Read kumam Éxodo 35 Bible Online

Éxodo 35 - kumam bible

Éxodo 35

¹Oktzun tchmo'n Moisés kykyaqil aj Israel ex xi tma'n kye kyja': Atzun jlu ma tzaj tma'n Qman weye tu'n tb'ant kyu'ne:

²Qaq q'ij che aq'nale; atzunju twuqin q'ij k'okel te jun q'ij xjan te kyeye ex jun q'ij te ojlab'l ex te nimb'il te Qman. Alkye jun ma tz'aq'nan tuj q'ij lu, kymel.

³Mi'n kub' kyq'o'ne q'aq' tuj kyjaye tuj q'ij te ojlab'l, chi Moisés.

⁴O yolin Moisés kyuk'il kykyaqil aj Israel ex xi tma'n kye kyja': Atzun jlu ma tzaj tma'n Qman tu'n tb'ant:

⁵E kyjaw chmet qe oyaj te Qman kyxole. Kykyaqil qeju kyajb'il tu'n ttzaj kyq'o'n kyoyaj te Qman tu'n tkyaqil kyanmi, e ttzaj kyi'n q'an pwaq, saq pwaq, q'an k'uxb'il,

⁶xb'alun ẍq'ilun ke'yin, xb'alun ẍjulin ke'yin, xb'alun kyaq ke'yin, tb'anil xb'alun lino, ttzmal chip,

⁷ttz'umal ẍne'l tok tk'a' kyaq ke'yin, tz'u'm tb'anilxix, tze' ch'i'x acacia,

⁸aseyt tu'n tajb'en kyuj kandil, t-samel at tk'ok'jal tu'n tku'x q'ot tuj aseyt aju in ajb'en ok tok toklen jun xjal, ex tu'n tajb'en te tk'ok'jal storak,

⁹qe tal ab'j ónice ex txqantl tal ab'j tb'anil, tu'n tok q'ot ti'j kapiẍay nno'k tq'o'n tnejel pal, ex ti'j tal xb'alun nno'k ten ttzi t-xu'k.

¹⁰Kykyaqil qeju at kynab'l ti'j aq'untl, che tzajel ex kb'antel kyu'n tkyaqilju o tzaj tma'n Qman:

¹¹Aju ja xb'alun te tja Dios, aju xb'alun tu'n tjax twi' ex tu'n tok ti'jele, qe ganch, qe tz'lom, qe tze' te tq'e'lil, qe tqan ex qe kyq'uqb'il tqan;

¹²aju kax k'ub'l tley Dios kyuk'ix qe tze' te tanub'l te, aju tmaqsil kax ex aju xb'alun te maqb'il tetz twitz;

¹³aju mes kyuk'ix qe tze' te tanub'l te, kykyaqil qe makb'il che ajb'el ti'j, ex aju pan tu'n tkub' tq'o'n twitz Qman;

¹⁴aju kykub'il kandil, qe makb'il che ajb'el ti'j, qe kandil tu'n kyspik'b'ante tuj ja ex aju aseyt k'ajb'el kyuj;

¹⁵aju altar tu'n tkub' patit storak kyuk'ix qe tze' te tanub'l te, ex aju aseyt k'ajb'el ok tok toklen jun xjal, aju storak tb'anilxix tk'ok'jal, ex aju xb'alun te maqb'il kb'el ttzi ja;

¹⁶aju altar tu'n tkub' patit chojb'il, tuk'ix q'an k'uxb'il xawk'in toy' kyjel tjaq' chojb'il ok tkub' patit, qe tze' te tanub'l te ex kykyaqil qe makb'il che ajb'el ti'j, ex aju tkub'il a' tuk'ix tq'uqb'il;

¹⁷qe xb'alun te maqb'il ti'jele pe'n, qe tqan, qe kyq'uqb'il tqan, aju xb'alun te maqb'il kb'el ttzi pe'n;

¹⁸qe stak te tzinb'il xb'alun ti'j tja Dios, qe stak che b'elex ti'jele pe'n ex qe k'alb'il kye;

¹⁹qe xb'alun che okel kyq'o'n pal ok kyajb'en tuj tja Dios, qe xb'alun xjansamaj te Aarón aju pal, ex qe kyxb'alun tky'ajal ok kyajb'en tuj kyaq'un te pal.

²⁰E ajtzun kykyaqil aj Israel kyja,

²¹ex kykyaqil qeju o tzaj kygan tu'n kyoyin tu'n tkyaqil kyanmi, e ul meltz'aj q'ol kyoyaj te Qman, tu'ntzun tb'ant aju ja xb'alun te mojb'ab'l tib'il, ex tkyaqilju attoq tajb'en ti'j ex kyi'j qe xb'alun xjansamaj.

