Read kumam Éxodo 34 Bible Online

Éxodo 34 - kumam bible

Éxodo 34

¹Tzaj tma'n Qman te Moisés kyja': B'inchama kab'etl tz'lom ab'j ik tza'n qeju e b'ant nej, ex kb'el ntz'ib'ane kywitz axju yol tkub'toq kywitz qe tnejel tz'lom ab'j e kub' tb'uchina.

²B'inchamtzun ttena te nchi'j, primx tjaxa twi witz Sinaí, b'ix japuna nwitze twi witz lu.

³Mi jun xjal kjawix tuk'ila, ex mi jun ktel ti'jele witz lu; mi jun ẍne'l, mi jun wakẍ kwa'l ti'jele, chi Dios.

⁴B'ajtzun t-xpe'lin Moisés kab'e tz'lom ab'j ik tza'n qeju e b'ant nej. Jaw we' primxix tuj juntl q'ij, jax twi witz Sinaí ik tza'n otoq tma Qman, ex xi ti'n qe kab'e tz'lom ab'j kyuj tq'ab'.

⁵Ku'tztzun Qman tuj muj ex atzun kub' ten tuk'il Moisés, ex tu'nx tzaj tma'n tb'i te Moisés.

⁶Ik'tzun Qman twitz Moisés, in tma'ntoq kyja': —Aqine Jehová, aqine Jehová, aqine Dios at nim tq'aq'b'il nk'u'je, aqine nim in tz'e'y nk'u'je, yaj in tzaj ntx'u'jile, nim nk'ujlalile, ex axix tok chin yoline.

⁷At tq'aq'b'il nk'u'je kyi'j nimku kyiyjil xjal, ex in kub' nnajsa'ne kyil qeju in che b'inchan mya b'a'n, qeju kyk'i' che niman, ex qeju in che b'inchan il; ex in kub' nq'o'ne kycastiw qeju in che b'inchan il, ex kpol kanun castiw wu'ne kyib'aj qe kyk'wa'l, qe tal kychman ex qe ttxk'a kychman tu'n tlaj kyil kyman, chi Qman.

⁸Jurat naj kub' ẍmeje' Moisés tejxi tpon takl tib'aj twitz max twitz tx'otx' ex o k'ulun te Qman,

⁹ex xi tma'n: —Nman, qa b'a'n ma chin e'le tuj twitza, txi'ya quk'ile. Maske mib'an che b'in qe xjal lu, ex najsan kub'a qb'inchb'ene mya b'a'n ex qile, ex qo tk'moma te tetzb'ila, chi Moisés.

¹⁰Tzajtzun tma'n Qman kyja': B'intza, ja'lo kyjel b'ant ti'j nyole kyuk'il aj Israel. Che b'antel b'inchb'en nim kyipumal wu'ne kywitz, aqeju na'nx kyb'ant kyxol qe txqantl nasyon tuj tkyaqil twitz tx'otx', ex kykyaqil aj Israel aqeju ate' tuk'ila ok kyila' waq'unb'ene, porke xob'ajilxix aju kb'antel kyi'j wu'ne.

¹¹Japunx kyu'ne aju yol ma txi nma'ne kyeye ja'lo. Kywitzxe che elex nlajo'ne qe aj Amorreo, qe aj Canaán, qe aj Heteo, qe aj Ferezeo, qe aj Heveo ex qe aj Jebuseo.

¹²Mi'n b'ant ti'j jun kyyole kyuk'il qe xjal najl tuj tx'otx' jatum che pole, tu'ntzun mi'n kyok te jun tolsab'l te kyeye.

¹³Che b'ajel kyq'uchine qe ky-altar, che b'el kyb'uchine qe ab'j in che ok kyq'o'n te xjan, ex kb'el kytx'emine qe tze' kyok te tilb'ilal xu'j dios Asera.

¹⁴Mi'n che k'ulune kywitz junxitl dios, porke minti' in kub' tuj nwitze tu'n kyk'ulune kywitz, ex at nwitze ti'j ju xjal in k'ulun kywitz.

¹⁵Tu'ntzun jlu, mi'n b'ant ti'j jun kyyole kyuk'il qe xjal najl tuj tx'otx' ma chixin, ex ok kyk'ulun kywitz qe tilb'ilal ex ok t-xi kyq'o'n chojb'il kye, jakulo che'x txko'ne kyu'n, ex jakulo che wa'ne kyi'j qe chojb'il in kub' kyq'o'n kywitz kydios;

¹⁶ex qa ma che jaw kymojb'a'ne kyky'ajale kyuk'il qe kyme'jel, qe q'apoj lu che xe'l k'ulul kywitz kydios, ex jakulo che'x lpe' kyky'ajale kyi'j k'ulul kywitz kydios.

¹⁷Mi'n kub' kyb'incha'ne jun kydiose ti'j k'uxb'il in kub' ulj tuj q'aq'.

