Read kumam Job 10 Bible Online

Job 10 - kumam bible

Job 10

¹Ma b'aj nganiye tu'n wanq'ine. Kjawitz nma'ne tkyaqil yajb'il wi'je, ktzyetel nyoline tu'n tlaj ju ta'w in nna'ne tuj wanmiye.

²Aya Nman Dios, mi'n kub' tq'o'na nsentense, q'mantza alkyetzun mya b'a'n ma nb'inchaye.

³Aya ch'isal weye, ¿b'a'npetzun tu'n nyajlanjtze tu'na ex tu'n wel tik'una, ex atzun ti'j kyximb'etz xjal mya b'a'n tu'n tjaw tzalaja?

⁴¿Baqa junx ke'yb'il kye qe ti'xti tuj twitza ik tza'n tuj kywitz qe xjal?

⁵¿Baqa junx ta' tuj tq'ija ik tza'n tuj tq'ij jun xjal in kyim?

⁶¿Tiqu'ntzun in jyona ti'j npaltile ex wile;

⁷maske b'a'n tu'na minti' wile, ex mi a'l jun jaku klonte weye tuj tq'ab'a?

⁸Aya o b'inchante weye tu'nx tq'ab'a, ex atzun ja'lo tajb'ila tu'n nnaje tu'na.

⁹Na'ntza ti'j tx'otx' in kub' tb'incha'na: ¿Maj chin k'okeltzun tq'o'na juntl maj te quq?

¹⁰Tb'inchaya nximlale ik tza'n in b'ant kyes ti'j lech ok tb'aj ttzyun tib';

¹¹tzaj tq'o'na nchib'jale ex ntz'umile, b'aj tmojb'a'na qe nb'aqile ex qe nb'otx'ile;

¹²tzaj tq'o'na nchwinqlale, in chin tk'ujla'na, ex noq tu'nju kwentin qine tu'na, kukx itz'x qine ja'lo.

¹³Atzun ja'lo ma tz'el nnik'e ti'j, tuj tanmiya at jun t-ximb'etza tuj ewaj ta':

¹⁴tok tkwenta wi'je, mya yajku nb'inchaye il tu'ntzun tkub' tq'o'na nsentense ti'j wile.

¹⁵Qa at wile b'ek'b'il nwitze; ex qa minti' wile ax ikx mlay chin jaw tzalaje tu'n jlu; ma tzaj nch'ixwiye ex ma tzaj nim nb'ise tu'na.

¹⁶Qa ma jaw wi'n wipune tu'n nyoline, ktzajela wi'je ik tza'n jun b'alun tu'n ntzyete, ex in tb'incha'na tb'inchb'ena nim tipumal tu'n nnaje tu'na.

¹⁷Kukx in che pon ti'na qe testiw twitza q'malte mya b'a'n wi'je; aju tq'oja wi'je kukx tch'iy; minti' in xi tkolina tu'n tok tzoqpaja wi'je ik tza'n txqan soldad.

¹⁸¿Tiqu'n tzaj tq'o'na amb'il tu'n wul itz'je? B'i'xwit in kyime ex mi junwtlo ok ke'yinte weye.

¹⁹In tzajxwitloye tuj talb'il ntxu'ye ex b'i'xwitlo in ku'x maqu'ne, ikwitlo tza'n minti' otoq chin tene twitz tx'otx'.

²⁰Tu'nju ch'in tuj nq'ije pa'mil tib'a wi'je. Chin tq'onkja tu'n ntene ch'in tuj tzalajb'il,

²¹na'nxtoq tu'n nxi'ye tuj nb'eye jatum mlay chin ajtz meltz'aje, tuj ju najb'il jatum minti' spik'un, o'kx qlolj at,

²²tuj najb'il o'kx qxopin at tuj ex minti' ttxolil, jatum junx ta' spik'un tuk'il qlolj, chi Job.