Read kumam Éxodo 39 Bible Online

Éxodo 39 - kumam bible

Éxodo 39

¹Ti'j noq' ẍq'ilun ke'yin, ẍjulin ke'yin ex kyaq ke'yin, e kub' b'incha'n qe xb'alun nno'k kyq'o'n qe pal ok kyajb'en tuj tja Dios, kyuk'ix qe xb'alun xjan in che ajb'en tu'n Aarón, ik tza'n otoq tzaj tma'n Qman te Moisés.

²Ax ikx kub' b'incha'n aju kapiẍay ti'j q'an pwaq, ti'j noq' ẍq'ilun ke'yin, ẍjulin ke'yin, kyaq ke'yin ex noq' lino.

³B'aj tx'ino'n q'an pwaq tu'n martiy, xaxj ok wen, ex kub' qesin tu'n tok ik tza'n noq', tu'n t-xi' ch'in te ttze'yil xb'alun ẍq'ilun ke'yin, ẍjulin ke'yin, kyaq ke'yin ex lino; tb'anil b'inchb'en te.

⁴E kub' b'incha'n qe twi semil, tu'n kymoje' qe kykab'il ttxa'n kapiẍay kywi semil.

⁵Aju k'alb'il k'u'jb'aj xi'yni ti'jxi kapiẍay, tiqlix tib' tuk'il ex ax b'inchb'en te; ajb'en q'an pwaq ti'j, tuk'ix noq' ẍq'ilun ke'yin, ẍjulin ke'yin, kyaq ke'yin ex lino chub'emaj, ik tza'n otoq tzaj tma'n Qman te Moisés.

⁶E b'aj b'incha'n qe ab'j ónice, e ku'x q'o'n kyuj kyq'uqb'il q'an pwaq kytx'otx'il, ex jatz k'ochin tu'n kykyaj ten kyb'i qe tky'ajal Israel kywitz, ik tza'n twitz jun sey,

⁷ex e kub' tq'o'n Bezaleel kyib'aj qe twi t-semil kapiẍay. Kyu'ntzun qe ab'j lu in che tzaj na'n qe tky'ajal Israel, ik tza'n otoq tzaj tma'n Qman te Moisés.

⁸Ax ikx kub' b'incha'n aju tal xb'alun nno'k ten ttzi xu'kb'aj, tb'anil b'inchb'ente, ex ax ttze'yil ik tza'n te kapiẍay; ajb'en q'an pwaq ti'j, tuk'ix noq' ẍq'ilun ke'yin, ẍjulun ke'yin, kyaq ke'yin ex lino chub'emaj.

⁹Mejetz'in tten twitz ex junx kyaj tnuqb'il tuk'il twitz; jun xk'achub' tnuqb'il ex jun xk'achub' twitz.

¹⁰E ok q'o'n kyaje txol tal ab'j tb'anilxix ti'j. Tuj tnejel txol ok q'o'n jun tal ab'j sardio, jun topacio ex jun carbunclo.

¹¹Tuj tkab'in txol ok q'o'n jun tal ab'j esmeralda, jun zafiro ex jun diamante.

¹²Tuj toxin txol ok q'o'n jun tal ab'j jacinto, jun ágata ex jun amatista.

¹³Ex tuj tkyajin txol ok q'o'n jun tal ab'j berilo, jun ónice ex jun jaspe. Kykyaqil qe tal ab'j lu q'uql kykub' tib'aj kyq'uqb'il q'an pwaq kytx'otx'il.

¹⁴Ax kyajlal qe tal ab'j ik tza'n kyajlal qe tky'ajal Israel, kab'laj kyb'et. Ik tza'n twitz jun sey jatz k'ochin, tu'n tkyaj ten tb'i jun k'loj tiyjil Israel twitz teyle junjun ab'j.

¹⁵Ti'j tal xb'alun nno'k ten ttzi xu'kb'aj e kub' b'incha'n qe caden q'an pwaq tb'anilxix kytx'otx'il, ex xpaltx'i'n kyten;

¹⁶ax ikx e kub' b'incha'n kab'e kyq'uqb'il argoy, ex kab' argoy q'an pwaq kytx'otx'il, ex e ok q'o'n qe kab' argoy kyi'j kykab'il ttxa'n tal xb'alun.

¹⁷E ok q'o'n kykab'il ttxa'n caden q'an pwaq kytx'otx'il kyuj argoy e ok ten kyi'j kykab'il tb'utx' tal xb'alun,

¹⁸ex e ok q'o'n kab'etl kytxa'n caden kyi'j qe kyq'uqb'il q'an pwaq kytx'otx'il kyoksa'n kyi'j qe kab'e twi t-semil twitz kapiẍay.

¹⁹E kub' b'incha'ntl kab' argoy q'an pwaq kytx'otx'il ex e ok q'o'n kyi'j kykab'il tb'utx' tal xb'alun tjaq'xi, aju tok twitz kapiẍay.

²⁰Ax ikx e kub' b'incha'n kab'etl argoy q'an pwaq kytx'otx'il, ex e ok q'o'n ti'j kykab'il pak' kapiẍay, niqayin ttxlaj slapb'il te ex tib'aj k'alb'il tk'u'j kapiẍay.

²¹Tu'n jun k'alb'il ẍq'ilun ke'yin e ok k'alo'n qe argoy kyok ti'j tb'utx' tal xb'alun, kyuk'il qeju argoy kyok ti'j kapiẍay, tu'ntzun tkyaj ten tal xb'alun tib'aj k'alb'il tk'u'j kapiẍay ex tu'n mi'n tel tpa'n tib' tal xb'alun ti'j kapiẍay, ik tza'n otoq tzaj tma'n Qman te Moisés.

