Read kumam Job 12 Bible Online

Job 12 - kumam bible

Job 12

¹Xitzun ttzaq'we'n Job ex tma:

²Ax tok o'kx aqeye at kynab'le kyxol kykyaqil xjal, ex ok kykyime minti' juntl at tnab'l ik tza'n kyeye.

³Ax ikx weye at nnab'le, ex mya mas ch'in nnab'le kywitze. ¿Alkye jun minti' b'a'n tkyaqil jlu tu'n?

⁴Nej in chin kub'sane twitz Dios ex in chin tzaj tb'i'n, atzun ja'lo in che tze'n qe wamiwoye wi'je maske minti' wile ex minti' npaltile.

⁵Aju xjal b'a'n ta' nne'l tik'un aju myaxix b'a'n ta'; minti' tb'is ti'j tu'n t-xi tlamo'n aju kyja'toq tik' tz'aq.

⁶Qe xjal eleq' at tzalajb'il tuj kyja, qeju kyk'i' che niman Dios txub'txaj in che anq'in, aju kyipumal nno'k kyq'o'n te kydios.

⁷Qaninxa kye txkup ex qa kye chyu'j; jaku tzaj xnaq'tza'na kyu'n.

⁸Ax ikx te tx'otx' ex qe kyiẍ ate' tuj mar, b'a'n t-xi tqanina kye tu'n ttzaj xnaq'tza'na kyu'n.

⁹¿Atpe jun na'nx tb'inte qa tu'n tq'ab' Dios o b'ant tkyaqil?

¹⁰Tuj tq'ab' Dios ta' kychwinqlal kykyaqil qeju itz' twitz tx'otx', ax ikx kyanmi kykyaqil xjal.

¹¹Aju ẍkyinb'aj b'a'n tu'n alkye t-xilen junjun yol, ik tza'n qk'o'n in tna'n qe tk'ok'jal.

¹²Qe tij xjal at kynab'l; ax ju kyab'q'iyil ma tzaj q'onte kynab'l.

¹³Ex ate Dios at nim tnab'l ex at nim tipumal, in kub' t-ximan alkyechaq taj, ex in japun tu'n.

¹⁴Aju in kub' t-xitun Dios, mi a'l jun jaku jaw b'inchante juntl maj, aju ma tz'okx tjpu'n Dios, mi a'l jun jaku tzoqpinte te.

¹⁵Qa ma we' jb'al tu'n, tkyaqil ktzqijel; qa ma tzaj tzoqpaj jb'al tu'n, knajel tx'otx'.

¹⁶Tu'n tipumal kb'el ti'j tkyaqil. Tuj tkwent Dios ta' ju xjal in kub' sb'u'n tuk'ix ju in sb'un.

¹⁷Nne'l ti'n kynab'l qe xjal q'ol nab'l ex in tzpet kynab'l qe kawil tu'n.

¹⁸Nne'l ti'n kyoklen qe rey ex in che'x ti'n pres.

¹⁹Nne'l ti'n kyoklen qe pal ex qeju nim kyoklen.

²⁰Qe q'ol nab'l, aqeju q'uqlxix kyk'u'j xjal kyi'j, in che kyaj ten minti' kyyol, ex nne'l ti'n kyojtzqib'l qe tij xjal.

²¹Nne'l tik'un qe xjal nim kyoklen, ex nne'l ti'n kyipun qeju at kyipun.

²²In tzaj ttx'olb'a'n aju kyximb'etz xjal at tuj ewaj ex in kub' tq'o'n tuj spik'un aju attoq tuj qlolj.

²³In xi tq'o'n kyipun qe nasyon ex in che kub' t-xitun, in che el t-sputun ex in che ok tchmo'n juntl maj.

²⁴Nne'l ti'n kynab'l qe nejenel kyuj qe tnam ex in che'x naj tu'n tuj jun lugar minti' kynajb'il xjal tuj, minti' b'e tu'n tknet kyu'n jatum tu'n kyxi',

²⁵jatum noq xmakan in che b'et tuj qlolj, noq in takpaje' kyik' ik tza'n k'al q'e'n.