Read kumam Éxodo 38 Bible Online

Éxodo 38 - kumam bible

Éxodo 38

¹Ax ikx tb'incha Bezaleel aju altar ti'j tze' ch'i'x acacia, jun var kyuk'il kab' xk'achub' twa'l, kab' var kyuk'il kab' xk'achub' tnuqb'il ex kab' var kyuk'il kab' xk'achub' twitz; junx kyaj echb'il te twitz tuk'il tnuqb'il.

²Tb'incha kyaje tkach, jun ti'j teyle junjun tb'utx', ax in che el ti'j altar; ex ok tlo'tzin q'an k'uxb'il ti'j.

³Q'an k'uxb'il kytx'otx'il kykyaqil qe makb'il te altar; qe tkub'il tza'j, qe jokb'il tza'j, qe laq matij, qe jakul twitz chib'j ex qe tkub'il xq'a'l.

⁴Ti'j q'an k'uxb'il tb'incha jun k'uxb'il xawk'in toy', aju in kyaj tjaq' chojb'il ok tkub' patit. Ku'x tq'o'n k'uxb'il lu tuj tpe'n altar tu'n tkyaj ten ax tuj tmij.

⁵Ax ikx kub' tb'incha'n kyaje argoy tu'n kyok ten kyi'j tkyajil t-skyin ju q'an k'uxb'il xawk'in toy', tu'ntzun kyokx qeju tze' kyuj.

⁶Tb'incha qe tze' tolin kyi'j ti'j tze' ch'i'x acacia ex ok tlo'tzin q'an k'uxb'il kyi'j.

⁷E ex tq'o'n qe tze' lu kyuj qe argoy kyoksa'n ti'j tk'u'j altar tu'n t-xi tanut. Tz'lom altar b'ant tu'n ex katl tuj tk'u'j.

⁸Kyi'j respej q'an k'uxb'il kytx'otx'il kye qe xu'j in che ajb'entoq ttzi ja xb'alun te mojb'ab'l tib'il, o tb'incha Bezaleel aju tkub'il a', tuk'ix tq'uqb'il.

⁹Ax ikx tb'incha aju ttxa'n tpe'n ja xb'alun. Tuj jun pak' ttxa'n pe'n lu, tuj tumlal tnayaj q'ij tb'incha xb'alun te maqb'il ti'j tb'anil noq' lino chub'emaj. Aju pak' lu 50 var tnuqb'il.

¹⁰Tb'incha winqin tqan ex winqin kyq'uqb'il tqan q'an k'uxb'il kytx'otx'il, ex saq pwaq kytx'otx'il qe ganch ex qe argoy.

¹¹Ax ikx 50 var tnuqb'il pak' ttxa'n pe'n tuj tumlal tb'anq'ab' q'ij, ex tb'incha xb'alun te maqb'il, tuk'ix winqin tqan ex winqin kyq'uqb'il tqan q'an k'uxb'il kytx'otx'il, ex saq pwaq kytx'otx'il qe ganch ex qe argoy.

¹²Tuj juntl pak' tuj tumlal telex q'ij, tb'incha xb'alun te maqb'il kyuk'ix laj tqan ex laj kyq'uqb'il tqan. Aju pak' lu 25 var tnuqb'il.

¹³Tuj pak' tuj tumlal tjawitz q'ij tb'incha xb'alun te maqb'il, ax 25 var tnuqb'il.

¹⁴Ttxlaj ttzi pe'n jatum in che okx xjal, tb'incha xb'alun te maqb'il te wuq var kyuk'il kab' xk'achub' tnuqb'il, ex ate'k ox tqan ex ox kyq'uqb'il tqan.

¹⁵Tuj juntl ttxlaj ttzi pe'n, tb'incha xb'alun te maqb'il te wuq var kyuk'il kab' xk'achub' tnuqb'il, ex ate'k ox tqan ex ox kyq'uqb'il tqan.

¹⁶Kykyaqil qe xb'alun toksa'n ti'jele pe'n b'animaj ti'j noq' lino chub'emaj.

¹⁷Q'an k'uxb'il kytx'otx'il kyq'uqb'il tqan, ex saq pwaq kytx'otx'il qe argoy ex qe ganch kyuk'ix qe adorn kyjax kyuj kywi' qe tqan. Kykyaqil qe argoy kyok kyi'j qe tqan ate'k ti'jele pe'n, saq pwaq kytx'otx'il.

