Read kumam Éxodo 5 Bible Online

Éxodo 5 - kumam bible

Éxodo 5

¹E okxtzun Moisés ex Aarón twitz Faraón ex xi kyma'n te kyja': —Ate Qmane ex Qdiose, aqo'ye aj Israel, in tma'n teya kyja': Che ttzoqpintza qe xjal etzan wu'ne, tu'n kyik'san ninq'ij te nimb'il weye tuj tzqij tx'otx'.

²Xi ttzaq'we'n Faraón kyja': —¿Alkyeju nno'k kyq'o'ne te Kymane, ex kyaje tu'n t-xi nb'i'ne tyol tu'n kyex ntzoqpi'ne qe aj Israel? Minti' ojtzqi'n Kymane wu'ne, ex mlayx che ex ntzoqpi'ne qe aj Israel tu'n kyex, chi Faraón.

³Xitzun kyma'n te kyja': —Aju Qmane ex Qdiose, aqo'ye aj Hebreo, o kub' tyek'un tib' qwitze. Qo xe'ltzune ja'lo tuj tzqij tx'otx' ox q'ij qb'eye, ex kxel qq'o'ne chojb'il te, tu'n mi'n ttzaj tq'o'n tx'u'j yab'il ex qa q'oj qib'aje, che chi.

⁴Xitzun tma'n rey te Egipto kye Moisés ex Aarón kyja': —¿Tiqu'n in che el kypa'ne qe xjal ti'j kyaq'un? Kyxi'tle aq'nal, chi rey.

⁵Ax ikx xi tma'ntl Faraón: Ma chmet nimxix kyajlal aj Israel tzalu, atzun kyeye kyaje tu'n kyel kypa'ne qe ti'j kyaq'un, chi Faraón.

⁶Tujx q'ij lu xi tma'n Faraón kye caporal ex kye tmayordom kyja':

⁷—Texju ja'lo mi'n txi kyq'o'ntle tqan triw kye aj Israel tu'n tb'ant loq' ik tza'n in b'ant ja'lo. Kyu'nx e ttzaj kyjyo'n tqan triw,

⁸ex kyq'onkuye kytarey ax ik tza'n ja'lo; mi'n tz'ajtz kylaq'b'a'ne. Aqe jlu ky'aj qe, ex tu'ntzun jlu in jaw tq'ajq'ajel kywi' ex in kyma'n: Qo'qe, ex qq'onx chojb'il te Qdios, che chi.

⁹E tkub' mas nim aq'untl kyib'aj tu'ntzun kyaq'nan ti'j, ex mya tu'n t-xi kyb'i'n nik'aj yol, chi Faraón.

¹⁰E je'tztzun qe caporal ex qe mayordom, ex xi kyma'n kye xjal kyja': Ma tma Faraón tu'n mi'n t-xi qq'o'ne tqan triw kyeye.

¹¹Ax qeye che xe'l jyolte noq jatum knetel kyu'ne, ex ax tajlal kytareye kb'antel ik tza'n nej, che chi.

¹²B'ajtzun kysipan kyib' aj Israel tuj tkyaqil tx'otx' Egipto, ex tzaj kyi'n tlok' triw tu'n tajb'en te t-xel tqan triw.

¹³Atzun kye mayordom e ok kylajo'n qe xjal ti'j aq'untl, ex xi kyma'n kye kyja': Kyb'inchame tajlal kytareye teyle junjun q'ij ik tza'n in b'anttoq kyu'ne tej kukxtoq t-xi q'ot tqan triw kyeye, che chi.

¹⁴E b'aj asyalin qe caporal aj Israel kyu'n qe tmayordom Faraón, ex xi kyma'ntl kye kyja': ¿Tiqu'n minti' ma b'ant tajlal loq' ik tza'n nej, mi ew ex mi ja'lo? Che chi.

¹⁵E ultzun qe caporal aj Israel twitz Faraón ex xi kyma'n te kyja': —¿Tiqu'n in tb'incha'na qi'je ikju, aqo'ye tmajena?

¹⁶Minti' in tzaj q'o'n tqan triw qeye. Nno'k q'o'n il qi'je tu'n tb'ant tajlal loq' ik tza'n nej, ex in qo b'aj asyaline. B'ix aqe t-xjalila at kylaj, che chi.

¹⁷Xitzun ttzaq'we'n Faraón: —Ky'aj qeye. Ax tok ky'aj qeye. Tu'ntzun jlu in kyma'ne: Qo'qe ex qq'onx chojb'il te Qman, che chiye.

¹⁸Kyxi'ye ex che aq'nantle. Mi'n txi q'ot tqan triw kyeye, ex ax tajlal loq' kb'antel kyu'ne ik tza'n nej, chi Faraón.

¹⁹Atzun kye caporal aj Israel b'i'x e b'isun tej ttzaj q'ma'n kye kyja': Mi'n tz'ajtz laq'e' tajlal loq' in b'ant teyle junjun q'ij.

²⁰Tej kyetz qe caporal yolil twitz Faraón, ok kyk'ulb'an kyib' tuk'il Moisés ex Aarón, aqeju in che ayontoq kyi'j.

²¹Xi kyma'n qe caporal kye kyja': —Jaku til Qman kyi'je, ex ate kb'el q'onte kycastiwoye. Tu'n kylaje ma qo el ik'une tu'n Faraón ex kyu'n qe tmayordom. Mer ik tza'n jun spad o txi kyq'o'ne tuj kyq'ab' tu'n qkub' b'yo'ne kyu'n, che chi caporal.

²²O yolin Moisés juntl maj tuk'il Qman, ex chi kyja': —Nman, ¿tiqu'n in che kub' tk'ixb'isa'na qe xjal lu? ¿Ti wile in tzaj t-sama'na?

²³Atxix tej wule yolil tuk'il Faraón te t-xela, mas ma che kub' tk'ixb'isa'n qe xjal etzan tu'na, ex na'nx kyklet tu'na, chi Moisés.