¹⁸Kb'el kyik'sa'ne aju ninq'ij ti'j pan minti' t-samel tuj tu'n tjaw mal tk'u'j. Wuq q'ij che wa'le pan minti' t-samel tuj ik tza'n o nmaye kyeye. Kb'el kyik'sa'ne tuj q'ij b'animaj ti'j tuj xjaw te Abib, tu'nju atzun xjaw lu e je'tze tuj Egipto.

¹⁹Kykyaqil qe tnejel kyky'ajale, weye qe; ax ikx qe tnejel kyal kywakẍe, qe tnejel kyal kyẍne'le ex qe tnejel kyal kychipe, qa tman weye qe.

²⁰Ok tkub' tnejel tal jun bur, qa tman, ktzajel kyq'o'ne jun tal ẍne'l ex qa jun tal chip te t-xel. Qatzun mi'n ma tzaj kyq'o'ne, kjawiltzun kytoqine ti'j tqul tu'n tkyim. Ax ikx ktzajel kyq'o'ne pwaq tu'n kyklet qe tnejel kyky'ajale; ax ikx mi'n che ule nwitze qa minti' jun oyaj q'i'n kyu'ne.

²¹Qaq q'ij che aq'nale, atzun tuj twuqin q'ij che ojlale. Ax ikx tuj tq'ijlalil ok tku'x awat awal, ex tuj tq'ijlalil ok tjaw chmet twitz awal il ti'j tu'n kyojlane tuj twuqin q'ij.

²²Ax ikx kb'el kyik'sa'ne aju ninq'ij ok kyjapun b'aj qe wuq seman, ex qa aju tq'ijlalil tnejel twitz kyawale triw, ex kb'el kyik'sane aju ninq'ij ok tjaw kychmo'ne twitz kyawale ok tjapun b'aj ab'q'i.

²³Ox maj tuj ab'q'i che ul kykyaqil xinaq aj Israel yek'ulte kyib' nwitze. Aqine Kymane ex Kydiose.

²⁴Kywitzxe che elex nlajo'ne qe nasyon ate' tuj tx'otx' jatum che pole, ex k'elel nnimsa'ne kytx'otx'e. Mi jun k'elel q'inte kytx'otx'e ok kyxi'ye yek'ulte kyib'e nwitze ox maj tuj ab'q'i. Aqine Kymane ex Kydiose.

²⁵Mi'n tzaj kyq'o'ne pan at t-samel tuj tu'n tjaw mal tk'u'j junx tuk'il tchk'el tal alumaj ktzajel kyq'o'ne te chojb'il, ex mi'n txi kyk'u'ne tuj juntl q'ij aju kyjel ten ti'j chojb'il in kub' b'yet tuj Xjan Q'ij.

²⁶Ktzajel kyi'ne tuj njaye aju tnejel twitz kyawale tb'anilxix, aju ktzajel tq'o'n kytx'otx'e. Aqine Kymane ex Kydiose. Mi'n jax kytxko'ne tal chip tujx ta'l tim ttxu', chi Qman.

²⁷Tzajtzun tma'n Qman te Moisés kyja': Tz'ib'an kub'a qe yol lu, ex atzun tlok' ju yol ma kyaj b'ant ti'j wu'ne tuk'ila ex kyuk'il aj Israel, chi Qman.

²⁸Tentzun Moisés tuk'il Qman 40 q'ij ex 40 qonik'an. Minti' o wa'n ex minti' o k'an. Kub' ttz'ib'an kywitz qe tz'lom ab'j aju yol kyaj b'ant ti'j, aqeju laj mandamyent.

²⁹Tej tku'tz Moisés twi witz Sinaí, q'i'ntoq qe kab'e tz'lom ab'j te ley tu'n tuj tq'ab', ex minti' b'a'n tu'n in qoptz'ajtoq twitz tu'nju otoq yolin tuk'il Qman.

³⁰O til Aarón ex kykyaqil aj Israel in qoptz'ajtoq twitz Moisés, ex tzajtzun kyxob'il tu'n kypon laq'e' ttxlaj.

³¹E tzajtzun ttxko'n Moisés; atzunte Aarón ex qe kytijil xjal e ajtz meltz'aj tuk'il, ex o yolin Moisés kyuk'il.

³²Te tib'ajxi e ul laq'e' kykyaqil aj Israel, ex xi tma'n Moisés tkyaqilju ley otoq tzaj tma'n Qman te twi witz Sinaí.

³³Tej tb'aj yolin kyuk'il, ok tmaqsi'n twitz tu'n jun xb'alun.

³⁴Ok tokxtoq Moisés twitz Qman tu'n tyolin tuk'il, nne'l ti'ntoq xb'alun twitz, ex maxi nno'k tq'o'n juntl maj okxi tetz; ex ok tetz in xi tma'ntoq kye aj Israel aju otoq tzaj q'ma'n te.

³⁵Ok tilwaj Moisés kyu'n aj Israel in qoptz'ajtoq twitz, nno'k tmaqsi'n twitz tu'n xb'alun, maxi nne'l ti'n okxi tokx juntl maj yolil tuk'il Dios.