²²E ultzun qe xinaq ex qe xu'j aqeju tzaj kygan tu'n kyoyin tu'n tkyaqil kyanmi, ul kyi'n caden, tuj ẍkyinb'aj, xmulq'ab'aj, tqul q'ab'aj, ex tkyaqil wiq ti'xti q'an pwaq ttx'otx'il. Kykyaqil ul kyi'n kyoyaj q'an pwaq ttx'otx'il te Qman.

²³Kykyaqil qeju attoq xb'alun ẍq'ilun ke'yin kyuk'il, ul kyi'n, tuk'ix xb'alun ẍjulin ke'yin, xb'alun kyaq ke'yin, tb'anil xb'alun lino, ttzmal chip, ttz'umal ẍne'l tok tk'a' kyaq ke'yin ex tz'u'm tb'anilxix.

²⁴Kykyaqil qeju otoq tz'el kypa'n saq pwaq ex qa q'an k'uxb'il, ul kyi'n twitz Qman; ex kykyaqil qeju attoq tze' acacia kyuk'il, ul kyi'n tu'n tajb'en ti'j tja Dios.

²⁵Ax ikx kykyaqil xu'j b'a'ntoq che chub'en, tzaj kyi'n aju noq' otoq b'aj kychub'en: Noq' ẍq'ilun ke'yin, noq' ẍjulin ke'yin, noq' kyaq ke'yin ex tb'anil noq' lino.

²⁶Kykyaqil xu'j tzaj kygan tuj kyanmi ex b'a'n che chub'en ti'j ttzmal chip, e ok ten chub'el te.

²⁷Qe nejenel tzaj kyi'n tal ab'j ónice ex qe tal ab'j tb'anil, tu'n kyok q'ot ti'j kapiẍay nno'k tq'o'n tnejel pal, ex ti'j tal xb'alun nno'k ten ttzi t-xu'k,

²⁸kyuk'ix qe tk'ok'jal ex aju aseyt tu'n tajb'en kyuj kandil, tuk'ix aseyt tu'n tajb'en ok tok toklen jun xjal, ex qe tk'ok'jal tu'n kyajb'en tuj storak.

²⁹Kykyaqil aj Israel, tza'nx qe xinaq ax ikx qe xu'j, aqeju o tzaj kygan tu'n t-xi kyq'o'n kyoyaj tu'n tb'ant tkyaqilju otoq tzaj tma'n Qman te Moisés, tzaj kyi'n kyoyaj twitz Qman tu'n tkyaqil kyanmi.

³⁰Xitzun tma'n Moisés kye aj Israel kyja': Kyb'intze. Kyxol tiyjil Judá o jaw sk'o'n Bezaleel tu'n Qman tu'n tok te nejenel ti'j aq'untl lu; ate Bezaleel tky'ajal Uri ex tal tchman Hur.

³¹O noj tuj tanmi tu'n T-xew Dios, ex o tzaj tq'o'n tojtzqib'l ti'j tkyaqil aq'untl, ex tu'n tel tnik' ti'j tkyaqil txkaj aq'untl,

³²ex at tnab'l ti'j alkyechaq tumlal aq'untl tu'n tb'ant, ex at tnab'l tu'n taq'nan ti'j q'an pwaq, ti'j saq pwaq ex ti'j q'an k'uxb'il,

³³tu'n kyb'aj tb'incha'n qe tal ab'j tb'anilxix ex tu'n kykub' tq'o'n tuj kyq'uqb'il, tu'n kyb'aj tjaso'n kyi'j tze', ex tu'n taq'nan ti'j tkyaqil wiq aq'untl tb'anilxix,

³⁴ex o tzaj q'o'n tnab'l tu'n t-xi tq'o'n xnaq'tzb'il kye txqantl; ex mya o'kx te, ax ikx te Aholiab aju tky'ajal Ahisamac ex tiyjil Dan.

³⁵O tzaj q'o'n nimxix kynab'l kab'e xjal lu, tu'n tb'ant kyximan ti'j tkyaqil wiq aq'untl ex tu'n kyb'inchante tkyaqil wiq aq'untl tb'anilxix, tu'n kyxi chmet qe tilb'ilal kywitz xb'alun ẍq'ilun ke'yin, xb'alun ẍjulin ke'yin, xb'alun kyaq ke'yin ex tb'anil xb'alun lino, ex tu'n kyku'tz chmet qe xb'alun tb'anilxix b'inchb'en kye.