Read kumam Éxodo 40 Bible Online

Éxodo 40 - kumam bible

Éxodo 40

¹Tzaj tma'n Qman te Moisés kyja':

²Tuj tnejel q'ij te tnejel xjaw kjawil twab'ana njaye, aju ja xb'alun te mojb'ab'l tib'il.

³K'okex tq'o'na kax k'ub'l nleye tuj, ex kb'el tq'o'na xb'alun te maqb'il tuj tmij ja, tu'ntzun mi'n tq'ancha'lin kax.

⁴K'okex tq'o'na aju mes tuj, ex che b'el tq'o'na tuj ttxolil qeju che b'el ten tib'aj. Ax ikx k'okex tq'o'na aju kykub'il kandil ex che okel ttxaqo'na qe kandil.

⁵Kb'el tq'o'na aju altar q'an pwaq ttx'otx'il te patb'il storak twitz kax k'ub'l nleye, ex kjawil tyob'ina xb'alun ttzi njaye.

⁶Te tib'ajxi kb'el tq'o'na aju altar te patb'il chojb'il twitz ttzi njaye, aju ja xb'alun te mojb'ab'l tib'il.

⁷Kb'eltzun tq'o'na aju tkub'il a' t-xol ja xb'alun te mojb'ab'l tib'il tuk'il altar, ex kb'elex tnojsa'na tu'n a'.

⁸Kb'el tb'incha'na jun ttxa'n pe'n ti'jele ex kjawil tyob'ina xb'alun te maqb'il ttzi pe'n.

⁹Ktzajeltzun ti'na aju aseyt in ajb'en ok tok toklen jun xjal, kb'el tqo'na ch'in tib'aj njaye ex tib'aj tkyaqilju tokx tuj. Tkyaqilju in ajb'en tuj, kxjansetel tu'na ex k'okel te xjan.

¹⁰Ax ikx kb'el tqo'na ch'in aseyt tib'aj altar te patb'il chojb'il, ex kyib'aj kykyaqil qe makb'il in che ajb'en ti'j. Kxjanseteltzun tu'na ex k'okel te jun altar xjanxix.

¹¹Ax ikx kb'el tqo'na ch'in aseyt tib'aj tkub'il a' ex tib'aj tq'uqb'il, ex kxjanseteltzun tu'na.

¹²Kxe'ltzun ti'na Aarón kyuk'ix qe tky'ajal ttzi ja xb'alun te mojb'ab'l tib'il, ex che b'ajel ttx'jo'na tu'n a'.

¹³Che okel tq'o'na qe xb'alun xjan ti'j Aarón, kb'el tqo'na aseyt tib'aj twi' ex kxjansetel tu'na tu'n tok te pal te weye.

¹⁴Te tib'ajxi che pol tlaq'b'a'na qe tky'ajal, ex k'okel tq'o'na qe ẍjo'w kyi'j.

¹⁵Kb'el tqo'na aseyt tib'aj kywi', ik tza'n kub' tqo'na aseyt tib'aj twi kyman, ex che okel te pal te weye. K'okeltzun kyoklen te pal, ex aju kyoklen lu kukx ktel te jumajx tuj tkyaqil tab'q'iyil, chi Qman.

¹⁶O tb'incha Moisés tkyaqil ik tza'n otoq tzaj tma'n Qman te.

¹⁷Tuj tnejel q'ij te tnejel xjaw te tkab'in ab'q'i kyetzlen aj Israel tuj Egipto, jaw wab'it tja Dios.

¹⁸Tej tjaw twab'an Moisés tja Dios, e kub' tq'o'n qe tq'uqb'il, e ok ttxolb'a'n qe tz'lom, e ok tq'o'n qe tze' te tq'e'lil, ex e ku'x tq'o'n qe tqan.

¹⁹Jax tq'o'n xb'alun twi tja Dios ex jax tq'o'n juntl tmaqsil tib'aj, ik tza'n otoq tzaj tma'n Qman te.