¹⁸Aju xb'alun te maqb'il ttzi pe'n jatum in che okx xjal, chmo'maj ti'j noq' ẍq'ilun ke'yin, ẍjulun ke'yin, kyaq ke'yin ex lino chub'emaj. Aju xb'alun lu, laj var tnuqb'il ex kab' var tuk'il kab' xk'achub' twitz, ex qa aju twa'l, ax ik tza'nx qe xb'alun te maqb'il ti'jele pe'n.

¹⁹Kyaje tqan ex kyaje kyq'uqb'il tqan q'an k'uxb'il kytx'otx'il. Sak pwaq kytx'otx'il qe ganch ex qe adorn kyjax tuj kywi' qe tqan, ax ikx qe argoy.

²⁰Q'an k'uxb'il kytx'otx'il kykyaqil qe stak in che ajb'en te tzinb'il xb'alun ti'j ja xb'alun, ex qe stak in che ajb'en kyi'j tqan pe'n.

²¹Tu'n orden tu'n Moisés, jaw kyi'n aj Leví jun tajlal kyi'j qe k'uxb'il o che ajb'en tu'n tb'ant tja Dios, jatum tu'n tokx ten ju kax k'ub'l tley Dios; ex a Itamar tky'ajal pal Aarón ok te nejenel kye ti'j jlu.

²²Ate Bezaleel aju tky'ajal Uri, tal tchman Hur ex tiyjil Judá, tb'incha tkyaqilju otoq tzaj tma'n Qman te Moisés tu'n tb'ant,

²³ex o onin Aholiab ti'j, aju tky'ajal Ahisamac ex tiyjil Dan. Ate jlu b'a'n ximan ex mejor b'inchan tkyaqil txkaj aq'untl; b'a'n chmon xb'alun tuk'ix twitz ti'j noq' ẍq'ilun ke'yin, ẍjulin ke'yin, kyaq ke'yin ex lino tb'anilxix.

²⁴Tkyaqil q'an pwaq ajb'en tu'n tb'ant tkyaqil aq'untl ti'j tja Dios, oyaj jlu pon q'i'n, ex japun 21 quintal talil tu'n tkyaqil, ik tza'nx malb'il in ajb'en tuj tja Dios.

²⁵Aju saq pwaq jaw chmet kyxol xjal, japun 75 quintal tuk' 45 libr talil tu'n tkyaqil, ik tza'nx malb'il in ajb'en tuj tja Dios.

²⁶Kykyaqil qeju otoq jaw kyajlal, tzaj qe' kyi'j qeju otoq che japun twi' winqin ab'q'i, o japun 603,550 kyajlal xinaq tu'n tkyaqil; ex teyle junjun kye xi tq'o'n jun tal saq pwaq ch'ixmi mey ons talil ik tza'nx malb'il in ajb'en tuj tja Dios.

²⁷Ax ikx xi ti'n 75 quintal saq pwaq tu'n kyb'ant qe kyq'uqb'il tqan tja Dios ex qe kyq'uqb'il tqan xb'alun te maqb'il. Tkyaqil saq pwaq lu ajb'en tu'n kyb'inchet 100 kyq'uqb'il tqan ja, ex teyle junjun tq'uqb'il xi ti'n 75 libr saq pwaq.

²⁸Ti'j ju 45 libr saq pwaq jaw chmet kyxol kykyaqil xjal, e b'aj tb'incha'n Bezaleel qe ganch, qe argoy ex qe adorn kyjax tuj kywi' qe tqan.

²⁹Aju q'an k'uxb'il xi q'o'n te oyaj, japun 50 quintal tu'n tkyaqil.

³⁰Ti'jtzun q'an k'uxb'il lu, e b'aj b'incha'n qe tq'uqb'il ttzi ja xb'alun te mojb'ab'l tib'il, tuk'ix altar q'an k'uxb'il ttx'otx'il, ex aju k'uxb'il xawk'in toy' tu'n tkyaj ten tjaq' chojb'il ok tkub' patit, ex kykyaqil qe makb'il in che ajb'en ti'j altar,

³¹kyuk'ix qe kyq'uqb'il tqan ti'jele pe'n, qe kyq'uqb'il tqan ttzi ttxa'n pe'n, kykyaqil qe stak in che ajb'en ti'j ja xb'alun, ex qe stak in che ajb'en kyi'j ttxa'n pe'n.