Read kumam Éxodo 6 Bible Online

Éxodo 6 - kumam bible

Éxodo 6

¹Tzaj ttzaq'we'n Qman te Moisés: —Ja'lo ok tila'ya aju kb'antel wu'ne ti'j Faraón, porke tu'n wipumale che eletz ttzoqpi'n, ex tu'nx wipumale che eletz tlajo'n ti'jtzi ttx'otx', chi Dios.

²O yolin Dios juntl maj tuk'il Moisés ex tzaj tma'n te kyja': Aqine Jehová aju Kydiose.

³Kub' nyek'un wib'e twitz Abraham, twitz Isaac ex twitz Jacob ex xi nma'ne kye: Aqine Dios at wipumale tu'n tb'ant tkyaqil wu'ne; atzun ti'j nb'iye Jehová minti' xi nma'ne kye.

⁴Kyaj b'ant ti'j jun nyole axix tok kyuk'il, tu'n t-xi nq'o'ne tx'otx' Canaán kye, jatum e najan ik tza'n stranjer xjal.

⁵Atzun ja'lo, in nb'i'ne in che ayayan aj Israel tu'nju ma che ok lajwersin ti'j aq'untl kyu'n aj Egipto, ex ma tzaj nna'ne nyole kyaj b'ant ti'j kyuk'il.

⁶Tu'ntzun jlu q'manxa kye aj Israel: Aqine Kymane, ex aqine chin eletz q'inte kyeye tjaq' yajb'il kyeye aju in kub' kyq'o'n aj Egipto. Che eletz ntzoqpi'ne tjaq' aq'untl ex che ko'pjele wu'ne tu'n wipumale nim, tuk'il k'ixb'isab'l ma'xix kyib'aj aj Egipto.

⁷Che okel nq'o'ne te jun k'loj xjal etzan wu'ne, ex aqine chin okel te Kydiose. K'elel kynik'e wi'je, qa aqine Kymane ex Kydiose aju etz q'inte kyeye tjaq' yajb'il ma'xix kub' q'o'n kyu'n aj Egipto.

⁸Atzun che pol wi'ne tuj tx'otx' xi ntziyane te Abraham, te Isaac ex te Jacob, ex kxel nq'o'ne tx'otx' lu te kyetzb'ile, aqine Kymane, chikuya kye, chi Dios te Moisés.

⁹Atzun yol lu xi tma'n Moisés kye aj Israel; atzun kye minti' xi kyb'i'n tyol tu'nju otoq b'aj kyk'u'j tu'n aq'untl kyuw.

¹⁰O yolintl Qman tuk'il Moisés ex tzaj tma'n te kyja':

¹¹—Txi'ya tuk'il Faraón aju rey te Egipto ex q'manxa te tu'n kyetz ttzoqpi'n aj Israel tuj ttx'otx', chi Qman.

¹²Xi ttzaq'we'n Moisés te Qman: —Minti' in chin okx nimane kyu'n aj Israel. ¿Tza'ntzun tten chin okex b'i'ne tu'n Faraón, porke xt'ab' chin yoline? Chi Moisés.

¹³O yolin Qman tuk'il Moisés ex Aarón, ex tzaj tma'n kye tu'n t-xi kyma'n kye aj Israel ex te Faraón qa otoq tma Dios kye tu'n kyetz kyi'n aj Israel tuj tx'otx' Egipto.

¹⁴Atzun qe nejenel kyxol qe kyxe'chel: Qe tky'ajal Rubén, aju tnejel tky'ajal Israel, atzun qe jlu: Hanoc, Falú, Hezrón ex Carmi. Atzun qe jlu kyxe'chel tiyjil Rubén.

¹⁵Qe tky'ajal Simeón, atzun qe jlu: Jemuel, Jamín, Ohad, Jaquín, Zohar ex Saúl aju tal jun aj Canaán. Atzun qe jlu kyxe'chel tiyjil Simeón.

¹⁶Qe tky'ajal Leví, atzun qe jlu: Gersón, Coat ex Merari, atzun qe jlu kyxe'chel tiyjil Leví. 137 ab'q'i ten Leví twitz tx'otx'.

¹⁷Qe tky'ajal Gersón, atzun qe jlu: Libni ex Simei, teyle te junjun k'loj tiyjil.

¹⁸Qe tky'ajal Coat, atzun qe jlu: Amram, Izhar, Hebrón ex Uziel. 133 ab'q'i ten Coat twitz tx'otx'.

¹⁹Qe tky'ajal Merari, atzun qe jlu: Mahli ex Musi. Atzun qe jlu kyxe'chel tiyjil Leví.

²⁰Moje' Amram tuk'il Jocabed aju tanb' tman, ex e ul itz'j kab'e tky'ajal ti'j; Aarón tb'i jun, ex Moisés tb'i juntl. 137 ab'q'i ten Amram twitz tx'otx'.

²¹Qe tky'ajal Izhar, atzun qe jlu: Coré, Nefeg ex Zicri.

²²Qe tky'ajal Uziel, atzun qe jlu: Misael, Elzafán ex Sitri.

²³Moje' Aarón tuk'il Elisabet aju tme'jel Aminadab ex tanb' Naasón. Qe tky'ajal e tzaj ti'j Elisabet, atzun qe jlu: Nadab, Abiú, Eleazar ex Itamar.

²⁴Qe tky'ajal Coré, atzun qe jlu: Asir, Elcana ex Abiasaf. Atzun qe jlu kyxe'chel tiyjil Coré.

²⁵Moje' Eleazar aju tky'ajal Aarón tuk'il jun xu'j kyxol qe tme'jel Futiel, ex ul itz'j jun tky'ajal ti'j, Finees tb'i. Atzun qe jlu nejenel kyxol teyle junjun k'loj aj Leví.

²⁶Axtzun qe jlu, Aarón ex Moisés, aqeju o yolin Qman kyuk'il tu'n kyetz kyi'n aj Israel tuj tx'otx' Egipto tuj k'lojin kyten.

²⁷Axte Moisés ex Aarón e yolin twitz Faraón aju rey te Egipto tu'n kyetz ttzoqpi'n qe aj Israel tuj Egipto.

²⁸Tej tyolin Qman tuk'il Moisés tuj tx'otx' Egipto,

²⁹tzaj tma'n te kyja': —Aqine Kymane. Q'manxa te Faraón aju rey te Egipto tkyaqilju kxel nma'ne teya, chi Qman.

³⁰Xitzun ttzaq'we'n Moisés: —Nman, xt'ab' chin yoline. ¿Tza'ntzun tten chin okex b'i'ne tu'n Faraón?