²⁰Tzajtzun ti'n Moisés aju ley ex ku'x tq'o'n tuj kax. E ok tq'o'n qe tze' tolin kyi'j ti'j kax ex kub' tq'o'n tmaqsil.

²¹Okxtzun tq'o'n Moisés aju kax k'ub'l tley Dios tuj ja xb'alun, ex kub' tq'o'n xb'alun te maqb'il tuj tmij ja tu'ntzun mi'n tq'ancha'lin kax, ik tza'n otoq tzaj tma'n Qman te.

²²Okx tq'o'n aju mes tuj ja xb'alun te mojb'ab'l tib'il, tuj tumlal tb'anq'ab' q'ij ex ti'jtzi xb'alun te maqb'il,

²³ex tib'aj mes lu, e kub' ttxolb'a'n qe pan in che kub' q'o'n twitz Qman, ik tza'n otoq tzaj tma'n Qman te.

²⁴Okx tq'o'n aju kykub'il kandil tuj ja xb'alun te mojb'ab'l tib'il, tuj tumlal tnayaj q'ij, twitz mes ex ti'jtzi xb'alun te maqb'il,

²⁵ex e ok ttxaqo'n qe kandil twitz Qman, ik tza'n otoq tzaj tma'n Qman te.

²⁶Okx tq'o'n aju altar q'an pwaq ttx'otx'il te patb'il storak tuj ja xb'alun te mojb'ab'l tib'il, twitz xb'alun te maqb'il,

²⁷ex kub' tpatun storak at tk'ok'jal tib'aj, ik tza'n otoq tzaj tma'n Qman te.

²⁸Jaw tyob'in aju xb'alun ttzi tja Dios.

²⁹Kub' tq'o'n aju altar te patb'il chojb'il twitz ttzi tja Dios, aju ja xb'alun te mojb'ab'l tib'il, ex e kub' tpatun qe alumaj tib'aj, tuk'ix twitz awal, te jun oyaj te Qman, ik tza'n otoq tzaj tma'n te.

³⁰Kub' tq'o'n aju tkub'il a' t-xol ja xb'alun te mojb'ab'l tib'il tuk'il altar, ex ku'x tnojsa'n tu'n a' te tx'ajb'il.

³¹Atzun in che el ttx'jo'ntoq tq'ab' Moisés kyuk'ix qe tqan, ikx te Aarón ex qe tky'ajal.

³²Ok kyokx tuj ja xb'alun te mojb'ab'l tib'il ex ok kypon laq'e' ti'j altar, tnejel in che tx'ajintoq, ik tza'n otoq tzaj tma'n Qman te Moisés.

³³Te b'ajsb'il ok tq'o'n Moisés pe'n ti'jele tja Dios, ex ti'jele ttxa'n tpe'n jatum tkub' altar te patb'il chojb'il, ex jaw tyob'in aju xb'alun ttzi pe'n. Kyja'tzun tten b'aj b'ant aju aq'untl tu'n Moisés.

³⁴Kub' ten muj tib'aj ja xb'alun te mojb'ab'l tib'il ex o noj tuj tu'n tajwalil Qman.

³⁵Minti' o b'ant tu'n tokx Moisés tuj ja xb'alun te mojb'ab'l tib'il, tu'nju otoq kub' ten muj tib'aj ex nojnitoq tuj tu'n tajwalil Qman.

³⁶Ok tjaw laq'e' muj tib'aj ja xb'alun te mojb'ab'l tib'il, in jaw kyi'ntoq aj Israel kyja ex in che ik' b'ettoq.

³⁷Qatzun minti' in jaw laq'e' muj, minti' in jaw kyi'n kyja, ex maxi in che ik' b'et ok tjaw laq'e' muj.

³⁸Te q'ijl in kub' tentoq aju muj te Qman tib'aj ja xb'alun te mojb'ab'l tib'il, atzun te qonik'an in kub' tentoq q'aq' tib'aj, ex q'ancha'ltoq jlu kywitz kykyaqil aj Israel. Iklex tten tkyaqil maj ok kyik' b'et ex noq jatum ok kykub' ten.