o'ne tojtzqib'l ex t-sek'al tnab'l ti'j tkyaqil aq'untl,

⁴tu'n t-ximan ti'j tza'n tten tu'n tb'ant aq'untl, tu'n taq'nan ti'j q'an pwaq, ti'j saq pwaq, ti'j q'an k'uxb'il,

⁵ex tu'n kyb'aj jaset qe tal ab'j tb'anilxix ex tu'n kyku'x tq'o'n kyuj kyq'uqb'il, tu'n kyb'aj tjaso'n qe tze', ex tu'n taq'nan ti'j tkyaqil wiq aq'untl.

⁶Kyxol qe tiyjil Dan o tz'ok nq'o'ne Aholiab aju tky'ajal Ahisamac, te onil te. Ax ikx o txi nq'o'ne kynab'l kykyaqil qeju at kyojtzqib'l tu'n kyaq'nan, tu'n tb'ant kyu'n tkyaqilju o txi nma'ne teya.

⁷Kb'ajel kyb'incha'n aju ja xb'alun te mojb'ab'l tib'il, aju kax te k'ub'l nleye, aju tmaqsil tkub'sa'n tib'aj, ex kykyaqil qe makb'il che ajb'el tuj ja xb'alun,

⁸aju mes ex qe makb'il che ajb'el ti'j, aju kykub'il kandil q'an pwaq tb'anilxix ttx'otx'il ex kykyaqil qe makb'il che ajb'el ti'j, aju altar jatum kb'el patit storak,

⁹aju altar jatum kb'el patit chojb'il ex kykyaqil qe makb'il che ajb'el ti'j, aju tkub'il a' tuk'ix tq'uqb'il,

¹⁰qe kyxb'alun pal, qe xb'alun xjan te Aarón, qe xb'alun che ajb'el kye tky'ajal ok kyajb'en weye,

¹¹aju aseyt k'ajb'el te xjansab'l ex aju storak at tk'ok'jal tu'n tajb'en tuj Lugar Xjan. Kb'antel tkyaqil jlu kyu'n ik tza'nx o txi nma'ne teya, chi Qman Dios.

¹²Tzaj tma'ntl Qman te Moisés kyja':

¹³Chi Qman, chikuya kye aj Israel: Ax tok che ojlale kyuj qe q'ij te ojlab'l, ex atzun jun techal ti'j yol kyaj b'ant ti'j wu'ne kyuk'ile ex kyuk'il kyiyjile che ul itz'j te tib'ajxi, tu'ntzun tel kynik'e ti'j aqine Kymane in chin xjansante kyeye.

¹⁴Kyja'tzun, che ojlale tuj q'ij te ojlab'l tu'nju xjan te q'ij lu te kyeye. Alkye jun minti' ma tz'okx t-xo'n q'ij lu, ax tok kymel. Alkye jun ma tz'aq'nan tuj q'ij lu, b'i'x k'elex lajet tu'ntzun mi'n ttentl kyxol t-xjalil.

¹⁵Qaq q'ij che aq'nale. Atzunju twuqin q'ij, q'ij te ojlab'l, xjansamaj te weye. Noq alkyexku ma tz'aq'nan tuj q'ij te ojlab'l ax tok kymel.

¹⁶Aqeye aj Israel, kynimanxe q'ij te ojlab'l ex kyik'san kub'e q'ij lu, ax ikx kyu'n kyiyjile che ul itz'j te tib'ajxi. A jlu jun yol kyjel b'ant ti'j wu'ne kyuk'ile te jumajx.

¹⁷Atzun jun techal tu'n tten qxol aqine ex aqeye aj Israel, porke tuj qaq q'ij b'ant kya'j ex tx'otx' wu'ne; ex tuj twuqin q'ij xi nkoline aq'untl ex in ojlane, chi Dios.

¹⁸Tej tb'aj yolin Qman tuk'il Moisés twi witz Sinaí, e tzaj tq'o'n kab'e tz'lom ab'j te, tz'ib'amaj qe ley kywitz tu'nx twi tq'ab' Dios.