Read kumam Éxodo 33 Bible Online

Éxodo 33 - kumam bible

Éxodo 33

¹Tzaj tma'n Qman te Moisés kyja': Kyik'e tzalu, aya ex qe xjal e je'tz ti'na tuj Egipto; kyxi'ye tuj tx'otx' xi ntziyane te Abraham, te Isaac ex te Jacob, tu'n t-xi nq'o'ne kye kyiyjil che ul itz'j te tib'ajxi.

²Kxel nsama'ne n-anjele tu'n tkub' nej kywitze, ex che elex nlajo'ne qe aj Canaán, qe aj Amorreo, qe aj Heteo, qe aj Ferezeo, qe aj Heveo ex qe aj Jebuseo.

³Kyxi'ye tuj tx'otx' q'inun tx'otx' ex tb'anilxix. Atzun weye mi'n chinxe kyxole; mya yajku jaku che naje wu'ne tuj b'e, tu'nju mib'an che b'ine, chi Dios.

⁴Tejtzun kyb'inte xjal tqanil mya b'a'n lu, tzaj nimxix kyb'is, ex mi jun b'aj tb'inchan tib' kyu'n qe ti'xti tb'anilxix,

⁵tu'nju otoq tzaj tma'n Qman te Moisés tu'n t-xi tma'n kye aj Israel kyja': Aqeye xjal mib'an che b'ine, qa ma chinxe kyuk'ile, te jun rat jaku che naje wu'ne. Kyi'mele b'i'x ja'lo qe ti'xti tb'anilxix nno'k kyq'o'ne kyi'je, tu'ntzun nlonteye ti kb'antel wu'ne kyi'je.

⁶Eltzun kyi'n aj Israel qe ti'xti tb'anilxix kyok kyi'j, tej kyik' t-xe witz Horeb.

⁷Etztzun ti'n Moisés ja xb'alun ex jaw tb'incha'n najchaq ti'jxi campament, ex Ja Xb'alun te Mojb'ab'l Tibil tb'i ok tq'o'n. Qa attoq jun tajb'il tu'n tyolin tuk'il Qman, nnu'ltoq twitz ja xb'alun aju tetz ti'jxi campament.

⁸Ok t-xi' Moisés tumlal ja xb'alun, kykyaqil xjal in che jaw we'toq, in che kub' we'toq ttzi kyja, ex ax in xi b'ajtoq kywitz ti'j Moisés okxi tokx b'aj tuj.

⁹Oktzun tokx tuj, in kub'toq muj ttzi ja xb'alun ex ax in kub' ten akux in yolintoq Qman tuk'il Moisés.

¹⁰Oktzun kyke'yinte kykyaqil xjal aju muj tkub' ttzi ja xb'alun, teyle junjun in kub' mok'e'toq ax ttzi tja, tu'n tk'ulun.

¹¹Aku Dios in yolintoq tuk'il Moisés ik tza'n in yolin jun xjal tuk'il tamiw. Ok tb'aj yolin Moisés tuk'il Qman, nna'j meltz'ajtoq tu'n tpon tuj campament. Atzunte ku'xun Josué tky'ajal Nun, aju onil te Moisés, minti'toq nne'l laq'e' tuj ja xb'alun.

¹²Xi tma'n Moisés te Qman kyja': —B'intza, in tzaj tma'na weye: Q'inxa qe xjal lu, chiya, pero na'nx ttzaj tchik'b'a'na weye alkye kxel t-sama'na wuk'ile. Ax ikx in tma'ntla kyja': Ojtzqi'na wu'ne ex b'a'n ma tz'e'la tuj nwitze, chiya weye.

¹³Qatzun ikju, qa b'a'n ma chin e'le tuj twitza, in chin kub'sane twitza tu'n ttzaj tyek'una tb'eya weye, tu'ntzun tel nnik'e ti'ja ex tu'n tknet t-xtalb'ila wu'ne. Ximana ti'j, qe xjal lu teya qe, chi Moisés.

¹⁴Tzajtzun tma'n Qman kyja': —Ax qine chin xe'l tuk'ila, ex ktzajel nq'o'ne ojlab'l teya, chi Qman.

¹⁵Xitzun tma'n Moisés te kyja': —Qatzun mya aya kxe'l quk'ile, mi'n qo ex ti'na tzalu.

¹⁶¿Tza'n tten k'elel nik'b'aj ti'ja qa b'a'n ma qo e'le tuj twitza, aqine ex qe xjal etzan tu'na? ¿Myapetzun tu'nju in b'eta quk'ile ex tu'nju pa'nmaj qo'ye tu'na kyxol qe txqantl nasyon tuj tkyaqil twitz tx'otx'? Chi Moisés.

¹⁷Tzajtzun tma'n Qman te kyja': —Ok nb'incha'ye aju ma tmaya, tu'nju b'a'n ma tz'e'la tuj nwitze ex ojtzqi'na wu'ne, chi Dios.

¹⁸Xitzun tma'n Moisés te: —Chin kub'sale twitza, yek'untza tajwalila weye.

¹⁹Tzaj ttzaq'we'n Qman: —Kxel nyek'une nk'ujlalile teya ex kxel nma'ne nb'iye twitza. Qa waje tu'n ttzaj q'aq'an nk'u'je ti'j jun xjal, ktzajel q'aq'an nk'u'je ti'j; ex qa waje tu'n ttzaj tz'e'y wanmiye ti'j jun xjal, ktzajel tz'e'y wanmiye ti'j.

²⁰Mlay tz'ok tke'yina nwitze, ex qa ma tz'ok tke'yin jun xjal nwitze mlay tz'anq'intl.

²¹Ax ikx tzaj tma'ntl Qman: —Lu jun lugar at junx wuk'ile. We'kuya twi pik.

²²Oktzun tik' wajwalile, kb'elex nq'o'ne tuj jun tpa'xil pik, ex kb'el ntxayine tib'aja tu'n nq'ab'e okxi wik'xe.

²³Te tib'ajxi k'elel wi'n nq'ab'e tib'aja ex ok tila'ya ttzal wi'je; atzun nwitze mlay tila, chi Qman te Moisés.