Read kumam Job 11 Bible Online

Job 11 - kumam bible

Job 11

¹Tzyettzun tyolin Zofar aju aj Naamat ex tma:

²Tkyaqil yol ma tmaya at tzaq'web'l te, mya tu'nju nim ma yolina at ttxolil tyola.

³¿Chipetzuna qa tu'nju nim tyola mi'n qo q'ajte ex qa mi a'l jun jaku pon t-xkye' tu'n ttzaq'wente tyola te xmayb'il?

⁴In tma'na qa tuj tumelxix ta' t-xnaq'tzb'ila, ex tu'nxa nno'k tq'on tib'a minti' tila twitz Dios.

⁵Noqwit a Dios yolin tu'n t-xi tzaq'we'na tu'n,

⁶jakwitlo txi xnaq'tza'na tu'n jatum tzajni ju ojtzqib'l aju kyuwxix tu'n tel qnik' ti'j. Jakutzun tz'el tnik'a ti'j, minti' ma kub' tq'o'n Dios tcastiwoya ik tza'nx ju tila.

⁷¿Chipetzuna qa jaku tz'el tnik'a ti'j tkyaqilju at tuj t-ximb'etz Dios? ¿B'a'npe tu'na jatum in pon b'aj tipumal?

⁸Mas ma' t-ximb'etz Dios ik tza'n kya'j leq'ch tjaw, ex mas ma' t-xe' ik tza'n jul jalo ponin t-xe', ¿tza'ntzun tten jaku tz'el tnik'a ti'j?

⁹Mas ma' twitz ik tza'n tx'otx' ex ik tza'n mar.

¹⁰Qa nnu'lku Dios ex qa in tzyetkuya tu'n tu'n toka tuj xjel, ¿alkye b'a'n tmayonte te Dios ti'j?

¹¹B'a'n tu'n Dios alkye qe xjal nik'al yol; ex in tke'yin aju mya b'a'n in kyb'incha'n, ¿qatzun tuj tnab'la minti' tok tkwent Dios ti'j?

¹²Mlay kub' tmansin tib' bur te tjaq' k'ul. Ikxtzunte xjal minti' tnab'l, mlayx tz'ok tnab'l.

¹³Ximankuya tu'n tb'eta tuj tumelxix, ex kub'santzuna twitz Dios.

¹⁴Aju il in tb'incha'na, kolinkja, mi'n txi tq'o'na amb'il tu'n tten mya b'a'n tuj tjaya.

¹⁵Kyja'tzun jaku jaw tzalaja ex jaku kyaj tena minti'tl tila, ex kteltzuna tuj txub'txaj ex minti' t-xob'ila.

¹⁶Jaku tzik' tna'l tu'na aju k'ixk'oj tok ti'ja; k'ik'el tna'l tu'na ik tza'n jun a' in b'et.

¹⁷Mas kqoptz'ajel tchwinqlala ik tza'n t-spik'umal q'ij te chilkuq'ij, atzunju qonik'an qloljxix ik k'okel ik tza'n in jawil q'ij.

¹⁸Ok kqeb'el tk'u'ja ex k'anq'ila minti' t-xob'ila; ktala tuj txub'txaj porke a Dios kwentil teya.

¹⁹Mi a'l jun k'okel sek'punte teya ok tojlana. Nimku che ul qanil xtalb'il teya.

²⁰Atzun qe xjal mya b'a'n, che jyol ti'j jun onb'il ex noqx gan; mlay knet kyu'n jun lugar jatum tu'n tokx kyklon kyib', o'kx in che ayon ti'j tu'n kykyim, chi Zofar b'aj tma'n.