Read kumam Job 14 Bible Online

Job 14 - kumam bible

Job 14

¹Tmatl Job: Aju xjal itz'jni ti'j xu'j ch'in tuj tanq'ib'l ex nimku yajb'il in tzaj ti'j.

²Ik tten ik tza'n b'ech ok in poq'chaj, jurat naj in tzqij ex minti' in kyaj ten, ik tten ik tza'n jun xlekun in kub' naj.

³¿Maj tib'ajtzun xjal lu tkub' twitza, Nman Dios, ex maj tib'ajxtzun taja tu'n tkub' tq'o'na jun castiw?

⁴¿Baqa at jun jaku b'ant tu'n tu'n tok te saq qa mya saq ta' tanmi? Mi jun.

⁵Tu'na echamaj jte' q'ij tu'n tten jun xjal twitz tx'otx'. B'i'x b'animaj tu'na tu'n mi tik' tib'aj.

⁶Q'i'n el twitza ti'j ex q'on kyaja tuj tzalajb'il, q'on kyaja tu'n taq'nan ik tza'n jun aq'nal xjal ex tu'n ttzalaj ti'j taq'unb'en.

⁷Ok tjaw tx'emit jun tze', atx tumlal tu'n ttzaj t-xul ex kukx jaku tzaj t-xul.

⁸Maske otoq tijin tlok' ex otoq q'u'chix ttronkil tuj tx'otx',

⁹pero ok tna'nte tchewil a', ktzajel t-xul, ex che jletel tq'ab' ik tza'n jun wi' tal awal ma in ch'iy;

¹⁰atzunte xjal ok in kyim, b'i'x in naj te jumajx, ex ok tkyim, ¿jatum kpol?

¹¹Ik tza'n a' tuj mar ex qe nima, jaku b'i'x che aj tzqij,

¹²kyja'xtzun tten xjal, ax kyjel ten te jumajx tuj muqb'il ex mlay jaw we'tl; ik tza'nx kya'j kukx ktel te jumajx, ex mlayx tzul tnab'l xjal.

¹³Noqwit jaku chinx tewana tuj kynajb'il kyimni, akux in b'aj tq'oja ex b'i'x tu'n ttzaj tma'na alkye jun q'ij tu'n wule ti'j tk'u'ja.

¹⁴Qa ma kyim jun xjal, ¿k'anq'ilpelo juntl maj? Jakulo chin ayone ti'j noq nik'punxi tyemp wajb'eb'le tu'n tul kanun ju tzoqpib'l weye.

¹⁵Jakulo chin txkete tu'na ex jakulo txi ntzaq'we'ne, ex jakulo chin tzaj t-xtalina, porke taq'unb'enx tq'ab'a qine.

¹⁶Qa tok tkwenta wi'je ja'lo tza'n in chin b'ete, te tib'ajxi mlay tz'ok tq'o'n tkwenta ti'j wile.

¹⁷B'i'xlo jaku tzik' tna'l npaltile tu'na, ex jakulo kub' tnajsa'na nb'inchb'ene mya b'a'n.

¹⁸Ikxpe qe witz kyja' kyb'aj xitj ex qe pik kyja' kyik' ch'expu'n tuj kylugar.

¹⁹Ik tza'n a' in b'aj tjaqu'n ti'j ab'j ex aju jb'al in xi tiqan tquqil tx'otx', kyja'xtzun in b'aj naj tu'na aju in ayon xjal ti'j tu'n tjaw anq'in juntl maj.

²⁰In kub' ti'j tu'na te jumajx ex b'i'x in naj, ex ok tkyim otoq ch'expet tilb'ilal.

²¹Qa ma tz'ok kyoklen qe tk'wa'l, mlay tb'i; ex qa ma tzaj jun mya b'a'n kyi'j, ax mlay tb'i.

²²O'kx in tna'n k'ixk'oj ti'j tex t-ximlal ex aju yajb'il in tzaj ti'jx.