²²Ax ikx ku'tz tchmo'n aju xb'alun nno'k tujxi kapiẍay ti'j noq' ẍq'ilun ke'yin,

²³ex kyaj tq'o'n jun toy' tuj tmij tu'n tjax wib'aj tuj. Kub' slapun jun tqul ttzi'yile toy' lu, ik tza'n kyten qe chikyet tz'u'm, tu'ntzun mi'n t-xi tzaqj.

²⁴Ttxa'nile xb'alun lu e kub' b'incha'n tilb'ilal karnad ẍoq', ti'j noq' ẍq'ilun ke'yin, ẍjulin ke'yin, kyaq ke'yin ex lino chub'emaj.

²⁵E kub' b'incha'n tal campan q'an pwaq tb'anilxix kytx'otx'il, ex e okx q'o'n kyxol tilb'ilal karnad ẍoq' ttxa'nile xb'alun;

²⁶jun tal campan ex jun karnad ẍoq', juntl tal campan ex juntl karnad ẍoq', iklex tten ttxa'nile t-xb'alun Aarón ok tajb'en tuj taq'un te pal, ik tza'n otoq tzaj tma'n Qman te Moisés.

²⁷Ax ikx e ku'tz chmo'n qe ẍjo'w ti'j noq' lino, tu'n kyajb'en te Aarón ex kye tky'ajal,

²⁸tuk'ix ju potzb'il twi' tnejel pal ku'tz chmo'n ti'j noq' lino tb'anilxix, ex qe potzb'il wib'aj tb'anilxix kye txqantl pal, ex qe calsonsiy e ku'tz chmo'n ti'j noq' lino chub'emaj,

²⁹tuk'ix k'alb'il k'u'jb'aj ku'tz chmon ti'j lino chub'emaj, ti'j noq' ẍq'ilun ke'yin, ẍjulin ke'yin ex kyaq ke'yin, ik tza'n otoq tzaj tma'n Qman te Moisés.

³⁰Kub' b'incha'n aju tal tz'lom xjan ti'j q'an pwaq tb'anilxix, ex jatz k'ochin twitz ik tza'n jun sey, tu'n kykyaj ten qe yol lu ti'j: XJANSAMAJ TE JLU TE QMAN.

³¹Ok q'o'n jun taq'al tal tz'lom ẍq'ilun ke'yin, tu'n tok q'ot ti'j potzb'il wib'aj, ik tza'n otoq tzaj tma'n Qman te Moisés.

³²Kyja'tzun tten jupet aq'untl ti'j tja Dios, aju ja xb'alun te mojb'ab'l tib'il. O kyb'incha aj Israel tkyaqil ik tza'n otoq tzaj tma'n Qman te Moisés.

³³Ultzun kyi'n tja Dios tuj tkwent Moisés. Ul kyi'n aju ja xb'alun te mojb'ab'l tib'il, kyuk'ix qe makb'il in che ajb'en ti'j: Qe ganch, qe tz'lom, qe tze' te tq'e'lil, qe tqan ex qe kyq'uqb'il tqan;

³⁴aju maqsib'l te ja xb'alun b'inchamaj ti'j ttz'umal ẍne'l tok tk'a' kyaq ke'yin, aju maqsib'l b'inchamaj ti'j tz'u'm tb'anilxix, aju xb'alun te maqb'il tetz twitz kax;

³⁵aju kax k'ub'l tley Dios kyuk'ix qe tze' te tanub'l te ex aju tmaqsil;

³⁶aju mes kyuk'ix kykyaqil qe makb'il in che ajb'en ti'j ex qe pan in che kub' q'o'n twitz Qman;

³⁷aju kykub'il kandil q'an pwaq tb'anilxix ttx'otx'il, kyuk'ix qe kandil aqeju txolin kyten, ex kykyaqil qe makb'il in che ajb'en ti'j, tuk'ix ju aseyt tu'n tq'onte spik'un;

³⁸aju altar q'an pwaq ttx'otx'il, aju aseyt tu'n tajb'en ok tok toklen jun xjal, aju storak tb'anilxix tk'ok'jal, aju xb'alun te maqb'il tu'n tok ttzi ja xb'alun,

³⁹aju altar q'an k'uxb'il ttx'otx'il tuk'ix ju q'an k'uxb'il xawk'in toy' in kyaj tjaq' chojb'il ok tkub' patit, qe tze' te tanub'l te, kyuk'ix kykyaqil qe makb'il in che ajb'en ti'j, aju tkub'il a' tuk'ix tq'uqb'il,

⁴⁰qe xb'alun te maqb'il ti'jele pe'n, qe tqan, qe kyq'uqb'il tqan, aju xb'alun te maqb'il tu'n tok ttzi pe'n, qe k'alb'il tqan pe'n, qe stak, ex kykyaqil qe ti'xti in che ajb'en ti'j tja Dios aju ja xb'alun te mojb'ab'l tib'il,

⁴¹qe xb'alun tu'n tok kyq'o'n pal ok kyajb'en tuj tja Dios, qe xb'alun xjansamaj tu'n tajb'en te pal Aarón ex qe kyxb'alun tky'ajal ok kyajb'en te pal.

⁴²O kyb'incha aj Israel tkyaqil aq'untl ik tza'n otoq tzaj tma'n Qman te Moisés.

⁴³O til Moisés tkyaqil aq'untl otoq kyb'incha, otoq b'ant kyu'n ik tza'nx otoq tzaj tma'n Qman, ex e kub' tky'iwla'n.